އިންޑޯ-ޕެސިފިކް އެންވަޔަރަމަންޓް ސެކިޔުރިޓި ފޯރަމްގެ ބައިވެރިން ހުރާއަށް ޒިޔާރަތްކޮށްފި
21 ޤައުމަކުން ޖުމްލަ 100ށްވުރެ ގިނަ މަންދޫބުން ފޯރަމްގައި ބައިވެރިވޭ
އިންޑޯ-ޕެސިފިކް އެންވަޔަރަމަންޓް ސެކިޔުރިޓި ފޯރަމްގެ ތެރެއިން
ޔުނައިޑެޓް ސްޓޭޓްސް އިންޑޯ ޕެސިފިކް ކޮމާންޑްއާއި، މޯލްޑިވްސް ނޭޝަނަލް ޑިފެންސް ފޯސްއިން ގުޅިގެން ރާއްޖޭގައި ކުރިއަށްގެންދާ "އިންޑޯ-ޕެސިފިކް އެންވަޔަރަމަންޓް ސެކިޔުރިޓީ ފޯރަމް 2022" ގެ ބައިވެރިން، ކ. ހުރާއަށް ޒިޔާރަތްކޮށްފިއެވެ.
21 ޤައުމަކުން ޖުމްލަ 100ށްވުރެ ގިނަ މަންދޫބުން ބައިވެރިވެގެން ކުރުނބާ މޯލްޑިވްސްގައި ބާއްވަމުންދާ ތިމާވެށީގެ މި ފޯރަމްގެ ބައިވެރިން އޮގަސްޓް 2 ވަނަ ދުވަހު ކ. ހުރަ ޔަށް ކުރި މި ޒިޔާރަތަކީ، ދިވެހިރާއްޖޭގެ ރަށްފުށުގެ ހާލަތު ބަލާލުމުގެ ގޮތުން ކުރި ޒިޔާރަތެކެވެ. މި ޒިޔާރަތުގައި، ފޯރަމްގެ ބައިވެރިން ވަނީ، މޫސުމީ ބަދަލުތަކުގެ ސަބަބުން ރާއްޖޭގެ ރަށްތަކަށް ކުރިމަތިވާ ގޮންޖެހުންތައް ހުރި މިންވަރު ދެނެގަނެ، ތިމާވެށީގެ ގޮންޖެހުންތަކުން އަރައިގަތުމަށް ޤައުމީ ފެންވަރުގައި ދިވެހިރާއްޖެއިން ކުރަމުންދާ މަސައްކަތްތަކާ ގުޅޭގޮތުން މަޢުލޫމާތު ހޯދާފައެވެ.
ފޯރަމްގެ ބައިވެރިން ހުރާއަށް ކުރި ދަތުރުގައި އެ ރަށުގެ އިން ސައިޓް ވިޒިޓް ލޮކޭޝަންސް ތަކުގެ ގޮތުގައި ހަަތަރު ސަރަހައްދަކަށް ޒިޔާރަތްކުރިއެވެ. އޭގެތެރޭގައި، މޫސުމީ ބަދަލުތަކުގެ ސަބަބުން ހުރާއަށް ރަށް ގިރުމާ ކުރިމަތިވެފައިވާ ސަރަހައްދާއި، ކުޅި އަދި ކަނޑޫފާ ހިމެނޭ ސަރަހައްދާއި، ކަރަންޓާއި ފެން އުފެއްދުމުގެ ޕްލާންޓްތައް ބެހެއްޓިފައިވާ ސަރަހައްދު އަދި ކުނި މެނޭޖްކުރުމަށް ބޭނުންކުރަމުންދާ ސަރަހައްދަށް ޒިޔާރަތްކޮށްފައިވެއެވެ. ބައިވެރިން އެ ސަރަހައްދުތަކަށް ކުރި ޒިޔާރަތުގައި، އެ ސަރަހައްދުތަކުގައި ކަންކަން ރޭވިފައިވާ ގޮތާއި، ދިމާވެފައިވާ ގޮންޖެހުންތަކާ ގުޅޭގޮތުން މަޢުލޫމާތު ހޯދާފައިވެއެވެ.
