ދުނިޔޭގައި މިވަގުތު ޑަޔަގްނޯސް ނުކުރެވިވާ އެތައްސަތޭކަ ނުވަތަ އެތައް ހާސް ޕޯލިއޯ ކޭސް ވުމަކީ އެކަށީގެންވާ ކަމެއްކަމަށް އެމެރިކާގެ އިސް ޑޮކްޓަރެއް ވިދާޅުވެއްޖެއެވެ.
އޭނާ މިފަދަ ކަންބޮޑުވުމެއް ފާޅު ކުރައްވާފައިވަނީ އެމެރިކާގެ ރޮކްލަންޑް ކައުންޓީ އިން ޕޯލިއޯ ޖެހިގެން މިދިޔަމަހު މީހަކު ހަށިގަޑުން ވާގިނެތުނު ހާދިސާ އާއި ބެހޭ ގޮތުން ވާހަކަދައްކަވަމުންނެވެ. ބީބީސީ އާއި ވާހަކަ ދައްކަވަމުން ރޮކްލަންޑް ކައުންޓީގެ ހެލްތު ކަމިޝަނަރ ޑޮކްޓަރ ޕެޓްރީޝިޔާ ރުޕަރޓް ވިދާޅުވީ ރޮކްލަންޑް ގައި އަދި އެއަށް ވުރެ ދުރަށް ވެސް މިބަލި ފެތުރިފަ އޮވެދާނެތީ އެކަމުގެ ކަންބޮޑުވުން އެބައޮތް ކަމަށެވެ. މިގޮތުން އޭނާ ވިދާޅުވީ ބަލިވި މީހާގެ ސާމްޕަލްތައް ޖީނޯމް ސީކުއެންސިން ހެދިއިރު ލަންޑަން އަދި ޖެރޫސަލަމް އާއި ހިސާބު ދުރުން ނަޖިސްފެން ޓެސްޓު ކޮށްގެން ލިބުނު ނަތީޖާއާއި އެއްގޮތް ސިފަތަކެއް އެބަހުރި ކަމުގައެވެ. މިއީ މުޅިދުނިޔެއަށް ވެސް ކުރިމަތިވި ވަރަށް ސީރިއަސް މައްސަލަ އެއްކަމަށާއި އެހެން ކަމުން ހުރިހާ ގައުމުތަކަކުންވެސް ވެކްސިން ފުރިހަމަ ކުރުން ވަރަށް ވެސް މުހިންމު ކަމަށް އޭނާ ވިދާޅުވި އެވެ.
ޕޯލިއޯ ވައިރަސްގެ އަސަރު ހަށިގަނޑަށް ކުރި ނަމަވެސް ގިނަ ހާލަތްތަކުގައި އަލާމާތް ނުފެނިދާނެ ކަމަށާއި ހަށިގަނޑުން ވާގިނެތޭ ހިސާބަށް ދަނީ ބަލި ޖެހޭ މީހުން ގެ އެކެއް އިންސައްތައަށް ވުރެވެސް މަދު އަދަދެއް ކަމަށް އޭނާ ވިދާޅުވިއެވެ.
