މާލޭގައި އަންހެނަކު ރޭޕްކުރި މައްސަލައެއް ބަލަނީ
ރޭޕްގެ މައްސަލަ ހުށަހަޅާފައިވަނީ ހޯމަ ދުވަހު ކަމަށް ފުލުހުން ބުނޭ
ރޭޕާ ދެކޮޅަށް ކުރި މުޒާހަރާއެއް
މާލޭގައި އަންހެނަކު ރޭޕްކުރި މައްސަލައެއް ބަލަމުން އަންނަކަމަށް ފުލުހުން ބުނެފިއެވެ.
ފުލުހުން ބުނެފައިވާ ގޮތުގައި މި މައްސަލަ އެ އިދާރާއަށް ހުށަހަޅާފައިވަނީ ހޯމަ ދުވަހުގެ ވަގުތެއްގައެވެ. މި މައްސަލައާ ގުޅޭ އިތުރު ތަފްސީީލެއް ފުލުހުން ދީފައެއްނުވެއެވެ.
ފުލުހުން މިހެން ބުނެފައިވަނީ، އޭނާ ރޭޕްކުރި ކަމަށާއި އެ މައްސަލަ ފުލުހަށް ހުށަހެޅުމުން އެ އިދާރާއިން އަމަލުކުރިގޮތާމެދު ހިތްހަމަނުޖެހި އެކަން އަންހެނަކު ސޯޝަލް މީޑިއާގައި ހިއްސާކޮށްފައި ވަނިކޮށެވެ. އެ އަންހެންމީހާ ބުނިގޮތުގައި އޭނާ ރޭޕްކޮށްފައިވަނީ މިދިޔަ ހުކުރު ދުވަހުގެ ރޭގެ ވަގުތެއްގައެވެ.
ރޭޕްކުރިކަމަށް ބުނާ މީހާގެ ފޮޓޯ ހިއްސާކޮށް އެ އަންހެންމީހާ ޓްވިޓަރގައި ބުނެފައިވަނީ، އޭނާ ރޭޕްކުރީ ލޯބިވެރިޔާއާއެކު "ގެޓްޓުގެދަރ" އަކަށް ގޮސް އުޅެނިކޮށްކަމަށެވެ. އޭނާ ބުނީ ގިނަބަޔަކު އެކުގައި ތިބުމަށްފަހު އޭނާގެ ލޯބިވެރިޔާ ދިޔައީ އެހެން އަންހެން ކުއްޖަކު ގެއަށްލާންކަމަށާއި، އޭނާ ރޭޕް ކޮށްފައިވަނީ އެ ދަނޑިވަޅުގައިކަމަށެވެ.
މި މައްސަލަ ފުލުހަށް ހުށަހެޅުމުން އޭނާ ލައިގެން ހުރި ސްކަރޓާ ގުޅޭގޮތުން ސުވާލުކުރިކަމަށް އޭނާ ވަނީ ބުނެފައެވެ. އެގޮތުން، ސްކަރޓަކީ ކިހާ ކުރު ސްކާޓެއްތޯ ފުލުހުން ސުވާލުކޮށްފައިވާކަމަށް އޭނާ ބުންޏެވެ.
އެ އަންހެންމީހާގެ ވާހަކަ ސޯޝަލް މީޑިއާގައި ހިއްސާކުރުމުން ގިނަ ބަޔަކު ދަނީ، އެ މައްސަލަ ވަގުތުން ބަލައި ފިޔަވަޅު އެޅުމަށް ގޮވާލަމުންނެވެ. އަދި ފުލުހުން އޭނާއާމެދު ކަންތައްތައްކުރި ގޮތް ވެސް ގިނަ ބަޔަކު ވަނީ ކުށްވެރިކޮށްފައެވެ.
