އެމް.އެން.ޕީގެ އެތެރޭގެ އިންތިޚާބުގައި 185 މަޤާމަކަށް 196 ފަރާތަކުން ކުރިމަތިލި
ޤައުމީ ހިންގާ ކައުންސިލްގެ މަޤާމުތަކުގެ ތެރެއިން އިންތިޚާބު ބާއްވަންޖެހެނީ 5 މަޤާމަކަށް
އެމްއެންޕީން ބޭއްވި ނޫސްވެރިންގެ ބައްދަލުވުމުގެ ތެރެއިން
މޯލްޑިވްސް ނޭޝަނަލް ޕާޓީ (އެމް.އެން.ޕީ)ގެ އެތެރޭގެ އިންތިޚާބުގައި 185 މަޤާމަކަށް 196 ފަރާތަކުން ކުރިމަތިލިކަމަށް އެޕާޓީން ބުނެފިއެވެ.
އެމް.އެން.ޕީގެ ޤައުމީ ހިންގާ ކައުންސިލްގެ އިންތިޚާބު ބޭއްވުމަށް ހަމަޖެހިފައިވަނީ އޮގަސްޓް މަހުގެ 6 ވަނަ ދުވަހުއެވެ. އިންތިޚާބާ ގުޅޭ އެންމެފަހުގެ މައުލޫމާތު ދެއްވަމުން އެންއެންޕީގެ އިންތިޚާބީ ކޮމިޓީގެ ރައީސް އަޙްމަދު އަމްޖަދު ވިދާޅުވީ 180 މަޤާމަކަށް ކުރިމަތިލާފައިވަނީ ކޮންމެ މަޤާމަކަށް 1 މެންބަރު ކަމަށެވެ. އެމްއެންޕީގެ އިންތިޚާބީ ޤަވާއިދުގެ 17 ވަނަ މާއްދާގެ (ށ) ގައި ވަނީ އެއް މަޤާމަކަށް އެންމެ ކެނޑިޑޭޓެއް ކުރިމަތިލާފައިވާނަމަ، އެމެންބަރަކު އެމަޤާމަކަށް ހޮވުނީ ކަމުގައެވެ. އެހެންކަމުން އަމުޖަދު ވިދާޅުވީ 180 މަޤާމަކަށް ކުރިމަތިލާފައިވަނީ ކޮންމެ މަޤާމަކަށް 1 މެންބަރު ކަމަށް ވާތީ، އެ 180 މަޤާމަށް ކުރިމަތިލީ މެންބަރުން އިންތިޚާބަކާ ނުލާ ހޮވިފައިފައިވާ ކަމުގައެވެ.
އަމްޖަދު ވިދާޅުވީ، އެމްއެންޕީގެ ޤައުމީ ހިންގާ ކައުންސިލްގެ މަޤާމުތަކުގެ ތެރެއިން އިންތިޚާބު ބާއްވަންޖެހެނީ 5 މަޤާމަކަށްކަމަށެވެ. އެގޮތުން 6 އޮގަސްޓް ވާ ހޮނިހިރު ދުވަހު އިންތިޚާބުކުރަން ޖެހެނީ ޖުމްލަ 5 މަޤާމެކެވެ. އެއީ؛
އެމްއެންޕީގެ އެތެރޭގެ އިންތިޚާބުގެ ވޯޓު ފޮށިތަށް ބެހެއްޓުމަށް ހަމަޖެހިފައިވަނީ އެމްއެންޕީގެ 50 މެންބަރުން ހަމަވާ ރަށްރަށުގައެވެ. މިގޮތުން 54 ރަށެއްގައި ވޯޓު ފޮށި ބެހެއްޓުމަށް ވަނީ ނިންމާފައެވެ. އަދި އިންތިޚާބުގައި ވޯޓުލާނީ ކަރުދާސް ބޭނުންކޮށްގެންނެވެ. މިރަށްރަށުގައި ވޯޓުލުން ކުރިޔަށްދާނީ 6 އޮގަސްޓް ވާ ހޮނިހިރު ދުވަހު ހެނދުނު 8:00 އިން ފެށިގެން އެދުވަހު ހަވީރު 4:00 އަށެވެ.
ކޮންމެ ފޮއްޓަކަށް ވޯޓްލާ ނިމުމުން، އެވޯޓް ފޮއްޓަކާ ހަވާލުވެ ތިއްބަވާ އޮފިޝަލުން އަދި އޮބްޒާވަރުންގެ ހާޒިރުގައި ވޯޓު ގުނައި އެމަރުކަޒެއްގައި އެފޮއްޓެއްގެ ވަގުތީ ނަތީޖާ އިއުލާންކުރަން ވަނީ ހަމަޖެހިފައެވެ. އަދި މުޅި އިންތިޚާބުގެ ވަގުތީ ނަތީޖާ ވޯޓްލާ ނިމޭ ގަޑިން ފެށިގެން 24 ގަޑިއިރު ތެރޭގައި އިއުލާން ކުރެވޭނެއެވެ. އަދި އިންތިޚާބުގެ ދާއިމީ ނަތީޖާ 7 ދުވަސް ތެރޭގައި އިއުލާން ކުރެވޭނެ ކަމަށް އެމް.އެން.ޕީއިން ބުނެއެވެ.
