ނިއު މެކްސިކޯގައި މުސްލިމުން މެރުން: ބައިޑެން ވިދާޅުވީ އެމަނިކުފާނު ހުންނެވީ މުސްލިމުންނާއެކު ކަމަށް

އެމެރިކާގެ ސްޓޭޓެއް ކަމަށްވާ، ނިއު މެކްސިކޯގައި މުސްލިމުންނަށް ޓާގެޓުކޮށްގެން ދެމުން އަންނަ ހަމަލާތައް ކުށްވެރިކުރައްވައި މުސްލިމުންނާއެކު ހުންނެވިކަމަށް އެމެރިކާގެ ރައީސް ޖޯ ބައިޑެން ވިދާޅުވެއްޖެއެވެ.

ބައިޑެން މިހެން ވިދާޅުވީ ނިއުމެކްސިކޯގައި ހަތަރު މުސްލިމުން މަރާލުމާއި ގުޅިގެން ކުރެއްވި ޓްވީޓް އެއްގައެވެ. އެ ޓްވީޓުގައި އެ ހަމަލާތަކާ ގުޅިގެން ކަންބޮޑުވެވަޑައިގަންނަވާ ކަމަށާއި ތަހުގީގުތައް ކުރިއަށްދާ ކަމަށް އެމަނިކުފާނު ވިދާޅުވިއެވެ. އަދި އެމަނނިކުފާނު ހުންނެވި މުސްލިމުންނާ އެކުގައި ކަމަށާއި އެފަދަ ހަމަލާތަކަށް އެެމެރިކާގައި ޖާގައެއް ނެތް ކަމަށް ވެސް ބައިޑެން ވަނީ ވިދާޅުވެފައެވެ.

ނިއު މެކްސިކޯގައި މުސްލިމުންނަށް އަމާޒު ކޮށްގެން ދެމުން އަންނަ ހަމަލާތަކުގައި މިހާތަނަށް 4 މުސްލިމް ފިރިހެނުން ވަނީ މަރާލާފައެވެ. މި ހަމަލާތައް މީގެ 9 މަސް ކުރިން ފަށާފައިވާ ކަމަށާއި މިއީ ވަކި ދީނަކަށް ނިސްބަތްވާތީ އާއި ވަކި ނަސްލަކަށް ނިސްބަތްވާތީ ދެމުން އަންނަ ހަމަލާތަކެއް ކަމަށް އެމެރިކާގެ ފުލުހުންނާ ހަވާލާދީ ރޮއިޓަރސްގައި ވަނީ ބުނެފައެވެ.

މި ހަމަލާތަކުގައި ދެ މީހަކު މަރާލާފައިވަނީ އެއް މިސްކިތެއްގެ ތެރެއިންނެވެ. މި އެންމެންވެސް މަރާލާފައިވަނީ ބަޑިޖަހައި ކަމަށް ރޮއިޓަރސް އިން ރިޕޯޓް ކުރެއެވެ.

ނިއުމެކްސިކޯގައި މި ހަަމަލާތައް ދެމުން އަންނަނީ އެ ސްޓޭޓްގެ އަލްބަކާކީ ސަރަހައްދުގައެވެ. އެ ސްޓޭޓްގެ ގަވަރނަރ މިޝެލް ލުޖަން ގްރިޝަމް ވެސް ވަނީ މުސްލިމުންނާ ދެކޮޅަށް އެ ސްޓޭޓުގައި ދެމުން އަންނަ ހަމަލާތައް ކުށްވެރިކުރައްވާފައެވެ.

މި ހަމަލާތައް ތަހުގީގު ކުރުމަށް އެމެރިކާގެ ނިއު މެކްސިކޯ ސްޓޭޓްގެ ފުލުހުންނާއި އެފްބީއައި އާއި ޔޫއެސް މަރޝަލްސް ސަރވިސް އިން އަންނަނީ ގުޅިގެން މަސައްކަތް ކުރަމުންނެވެ.