އެއްޖިންސުން ގުޅުން ހިންގިކަމުގެ ތުހުމަތުގައި ޤުރުއާނާ ބެހޭ މަރުކަޒުގެ މުޝީރު މަޤާމުން ވަކިކޮށްފި
އިބްރާހިމް ރާފިއު މަޤާމުން ވަކިކޮށްފައިވަނީ އާދިއްތަ ދުވަހު
ކީރިތި ޤުރުއާނާބެހޭ މަރުކަޒުގެ މުޝީރުގެ މަޤާމުގައި ހުންނެވި އިބްރާހިމް ރާފިއު
އެއްޖިންސުން ގުޅުން ހިންގިކަމުގެ ތުހުމަތުގައި ޤުރުއާނާ ބެހެ މަރުކަޒުގެ މުޝީރު މަޤާމުން ވަކިކޮށްފިއެވެ.
ކީރިތި ޤުރުއާނާބެހޭ މަރުކަޒުގެ މުޝީރުގެ މަޤާމުގައި ހުންނެވި އިބްރާހިމް ރާފިއު މަޤާމުން ވަކިކޮށްފައިވަނީ އާދިއްތަ ދުވަހުއެވެ. އެއީ ބަންގްލަދޭޝްގެ ރައްޔިތެއްކަމަށްވާ އެމްޑީ އަލަމްގީރްއާއެކު ބަދުއަޚުލާޤީ އަމަލު ހިންގާ މަންޒަރު ފެންނަ ވީޑިއޯއެއްގެ މައްސަލައިގައެވެ. އެ ވީޑިއޯ ހޯމަ ދުވަހުގެ ވަގުތެއްގައި ވަނީ ސޯޝަލް މީޑިއާގައި އާންމުވެފައެވެ.
ކުރިން ލީކުވި ވީޑިއޯތަކުގެ މައްސަލައިގައި ނޮޅިވަރަމް ދާއިރާގެ ކުރީގެ މެމްބަރު މުހައްމަދު ނަޝީދު (ކާނަލް)އާއި ކުރީގެ ރައީސް މުހައްމަދު ނަޝީދުގެ ކޮއްކޮ، ގާނޫނީ ވަކީލު ނާޒިމް ސައްތާރު، އަދި ޑްރަގް އެންޑް އެންފޯސްމަންޓް (ޑީއީޑީ)ގައި މަސައްކަތްކުރާ ފުލުހަކު ހައްޔަރުކޮށް، އެ މައްސަލަތައް އަންނަނީ ތަހުގީގު ކުރަމުންނެވެ.
އޭގެ އިތުރުންވެސް، އެއްޖިންސުން ގުޅުން ހިންގި މައްސަލައާ ގުޅިގެން ޓީޗަރުންތަކަކާއި، ހޯމް މިނިސްޓްރީގެ މުވައްޒަފެއްގެ މައްސަލައެއްވެސް ވަނީ ފެންމަތިވެފައެވެ.
މީގެއިތުރުން ފުލުހުންނަށް ހުށަހެޅިފައިވާ ބްލެކްމެއިލިންގގެ މައްސަލައެއްވެސް ތަހުގީގުކުރަމުންދާކަން ފުލުހުންވަނީ ހާމަކޮށްފައެވެ.
މި މައްސަލައިގައި ހިމެނޭ މީހުން ހައްޔަރުކުރުން ލަސްވެގެން ފުލުހުންނަށް އާންމު ރައްޔިތުންގެ ފާޑުކިޔުން ވަނީ އަމާޒުވެފައެވެ. މިކަމާ ގުޅިގެން ފުލުހުން ބުނެފައިވަނީ، ލީކްވި ވީޑިއޯތަކުގައި ފެންނަކަމަށް ތުހުމަތުކުރެވޭ މީހުން ހައްޔަރުކުރުމަށް ވަގުތު ނެގީ ބައެއް ފަރާތްތަކުން އެޑިޓްކޮށްގެން ފޮޓޯތައް ދައުރު ކުރަމުން ގޮސްފައިވާތީ، އިތުރަށް ބަލަންޖެހޭ ކަންކަން ހުރުމުންކަމަށެވެ.
