ޔާމީނަކީ އިތުބާރު ގެއްލި ފެއިލްވެފައިވާ ވެރިއެއް – ދުންޔާ މައުމޫން

ކުރީގެ ރައީސް އަބްދުﷲ ޔާމީންއަކީ ރައްޔިތުންގެ އިތުބާރު ގެއްލި ފެއިލްވެފައިވާ ވެރިއެއްކަމަށް އެމަނިކުފާނުގެ ކެބިނެޓުގައި ހާރިޖީވަޒީރުކަން ކުރެއްވި ދުންޔާ މައުމޫން ވިދާޅުވެއްޖެއެވެ.

ދުންޔާ މިހެން ވިދާޅުވެފައިވަނި ވީޑިއޯ މެސެޖެއްގައެވެ. މި ވީޑިއޯ މެސެޖު ޓްވިޓާގައި ހިއްސާކުރައްވާފައިވަނީ ދުންޔާ މިހާރު ނިސްބަތްވާ މޯލްޑިވްސް ނެޝަނަލް ޕާޓީގެ ލީޑަރު އަދި ދަނގެތި ދާއިރާގެ މެންބަރު ރިޓަރޔާޑް ކާނަލް ނާޒިމެވެ.

Advertisement

ރައީސް ޔާމީންގެ ވެރިކަމުގައި ހާރިޖީވަޒީރުކަން ވެސް ކުރެއްވި އަދި ރައީސް ޔާމީނަށް ބޮޑުބޭބޭ ވިދާޅުވާ ދުންޔާގެ ވީޑިއޯ މެސެޖްގައި ވިދާޅުވީ ނިމިގެންދިޔަ 2 ވެރިކަން ކުރެއްވި ރައީސް އަބްދުﷲ ޔާމީން އަދި ރައީސް ޑރ. މުހައްމަދު ވަހީދު ހަސަން މަނިކު ވަނީ ރައްޔިތުންގެ ކުރިމަތީގައި ފެއިލްވެފައި ކަމަށެވެ. އަދި ރައްޔިތުންގެ އިތުބާރު ރައީސް ޔާމީންގެ ސަރުކާރަށް ވެސް އަދި ރައީސް ވަހީދުގެ ސަރުކާރަށް ވެސް ވަނީ ގެއްލިފައި ކަމަށެވެ.

އެމްއެންޕީގެ ލީޑަރު ނާޒިމް ވިދާޅުވެފައިވާ ފަދައިން ރައީސް ޔާމީންގެ ވެރިކަން އަދި ހުދު އެމަނިކުފާނަކީ ގައުމަށް ގައްދާރުވެފައިވާ ބޭފުޅެއްކަމަށް ދުންޔާ ވިދާޅުވިއެވެ. ދުންޔާ ވިދާޅުވީ ރައީސް ޔާމީންގެ ވެރިކަމުގައި ރާއްޖެގައި އެންމެ ބޮޑު ހިޔާނާތުގެ އަމަލުވެސް ފެނިގެންގޮސްފައިވާ ކަމަށާއި، ކޮރަޕްޝަންއާއި އެތަކެއް އެހެން މައްސަލަ ފެންމަތިވި ކަމަށެވެ.

މީގެ އިތުރުން އިދިކޮޅު ލީޑަރުން ހައްޔަރުކޮށް ޖަލަށްލާފައިވާއި އިރު، އެއިރު އޮތީ ބިރުވެރި މާހައުލެއް ކަމަށާއި، އެއީ ދިވެހި ރައްޔިތުންގެ ހަނދާނުގައި ހުންނާނެ ކަމެއް ކަމަށް ދުންޔާ ވިދާޅުވިއެވެ. ދުންޔާ ވިދާޅުވީ ކުރިއަށް އޮތްތަނުގައި އެފަދަ މަންޒަރުތައް ފެނިގެން ނުދާނެކަމުގެ ކަންބޮޑުވުން އެންމެންގެ ވެސް އޮންނަންޖެހޭ ކަމަށެވެ.

ދުންޔާގެ ވީޑިއޯ މެސެޖާއެކު ނާޒިމް ކުރެއްވި ޓްވީޓް ރީޓްވީޓް ކުރައްވާ ދުންޔާ ވިދާޅުވެފައިވަނި އެއީ ތެދު ކަމަށެވެ. ޔާމީންގެ ރުޅިވެރިކަމާއި އަނިޔާވެރިކަން ފެނިވަޑައިގެންނެވި ކަމަށާއި، އެތައް އާއިލާތަކަށް އެކަން ފެނުނު ކަމަށެވެ. އޭގެ ތެރޭގައި ނާޒިމްގެ އާއިލާ އަދި ހުދު ދުންޔާގެ އާއިލާވެސް ހިމެނޭ ކަމަށް ވިދާޅުވިއެވެ. ދުންޔާ ވިދާޅުވީ އެއީ ހިތްދަތި ދުވަސްތަކެއް ކަމަށެވެ.