އިންޑިޔާ ޗައިނާ ބޯޑަރު ކައިރީ ބާއްވާ މިލިޓަރީ ތަމްރީންތަކެއްގައި އެމެރިކާ ސިފައިން ބައިވެރިވަނީ

އިންޑިޔާ ޗައިނާ ގުޅޭ ސަރަހައްދީ އިމާ ސަތޭކަ ކިލޯމީޓަރަށްވުރެވެސް ކައިރީގައި ބާއްވަން ތައްޔާރުވަމުންދާ ޖޮއިންޓް މިލިޓަރީ ތަމްރީނުތަކެއްގައި އެމެރިކާ ސިފައިން ބައިވެރިވާ ގޮތަށް ހަމަޖެހިއްޖެއެވެ.

ފަރުބަދަތައް ފަދަ އުސް ހިސާބުތަކުގައި ހަނގުރާމައިގެ ކަންކަން ކުރިޔަށް ގެންދާނެ ގޮތުގެ ތަމްރީނު ދިނުމަށް ބާއްވާ މިލިޓަރީ ޑްރިލްތައް އޮންނާނީ އޮކްޓޯބަރުމަހުގެ މެދެއްހާ ހިސާބުގައި އުއްތަރަޚާންދުގެ، 10 ހާހެއްހާ ފޫޓު އުސް ހިސާބެއްގައެވެ. ތަމްރީންތައް ބާއްވާ އުއްތަރަކާންދުގެ އައުލީއަކީ އިންޑިޔާ އާއި ޗައިނާ ވަކިކުރާ ލައިން އޮފް އެކްޗުއަލް ކޮންޓްރޯ އާއި 95 ކިލޯމީޓަރެއްހާ ދުރުގައިވާ ތަނެކެވެ. ތަމްރީންތައް ކުރިޔަށް ދާނީ "ވޯ ޕްރެކްޓިސް" ނުވަތަ ހަގުރާމަޔަށް ފަރިތަކުރުން މިނަމުގައި ހިންގާ ޖޮއިންޓު ތަމްރީނުތަކެއްގެ 18 ވަނަ އެޑިޝަންގެ ގޮތުގައެވެ.

އިންޑިޔާ އާއި ޗައިނާގެ ސިފައިން ހިމާލިޔާ ފަރުބަދަ މަތީގެ ސަރަހައްދެއްގައި 2020 ވަނަ އަހަރުގެ ޖޫން މަހު ހަމަލާތަކެއް ބަދަލު ކުރި ފަހުން ދެގައުމު ދެމެދު ގުޅުންތައް ވަނީ ގޯސް ވެފައެވެ. އެފަހަރުގެ ހަމަލާތަކުގައި އިންޑިޔާގެ ވިހި ސިފައިން އަދި ޗައިނާގެ ހަތަރު ސިފައިން މަރުވެފައި ވެއެވެ. ބޯޑަރާ ޖެހިގެން އޮންނަ ޕަންގޮންގ ސާއޯ ލޭކް ހުރަސްކޮށް ޗައިނާއިން ދާދި ފަހުން ބްރިޖް އެއް އެޅުމާއި ގުޅިގެން ދެގައުމު ދެމެދު ގުޅުންތައް ވަނީ އިތުރަށް ގޯސް ވެގެން ގޮސްފައެވެ. އިންޑިޔާއިން ބުނަނީ ޗައިނާއިން އެގޮތަށް އެކަން ނުކުރެވޭނެ ކަމަށާ އެއީ ގާނޫނުތަކާ ޚިލާފަށްކޮށްފައިވާ ކަމެއް ކަމުގައެވެ.

ދެބަސްވުން އުފެދިފައިވާ އިމާ އެހާގާތުގައި ޗައިނާއިން މިލިޓަރީ ގޮތުން "ހަންފަތުރަމުން" ގެންދާތީ އެމެރިކާގެ އާމީ ޕެސިފިކް ކޮމާންޑިންގ ޖެނެރަލް ޗާލްސް ފްލިން ވެސް ވަނީ އެއީ ކަންބޮޑުވާ ކަމެއް ކަމަށް ވިދާޅުވެފައެވެ. އެމެރިކާ އާއި ގުޅިގެން ތަމްރީންތައް ހިންގަނީ ކީއްވެތޯ ސުވާލު ކުރެވުމުން ފްލިން ވިދާޅުވީ އެއީ މިނިވަން އިންޑޯ ޕެސިފިކް ރީޖަނެއްކަން ޔަގީން ކުރުމަށްޓަކައި އެންމެ މުހިންމު އެއް ތަމްރީންތައް ކަމުގައެވެ.

އިންޑިޔާ ޗައިނާ ލައިން އޮފް ކޮންޓްރޯލް އަކީ 1962 ވަނަ އަހަރު އެދެގައުމު ދެމެދު ބޯޑަރުގެ މައްސަލައިގައި ކުރެވުނު ހަނގުރާމަޔަށް ފަހު ކަނޑައެޅުނު ސަރަހައްދެކެވެ. ނަމަވެސް އުސް ހިސާބުތަކުގައި އަދިވެސް ދެގައުމު ވަކިވާ ރޮނގެއް ކަނޑައެޅިފައި ނުވާކަމަށް ވެއެވެ.

މިވަގުތު އިންޑިޔާ އާއި ޗައިނާއާ ދެމެދު ހަގުރާމައެއް ފެށިއްޖެނަމަ ހާލަތު ވަރަށް ގޯސްވެގެން ހިނގައިދާނެ ކަމަށް ބެލެވެއެވެ. އެހެނީ ދެގައުމުގަވެސް ނިއުކްލިއަރ ހަތިޔާރު ހުރީތީއެވެ.