ބޯކޮށް ވާރޭވެހި މާޅެންދޫގައި ފެންބޮޑުވެއްޖެ

ނ. މާޅެންދޫއަށް ބޯކޮށް ވާރޭވެހި ފެންބޮޑުވުމާގުޅިގެން، އެމްއެންޑީއެފް ނޮދަން އޭރިއާ ކޮމާންޑްގެ ސިފައިން އެހީތެރިކަން ފޯރުކޮށްދީފިއެވެ.

ރާއްޖެއަށް މިހާރު ކުރަމުންދާ ވިއްސާރައިގައި މާޅެންދޫއަށް ބޯކޮށް ވާރޭވެހި ފެންބޮޑުވުމާ ގުޅިގެން، މާޅެންދޫ ކައުންސިލުން ވަނީ އެ ރަށުގައި ބޮޑުވެފައިވާ ފެން ހިންދޭނެ ނިޒާމެއް ނެތިގެން އެމްއެންޑީއެފް ނޮދަރން އޭރިއާ ކޮމާންޑްގެ އެހީތެރިކަމަށް އެދިފައެވެ.

މި ހާދިސާގެ ރިޕޯޓް އާދިއްތަ ދުވަހުގެ 07:40 ލިބުމާއެކު، އެމްއެންޑީއެފް ނޮދަރން އޭރިއާ ކޮމާންޑް ޅ. ނައިފަރު ފަޔަރ ސްޓޭޝަންގެ ސިފައިންނާއި ކޯސްޓްގާޑު ފަރސްޓް ސްކޮޑްރަންގެ ސިފައިން ވަނީ އެ ރަށަށް ގޮސް، އާދިއްތަ ދުވަހުގެ 10:57 ހާއިރުން ފެށިގެން ހަރަކާތްތެރިވެފައެވެ. ވިއްސާރައިގައި މާޅެންދޫގެ ބައެއް ސަރަހައްދުތަކާއި މަގުތަކުގައި ބޮޑުވެފައިހުރި ފެންގަނޑުތައް ހިއްކުމުގެ މަސައްކަތުގައި ގާތްގަނޑަކަށް 16:15 ވަންދެން ސިފައިން ހަރަކާތްތެރިވެފައިވެއެވެ.

އާދިއްތަ ދުވަހު ކުރި ވިއްސާރައިގައި އެ ރަށުގެ މީހުން ދިރިއުޅޭ ގިނަ ގެތަކަށް ފެންވަދެފައިވެއެވެ.