މި ދަތުރުގައި، ހުރާގެ ސްކޫލު ދަރިވަރުންގެ ފަރާތުން ފޯރަމްގެ ބައިވެރިންނަށް ކަލްޗަރަލް ހަރަކާތްތަކެއް ދައްކާލުމުގެ އިތުރުން، ފޯރަމްގެ ބައިވެރިންގެ ފަރާތުން ހުރާ ސްކޫލަށް ފޮތްތަކެއް ހަދިޔާކުރުން އޮތެވެ. އަދި، ރާއްޖޭގެ ލޯކަލް ޓުއަރިޒަމް ޕްރޮމޯޓްކުރުމުގެ ގޮތުން، ފޯރަމްގެ ތެރޭގައި ކ.ހުރާގެ ގެސްޓް ހައުސްތައް އިސްތިހާރުކުރުމާއި، ފަތުރުވެރިކަމާ ގުޅުންހުރި ބައެއް ސްވެނިއަރ ފަދަ ތަކެތި ފޯރަމްގައި ވިއްކުމަށް ވަނީ ބަހައްޓާފައެވެ.
ކުރުނބާ މޯލްޑިވްސްގައި، އޮގަސްޓް 1 އިން 4 އަށް ކުރިއަށްގެންދާ އިންޑޯ-ޕެސިފިކް އެންވަޔަރަމަންޓް ސެކިއުރިޓީ ފޯރަމްއަކީ ސަރަޙައްދުގެ ތިމާވެއްޓާ ގުޅުންހުރި ކަންކަމުގެ ތެރެއިން އަންނަ މޫސުމީ ބަދަލުތަކާ ގުޅޭގޮތުން މި ސަރަހައްދުގެ އެންމެ މަތީފެންވަރުގެ މަޝްވަރާތައް ކުރިއަށް ގެންދިއުމަށް ޓަކައި ޔޫއެސްގެ އިންޑޯ-ޕެސިފިކް ކޮމާންޑުގެ ފަރާތުން އިސްނަގައިގެން އަހަރަކު އެއްފަހަރު މި ސަރަޙައްދުގެ ކޮންމެވެސް އެއް ޤައުމަކުން ހޯސްޓްކުރާ ގޮތަށް ބާއްވަމުންގެންދާ ފޯރަމްއެކެވެ.
މި އަހަރުގެ ފޯރަމް ހޯސްޓްކުރާ ޤައުމުގެ ހައިސިއްޔަތުން، ދިވެހިރާއްޖެ ތަމްސީލުކުރާ ތިމާވެއްޓާ ގުޅުންހުރި އިދާރާތަކުން ނޮމިނޭޓްކުރެވިފައިވާ 24 މަންދޫބުން ވެސް މި ފޯރަމްގައި ބައިވެރިވެލައްވައެވެ. ކޮންމެ އަހަރަކު ބާއްވަމުންދާ މި ފޯރަމް، އެންމެ ފަހުން ދިވެހިރާއްޖޭގައި ބާއްވާފައިވަނީ 2014 ވަނަ އަހަރުއެވެ. ކޮވިޑުގެ ޚާއްޞަ ހާލަތާ ގުޅިގެން ވޭތުވެދިޔަ ދެ އަހަރު މި ފޯރަމް ބޭއްވިފައިވަނީ ވަރޗުއަލްކޮށެވެ.
