ރާއްޖޭގެ ކަނޑުގެ ސަރަހައްދު ވައިގެ މަގުން ބަލަހައްޓަން ފަށަންޖެހޭ: ޑރ. ހުސައިން
7 އޯގަސްޓު 2022 | އާދީއްތަ 13:12ކަނޑުގެ ސަރަހައްދުގެ ސަލާމަތާއި ގައުމުގެ ސަލާމަތާ ވަނީ ގުޅިފައި
"ނޭޭޝަނަލް މެރިޓައިމް ސެކިޔުރިޓީ ސްޓްރެޓެޖީ"އާއި "ޑިފެންސް ވައިޓް ޕޭޕަރ"އާ ބެހޭގޮތުން ސްޓޭކްހޯލްޑަރުންނަށް ބޭއްވި ފޯރަމްގެތެރެއިން
ރާއްޖޭގެ ސަލާމަތާއި ރައްކާތެރިކަން ކަށަވަރުކުރުމަށް, ވައިގެ މަގުން ރާއްޖޭގެ ކަނޑުގެ ސަރަހައްދު ބަލަހައްޓަން ފަށަންޖެހޭކަމަށް, ފިޝަރީޒް މިނިސްޓަރ ޑރ. ހުސައިން ރަޝީދު ހަސަން ވިދާޅުވެއްޖެއެވެ،
ޑިފެންސް މިނިސްޓްރީން ހުށަހަޅާ "ނޭޭޝަނަލް މެރިޓައިމް ސެކިޔުރިޓީ ސްޓްރެޓެޖީ"އާއި "ޑިފެންސް ވައިޓް ޕޭޕަރ"އާ ބެހޭގޮތުން ސްޓޭކްހޯލްޑަރުންނާއެކު ބޭއްވި ބައްދަލުވުން ފެށުމަށް ބޭއްވި ރަސްމިއްޔާތުގައި އެމަނިކުފާނު ވަނީ، ރާއްޖެއަކީ ކަނޑުގެ ސަރަހައްދު ބޮޑު ގައުމަކަށް ވުމާއެކު، ރާއްޖޭގެ ސަލާމަތާއި ކަނޑުގެ ސަލާމަތާ އޮތީ ވަރަށް ބޮޑަށް ގުޅިފައިކަމަށް ވިދާޅުވެފައެވެ. ރާއްޖޭގެ ކަނޑުގެ ސަރަހައްދަށް ވަނުމަށް ބޭރުގެ މަސްވެރިންނަށްވެސް ފުރުސަތު ނުދެނީ، ރައްކާތެރިނޫންގޮތުގައި މަސްވެރިކަންކުރުމުގެ ފުރުސަތު ނުދިނުމަށާއި، ސަލާމަތީ ސަބަބުތަކާހުރެކަމަށް އޭނާ ވަނީ ވިދާޅުވެފައެވެ. މީގެ އިތުރުން ރާއްޖޭގެ ކަނޑުގެ ސަރަހައްދަށް ގަވައިދާޚިލާފަށް ވަންނަ ބައެއް އުޅަނދުތަކަކީ މަސްވެރި އުޅަނދުތައްކަމަށް ބުނިނަމަވެސް، އެފަދަ މައްސަލަތަކުގައި ސުވާލު އުފެދޭކަންކަން ހުރިކަމަށް އޭނާ ވިދާޅުވިއެވެ. އެގޮތުން އެފަދަ އުޅަނދުތަކުން މަސް ބާނާފައި ހުންނަނީ ވަރަށް މަދުންކަމަށާއި، އެއީ ސުވާލުއުފެދޭކަމެއް ކަަމަށް މިނިސްޓަރ ވިދާޅުވިއެވެ. އެފަދަ އުޅަނދުތައް ރާއްޖޭގެ ސަރަހައްދަށް ވަންނަ ހަގީގީ ބޭނުމަކީ މަސްތުވާތެތީގެ ވިޔަފާރިކުރުންފަދަ ކަންކަމަށްވުން އެކަށީގެންވާކަމަށާއި، އެފަދަ ކަންކަން ވަރަށް ރަނގަޅަށް ބެލެންޖެހޭކަމަށް މިނިސްޓަރ ވިދާޅުވިއެވެ.
އެ ފޯރަމްގައި ރާއްޖޭގެ ކަނޑުތައް ބެލެހެއްޓުމުގައި ދިމާވާ މައްސަލަތަކާއި ގަވައިދާޚިލާފަށް ރާއްޖޭގެ ކަނޑަށް ވަންނަ ކަނޑުގެ އުޅަނދުތަކުގެ މައްސަލަތަކާ ގުޅޭގޮތުން ވަނީ މަޝްވަރާކޮށްފައެވެ. އަދި ރާއްޖޭގެ މެރިޓައިމް ސެކިއުރިޓީ ސްޓްރެޓެޖީއެއް އެކުލަވާލުމާ ގުޅޭގޮތުން އެ ފޯރަމްގައި މަޝްވަރާކުރިއެވެ. އޭގެ ތެރޭގައި ރާއްޖޭގެ ދިފާއީ ކަންކަން ބަލަހައްޓަން ވަސީލަތްތައް ބޭނުންކުރާނެގޮތާއި، ސަރަހައްދީ އަދި ބައިނަލްއަގުވާމީގޮތުން ކުރާ މަސައްްކަތްތައް އެއްބާރުލުން ދިނުމާ ގުޅޭގޮތުން ހިމެނެއެވެ.
