ރައީސް ޔާމީނަށްވުރެ ބޮޑަށް ގައުމަށް ޣައްދާރުވި ވެރިއެއް ނެތް: ނާޒިމް
ނާޒިމާއި ގާސިމަކީ މަރުދުވަހާ ޖެހެންދެންވެސް ޣައްދާރުންކަމަށް ޔާމީން ވަނީ ވިދާޅުވެފައި
މުހައްމަދު ނާޒިމް - އެމްއެންޕީގެ ރައީސް
ރައީސް ޔާމީނަށްވުރެ ބޮޑަށް ގައުމަށް ޣައްދާރުވެވަޑައިގަތް ވެރިއެއް ނެތްކަމަށް މޯލްޑިވްސް ނޭޝަނަލް ޕާޓީ (އެމްއެންޕީ)ގެ ރައީސް ކާނަލް ރިޓަޔަރޑް މުހައްމަދު ނާޒިމް ވިދާޅުވެއްޖެއެވެ.
ނާޒިމް މިފަދައިން ވިދާޅުވީ ނާޒިމާއި، ޖުމްހޫރީ ޕާޓީގެ ލީޑަރު ގާސިމް އިބްރާހީމަކީ މަރުދުވަހާ ޖެހެންދެންވެސް ޣައްދާރުންކަމަށް ވިދާޅުވެ ކުރީގެ ރައީސް ޔާމީން އަބްދުލްގައްޔޫމް ކުރެއްވި ޓްވީޓަށް ރައްދުދެއްވަމުންއެވެ.
ނާޒިމް ވިދާޅުވީ އެންމެ ބޮޑު ޣައްދާރަކީ ޔާމީންކަމަށެވެ. އެމަނިކުފާނަކީ ވަތަނީ ލީޑަރޭ ރައީސް ޔާމީން ވިދާޅުވާއިރު، ވަތަނީ ލީޑަރަށް ވެރިކަން ދިނީމައި ރައްޔިތުންނާއި ސިޔާސީ ލީޑަރުން ޖަލަށްލައްވައި، ގައުމުގެ ފައިސާ ގެއްލުވާލައްވައި، މުޅި ދުނިޔެއާ ޖެހިވަޑައިގަންނަވާ ވަތަނީ ލީޑަރެއް ރާއްޖެއަށް ބޭނުމެއް ނޫންކަމަށް ނާޒިމް ވިދާޅުވިއެވެ. ގައުމަށް ބޭނުންވަނީ ތާހިރު އުޅުންހުރި ވަތަނީ ލީޑަރެއް ކަމަށާއި، އެންމެ ބޮޑު ޣައްދާރަކީ ރައީސް ޔާމީންކަމަށް ނާޒިމް ވިދާޅުވިއެވެ.
ރައީސް ޔާމީންގެ ޓްވީޓާ ގުޅިގެން މާވަށު ދާއިރާގެ މެމްބަރު މުހައްމަދު ސައީދު ވަނީ، ރައީސް ޔާމީން ވަލުދޮރާށިން ކަންކަން ނުކުރައްވާނެކަމަށް ވިދާޅުވެފައެވެ. ގާނޫނު ނަގަހައްޓަވައި ތަންފީޒުކުރައްވާނެ ކަމަށާއި، ގައުމު ތަރައްގީކުރެއްވީ ތާރީޚު ނުދެކޭ ސްޕީޑުގައިކަމަށް ވިދާޅުވިއެވެ.
ސައީދުގެ ޓްވީޓަށް ރައްދު ދެއްވައި އެމްއެންޕީގެ ނާއިބުރައީސް އަބްދުﷲ ރިޔާޒް ވިދާޅުވީ، ރައީސް ޔާމީނުގެ އެކައުންޓުގައިހުރި ފައިސާ އެކައުންޓަށް ވަދެފަހުރިގޮތް ޝަރީއަތުގެ މަޖިލީހުގައި ޕީޖީ ކިޔައިދިނުމުން، ވަލުދޮރާށިން ކަންކަން ނުކުރައްވާނެކަން ވަރަށް ސާފުވިކަމަށެވެ. އަދި ސުޕްރީމް ކޯޓުގެ ހުކުމާ އެއްގޮތަށް، ނާޒިމް ފްރޭމްކުރި މައްސަލަ ފުލުހުން ބެލީމައި، ރައީސް ޔާމީނުގެ ވެރިކަމުގައި ބަޑިގުދަނުން ހަތިޔާރު ނެރުނުގޮތްވެސް ސާފުވާނެކަމަށް ރިޔާޒް ވިދާޅުވިއެވެ.
ރައީސް ޔާމީންގެ މި ޓްވީޓަށް ގިނަ ބައެއްގެ ފާޑުކިޔުން ދަނީ އަމާޒުވަމުންނެވެ.
