ޖަޕާނުގެ މަޝްހޫރު ފެޝަން ޑިޒައިނަރެއް ކަމަށްވާ އިސީ މިޔާކޭ މަރުވެއްޖެއެވެ.
ޖަޕާނުގެ ނޫސްތަކުން ރިޕޯޓްކޮށްފައިވާ ގޮތުގައި, މިޔާކޭ މަރުވީ ފުރަމޭގެ ކެންސަރު ޖެހިގެން އުޅުމަށްފަހު މި މަހުގެ 5 ވަނަ ދުވަހުއެވެ. އޭނާ މަރުވިއިރު އުމުރުން 84 އަހަރެވެ.
ފެޝަން އިންޑަސްޓްރީގެ އެންމެ ވިދާ އެއް ނަމުގެ ގޮތުގައި ފާހަގަކުރެވޭ މިޔާކޭގެ އެންމެ ފާހަގަ ކުރެވޭ ސްޓައިލަކީ ޕްލީޓް ޑިޒައިނެވެ. އޭނާ ބައިނަލްއަގުވާމީގޮތުން މަގުބޫލުކަން ހޯދާފައިވަނީ 1980ގެ އަހަރުތަކުގައި ޑިޒައިންކުރި ހެދުންތަކުގެ ސަބަބުންނެވެ. އޭނާ ޑިޒައިންކުރާ ހެދުންތަކަކީ އިސްތިރިކުރަން ނުޖެހޭ ގޮތަށް ތައްޔާރުކުރާ ހެދުންތަކެކެވެ.
މިޔާކޭގެ ޑިޒައިންތަކަކީ އޭގެ ދެވަނައެއްނުވާ ޑިޒައިންތަކަށްވުމުން، އޭނާ ތައްޔާރުކުރާ ހެދުންތަކަކީ ފެޝަނަށް ލޯބިކުރާ ފާރަތްތަކުން "ކަލެކްޓް"ކުރާ ހެދުންތަކެކެވެ. އޭނާގެ ބައެއް ހެދުންތައް ލަންޑަނުގެ ވިކްޓޯރިއާ އަދި އަލްބަރޓް މިއުޒިއަމްގައި ބަހައްޓާފައިވާއިރު، އެމެރިކާގެ ނިއުޔޯރކުގައި ހުންނަ މޮޑަރން އާރޓް މިއުޒިއަމާއި ފިލިޑެލްފިއާގައި ހުންނަ މިއުޒިއަމް އޮފް އާރޓްގައިވެސް އޭނާގެ ޑިޒައިންތައް ވަނީ ރައްކާކޮށްފައެވެ.
މިޔާކޭގެ އެންމެ ފާހަގަކޮށްލެވޭ ކަސްޓަމަރަކީ ދުނިޔޭގެ އެންމެ މުއްސަނދި މީހުންގެ ތެރޭގައި ހިމެނޭ ސްޓީވް ޖޮބްސްއެވެ. އެގޮތުންގިނަ ބައެއްގެ ޝައުގުވެރިކަން ދަމައިގަތް، ސްޓީވް ޖޮބްސްގެ ކަޅުކުލައިގެ ޓާޓާލްނެކް ޓީޝާޓަކީ މިޔާކޭ ޑިޒައިންކުރި ޓީޝާޓެކެވެ.