މިއަހަރުގެ ފޯރަމްގެ ސެޝަންތައް ފަރުމާކޮށްފައިވަނީ އެ ދުވަހަކަށް ކަނޑައެޅިފައިވާ ތީމާ ގުޅޭ ގޮތަށެވެ. އެގޮތުން މިއަހަރުގެ ފޯރަމްގެ ދުވަސްތައް ބަހާލާފައިވާ ތީމްތަކަކީ، "ކްލައިމެޓް ސެކިއުރިޓީ ޗެލެންޖެސް އެންޑް ޑިފެންސް ފޯސެސް"، "ސްމޯލް އައިލެންޑް ނޭޝަންސް ކޮންސާންސް"، "އޯޝަން އެންޑް ވޯޓަރ ސެކިއުރިޓީ" އަދި "ކްލައިމެޓް ޗޭންޖް އިމްޕެކްޓް އެންޑް ސޮލިއުޝަންސް" އެވެ.
މި ފޯރަމްގެ ތެރެއިން، ފޯމަލް ސެޝަންތަކާއި، ޕެނަލް ޑިސްކަޝަންތަކާއި، ވޯކިންގ ގުރޫޕް ޑިސްކަޝަންތައް ފުޅާ ދާއިރާއެއްގައި ކުރިއަށްގެންދަން ހަމަޖައްސާފައިވާއިރު، ތިމާވެށްޓަށް އަންނަ ނާޒުކު ބަދަލުތަކާ ގުޅިގެން ކުރިމަތިވާ މޫސުމީ ބޮޑެތި ގޮންޖެހުންތައް ދެނެގަނެ، ސަރަހައްދީ ފެންވަރުގައި އެކަމަށް ގެނެވިދާނެ ހައްލުތަކާ ގުޅޭގޮތުން މަޝްވަރާކޮށް، ތިން އަހަރު ދުވަހުގެ ތަރައްޤީގެ ޕްލޭނެއް ތައްޔާރުކުރުމަށް ވަނީ ހަމަޖެހިފައެވެ.
މި ފޯރަމްގެ ތެރެއިން ދިވެހިރާއްޖޭގެ ފަތުރުވެރިކަމުގެ ސިނާޢަތު އިސްތިހާރު ކުރާގޮތަށް ވެސް ވަނީ ހަމަޖެހިފައެވެ. މިގޮތުން، މި ފޯރަމްގެ ތެރެއިން، ދިވެހިރާއްޖޭގެ ކަނޑުފަޅުތަކުގެ މަޢުލޫމާތު ފޯރުކޮށްދިނުމުގެ އިތުރުން، ފޯރަމް ކުރިއަށްގެންދާ ހޯލްގެ ސައިޑް ސްކްރީނުތަކުން އަދި ބްރޭކް ގަޑިތަކުގައި މެއިން ސްކްރީނުން ދިވެހިރާއްޖޭގެ ޤުދުރަތީ ރީތިކަން ދައްކުވައިދޭ ޕްރޮމޯޝަނަލް ޑޮކިއުމަންޓްރީތައް ޑިސްޕްލޭކޮށް، ރާއްޖޭގެ ފަތުރުވެރިކަން އިސްތިހާރުކުރާ ގޮތަށް ވަނީ ހަމަޖެހިފައެވެ.
މި ފޯރަމްގެ ތެރެއިން މޫސުމީ ބަދަލުތަކާ ގުޅިގެން ކުރިމަތިވަމުންދާ ގޮންޖެހުންތައް ދެނެގަނެ، އެކަމަށް ސަރަޙައްދީ ފެންވަރުގައި ހައްލުކުރުމަށް ކުރެވިދާނެ ކަންކަން ފައިނަލް ކުރުމުގެ އިތުރުން، ފޯރަމްގެ ބައިވެރިންނަށް ކަމާބެހޭ ދާއިރާތަކުގެ މާހިރުންނާ ސީދާ ބައްދަލުވެ، ދިމާވާ ވަކިވަކި ކަންކަން ހައްލުކުރުމަށް ކަންތައްތަކެއް ކުރެވިގެންދާނެ ގޮތްތައް ދެނެގަތުމަށްޓަކައި ހޯދަންޖެހޭ ލަފަޔާއި އިރުޝާދު ހޯދުމުގައި މަގުފަހިކުރެވޭނެއެވެ.
