ދެވަނަ ފަހަރަށް ވޯޓު ނަގައިގެންވެސް ޝަހުބާން ސަލާމަތްވެއްޖެ

މޯލްޑިވްސް މީޑިއާ ކައުންސިލް (އެމްއެމްސީ) ގެ ރައީސްގެ މަގާމުގައި ހުންނެވި ޝަހުބާން ފަހުމީގެ އިތުބާރު ނެތް ކަމުގެ ވޯޓު ދެވަނަ ފަހަރަށް ނަގައިގެންވެސް އޭނާ ސަލާމަތްވެއްޖެއެވެ.

އެމްއެމްސީގެ މެންބަރު ކަމުން ޝަހުބާން ވަކިކުރުމުގެ މަސައްކަތް ކައުންސިލުން ފެށީ އޭނާގެ ބައިވެރިވުން އޮތް ކިންގްސް ފޮރެކްސް ޓްރޭޑިން ކުންފުނިން ގާނޫނާ ހިލާފަށް އިންވެސްޓަމަންޓް ސްކީމެއް ހިންގި ކަމަށް ދައުލަތުގެ ކަމާ ގުޅޭ އިދާރާތަކުން ދެކޭ މައްސަލައިގައެވެ. އަދި އެ މައްސަލައިގައި ފުލުހުން އޭނާގެ މައްޗަށް މަނީ ލޯންޑަރިންގެ ތުހުމަތުކޮށް ފުލުހުންގެ ތަހުގީގަށް ހާޒިރުކޮށްފައިވެއެވެ.

ހޯމަ ދުވަހުގެ ރޭ އެމްއެމްސީގެ ކުއްލި ޖަލްސާއެއް ބާއްވާ އޭނާ މަގާމުން ވަކިކުރަން މަސައްކަތް ކޮށްފައި ވަނީ މިދިޔަ މަހުގެ 22 ވަަނަ ދުވަހުގެ ރޭ އޮތް ބައްދަލުވުމުގައި ޝަހުބާން ވަކިކުރަން މަސައްކަތްކޮށް އެކަން ނާކާމިޔާބު ވެފައިވަނިކޮށެވެ. ޝަހުބާން ވަކިކުރަން ބޭނުންވާ އަދަދަށް އެރޭވެސް ވޯޓު ލިބިފައެއްނުވެއެވެ.

ޝަހުބާން ވަކިކުރުމަށް ނެގުނު ވޯޓުގައި އެކަމަށް ތާއީދުކުރައްވާ ވޯޓު ދެއްވީ މިބައްދަލުވުމުގައި ބައިވެރިވެވަޑައިގެންނެވި މެންބަރުންގެ ތެރެއިން ނުވަ މެންބަރުންނެވެ. އެމްއެމްސީގެ ގާނޫނުގައި އެ ކައުންސިލްގެ ރައީސް މަގާމުން ވަކިކުރެވޭނެ ގޮތެއް ނޯވެއެވެ. ގާނޫނުގައި އޮންނަ ގޮތުން ކައުންސިލްގެ ތިންބައިކުޅަ ދެބައި މެންބަރުންގެ އަގުލަބިއްޔަތުން މެންބަރެއްގެ މައްޗަށް އިތުބާރު ނެތް ކަމުގެ ވޯޓެއް ނަގައި މެންބަރުކަމުން ވަކިކުރެވިދާނެއެވެ.

ނުވަ މެންބަރުންގެ ސޮޔާއެކު ޝަހުބާން ފަހުމީ އިސްތިއުފާ ދިނުމަށް ގޮވާލާ ގަރާރެއްވެސް އެމްއެމްސީން ވަނީ ފާސްކޮށްފައެވެ. ގަރާރުގައި ބުނެފައިވަނީ ކައުންސިލްގެ މެންބަރުން މީގެކުރިން އެދިފައިވާ ގޮތަށް ޝަހުބާން އިސްތިއުފާ ދީފައިނުވާތީ އޭނާ އިސްތިއުފާ ދިނުމަށް ގޮވާލައި ނުވަ މެންބަރުންގެ ސޮޔާއެކު އެ ގަރާރު ނެރުނީ ކަމަށެވެ. ގަރާރުގައި އިތުރަށް ބުނެފައިވަނީ ޝަހުބާންގެ މައްޗަށް އެފަދަ ތުހުމަތެއް ކޮށް ތަހުގީގު ފެށިފައިވާކަމީ މީޑިއާތަކާއި ނޫސްވެރިންގެ އިތުރުން މީޑިއާ ކައުންސިލްގެ ގިނަ މެމްބަރުންގެ ކަންބޮޑުވުން އޮތް މައްސަލައެއް ކަމަށެވެ.

ޝަހުބާނަށް ކުރެވޭ ތުހުމަތުތަކާ ގުޅިގެން ބޮޑެތި ފިއްތުންތަކެއް ކުރިމަތިވި ނަމަވެސް މަގާމުން އިސްތިއުފާ ނުދެއްވާނެ ކަމަށް ގެންދަވަނީ ވިދާޅުވަމުންނެވެ. ކިންގްސް ކުންފުނިން ކުރަމުން ދިޔަ ވިޔަފާރިއަކީ އިންވެސްޓްމަންޓް ސްކީމެއްގެ ސިފަތައް ހުރި ވިޔަފާރިއަކަށްވެފައި އަޑިނޭނގޭ ޕޮންޒީ ސްކީމެއްގެ ގޮތުގައި އެ ސްކީމް ހިންގަމުން ދިއުމާ ގުޅިގެން ރާއްޖޭގެ ބޭންކިން ނިޒާމުގެ ތެރެއިން އެ ވިޔަފާރި ހުއްޓުވައި، އެ މައްސަލަ ފުލުހުންނާއި ކަމާގުޅޭ އިދާރާތަކުން ދަނީ ތަހުގީގު ކުރަމުންނެވެ. ފުލުހުން ވަނީ ކިންގްސް ކުންފުނީގެ ބައިވެރިއެއް ކަމުގައިވާ ޝަހްބާންގެ ބޭބެ އަދި ރައްޔިތުންގެ މަޖިލީހުގެ ފޭދޫ ދާއިރާގެ ކުރީގެ މެންބަރު އަލްހާން ފަހުމީ އަށް މަނީ ލޯންޑަރިންގެ ތުހުމަތުކޮށްފައެވެ.