ހާހެއްހާ ބައިވެރިންނާއެކު ކޮވިޑަށްފަހު ރާއްޖޭގައި ބާއްވާ އެންމެ ބޮޑު އެގްޒިބިޝަން ބާއްވަނީ

ހާހެއްހާ ބައިވެރިންނާއެކު ރާއްޖޭގައި ކޮވިޑް-19އިގެ ބަލިމަޑުކަމަށް ފަހު ބާއްވާ އެންމެ ބޮޑު ފެއަރ، ފުޑް އެންޑް ހޮސްޕިޓަލިޓީ އޭޝިއާ މޯލްޑިވްސް އިންޓަރނެޝަނަލް އެގްޒިބިޝަން އެންޑް ކަލިނަރީ ޗެލެންޖު ބާއްވަން ތައްޔާރުވެއްޖެއެވެ.

ފުޑް އެންޑް ހޮސްޕިޓަލިޓީ އޭޝިއާ މޯލްޑިވްސް (ފެމް) އިން އިންތިޒާމުކޮށްގެން ބާއްވާ މި އެގްޒިބިޝަން ބޭއްވުމަށް ހަމަޖެހިފައިވަނީ މި ހިނގާ އޮގަސްޓް މަހުގެ 28ން 30ގެ ނިޔަލަށެވެ. ޖުމުލަ 100 ކުންފުނީގެ ބައިވެރިވުމާއެކު ކުރިއަށްދާ މި އެގްޒިބިޝަނަކީ ފުޑް އެންޑް ހޮސްޕިޓަލިޓީ ދާއިރާގައި މަސައްކަތް ކުރާ ރާއްޖެ އާއި ރާއްޖެއިން ބޭރުގެ ފަރާތްތަކަށް ފަހި ފުރުސަތުތަކާއެކު އެކުލަވާލާފައިވާ އެގްޒިބިޝަނެކެވެ. މި އިވެންޓާމެދު މައުލޫމާތުދިނުމަށް ބޭއްވި ބައްދަލުމެއްގައި ފެމްގެ ރައީސާ މަރިޔަމް ނޫރައްދީން ވިދާޅުވީ މިއީ ރާއްޖޭގައި އެންމެ ގިނަ އަދަދެއްގެ ބަޔަކު ބައިވެރިވާ އެއް ފެއާއަށް ވާނެ ކަމަށެވެ. މިފެއާއަކީ ރާއްޖޭގެ ފަތުރުވެރިކަމާއި ގުޅުން ހުރި ސިނާއަތުތަކަށް ކޮވިޑް-19 އާއި ގުޅިގެން ލިބުނު ގެއްލުންތަކުން އަރައިގަންނަން ލިބޭ ރަނގަޅު ފުރުސަތަކަށް ވާނެ ކަމަށް ޤަބޫލުކުރައްވާކަމަށް ވެސް އޭނާ ވިދާޅުވިއެވެ. އަދި މިފަހަރުގެ އިވެންޓުގެ އެކި ކެޓަގަރީތަކުގައި ގިނަ އަދަދެއްގެ ބަޔަކު ބައިވެރިވެފައިވާކަމަށާއި މިއެގްޒިބިޝަނާމެދު ގިނަ އުންމީދުތަކެއް ކުރެވޭކަމަށް އޭނާ ވިދާޅުވިއެވެ. އެގޮތުން މިއީ ހޮސްޕިޓަލިޓީ ދާއިރާގައި މަސައްކަތް ކުރާ ފަރާތްތަކުން އެއްތަނަކަށް އައިސް އެކަކު އަނެކަކުގެ ތަޖުރިބާގެ އަލީގައި ކަންކަން ދަސްކުރުމަށާއި، އިތުރަށް މަގްބޫލުކަން ހޯދުމަށް ލިބޭ ރަނގަޅު ފުރުސަތެއް ކަމަށް ވެސް މަރިޔަމް ނޫރައްދީން ވިދާޅުވިއެވެ.

މި ނޫސްވެރިންގެ ބައްދަލުވުމުގައި ވާހަކަދައްކަވަމުން ފެމްގެ މެނޭޖިން ޑިރެކްޓަރު އަދި ތަޖުރިބާކާރު ޝެފް އިމްރާން ހަސަން ވިދާޅުވީ މިއީ ރާއްޖޭގެ ޝެފުން ނުވަތަ ކައްކާއިންނަށް އިތުރަށް ކުރިއަރަން ލިބޭ ރަނގަޅު ފުރުސަތެއް ކަމަށެވެ. އެގޮތުން އެ ދާއިރާއަށް ޝައުގުވެރިކަން ހުރި ފަރާތްތަކަށް މި އެގްޒިބިޝަންއިން ހިތްވަރު ލިބޭނެ ކަމަށް ޤަބޫލުކުރައްވާ ކަމަށް އޭނާ ވިދާޅުވިއެވެ. މީގެ އިތުރުން މިފަދަ ފެއާއެއް ބޭއްވުމަކީ އެ ދާއިރާ އިން ކުރިއެރުންތައް ހޯދަން ބޭނުންވެފައި ތިބި މީހުންނަށް ގިނަ ފުރުސަތުތަކެއް ލިބޭނެ ކަމެއް ކަމަށް ވެސް އޭނާ ވިދާޅުވިއެވެ. އަދި މި އެގްޒިބިޝަންގެ ޗެލެންޖުތަކުގެ ޖަޖުންގެ ތެރޭގައި ބައިނަލްއަޤުވާމީ ގޮތުން ފާހަގަކޮށްލެވޭ ޖަޖުން ތިބިކަން އޭނާ ފާހަގަކުރެއްވިއެވެ.

މިފަހަރުގެ ފެމް އިންޓަރނެޝަނަލް އެގްޒިބިޝަން އެންޑް ކަލިނަރީ ޗެލެންޖުގައި 27 ކެޓަގަރީއެއް ހިމެނޭ އިރު މި އެގްޒިބިޝަންގައި 10،000 އަށް ވުރެ ގިނަ އުފެއްދުންތައް ބައިވެރިކޮށްފައިވެއެވެ. ތަފާތު 30 ގައުމު ތަމްސީލު ކުރާ މި އެގްޒިބިޝަންއަށް 4000 އަށް ވުރެ ގިނަ މީހުން ޒިޔާރަތްކުރުމަށްވަނީ ހަމަޖެހިފައެވެ. އަދި 1500 މީހުން ވަނީ ތަކެތި ގަނުމަށް ނިންމާފައެވެ. މި އިވެންޓުގެ މެއިން ސްޕޮންސަރަކީ ލިލީ އިންޓަރނޭޝަނަލްއެވެ. އަދި ކޯ ސްޕޮންސަރަކީ ސިމްޑީއެވެ.