ރާއްޖޭގެ ޗީފް އޮފް ޑިފެންސް ފޯސް، އިންޑިއަން އަރމީ އޮފިސަރ ޓްރެއިނިންގ އެކެޑެމީގެ ޕެރޭޑް ޝަރަފުވެރިކޮށްދެއްވައިފި

ރާއްޖޭގެ ޗީފް އޮފް ޑިފެންސް ފޯސް މޭޖަރ ޖެނެރަލް އަބްދުﷲ ޝަމާލް، އިންޑިއަން އާމީގެ އޮފިސަރ ޓްރެއިނިންގ އެކެޑެމީގެ ޕާސިންގ އައުޓް ޕެރޭޑް ޝަރަފުވެރިކޮށްދެއްވައިފިއެވެ.

މި ޕެރޭޑް ކުރިއަށްދިޔައީ އިންޑިއާގެ ޗެންނާއީގައި ހޮނިހިރު ދުވަހުގެ ހެނދުނުއެވެ. މި ޕެރޭޑުގައި ޝަމާލް ބައިވެރިވެވަޑައިގަތީ އިންޑިއަން އާމީ އޮފިސަރ ޓްރެއިނިންގ އެކަޑަމީގެ ޕާސިންގ އައުޓް ޕެރޭޑްގެ ރިވިއުއިންގ އޮފިސަރެއްގެ ގޮތުގައެވެ.

ޝަމާލް މިހާރު ހުންނެވީ އިންޑިއާގެ ޗީފް އޮފް އަރމީ ސްޓާފްގެ ދައުވަތަކަށް އިންޑިއާގައެވެ. އޭނާ ވަނީ އިންޑިއަން އަރމީ އޮފިސަރ ޓްރެއިނިންގ އެކަޑަމީގެ ޕަރަމެސްވަރަން ޑްރިލް ސްކެއަރގައި ބޭއްވި ރަސްމިއްޔާތު ޝަރަފުވެރިކޮށްދެއްވައި، އެ އެކަޑަމީން އަލަށް އޮފިސަރުންގެ ގޮތުގައި ދަސްވެނިވާ ކެޑޭޓުންނާ މުޚާތަބުކުރައްވައި ވާހަކަފުޅު ދައްކަވާފައެވެ.

އޭނާގެ ވާހަކަފުޅުގައި މުސްތަޤުބަލަށް މިއަދު ބިނާކުރެވޭ އާ ޖީލުގެ އޮފިސަރުންނަށް މުޅިން ތަފާތު ސަލާމަތީ ގޮންޖެހުންތަކާ ކުރިމަތިލާން ޖެހިފައިވާކަން ފާހަގަކުރެއްވިއެވެ. އަދި އެ ކަންކަމަށް ހޭލުންތެރިވެ ތިބުމަށް އިލްތިމާސްކުރެއްވިއެވެ. އަދި އޮފިސަރުންގެ އަޚްލާގާއި ސުލޫކީ މިންގަނޑަކީ އެންމެ އިސްކަން ދޭންޖެހޭނެ ކަންކަންކަމުގައި ފާހަގަކުރެއްވިއެވެ.

މި ރަސްމިއްޔާތުގައި ދިވެހި އަސްކަރިއްޔާއަށް ނިސްބަތްވާ ދިވެހި ދެ އަންހެން ސިފައިން ވެސް ވަނީ އޮފިސަރ ޓްރެއިނިންގ ފުރިހަމަ ކުރައްވާފައެވެ. ޗީފް އޮފް ޑިފެންސް ފޯސް ވަނީ އެ ދެ ސިފައިންނާއި އެ ސިފައިންގެ އާއިލާގެ މެންބަރުންނާ ބައްދަލުކުރައްވައި، މަރުޙަބާއާއި ތަހުނިޔާ ވިދާޅުވެފައެވެ.

މީގެ އިތުރުން އިންޑިއަން އާމީ އޮފިސަރ ޓްރެއިނިންގ އެކަޑަމީގައި މިހާރު ތަމްރީނު ހާސިލުކުރަމުންދާ ދިވެހި ކެޑޭޓުންނާ ވެސް ޗީފް އޮފް ޑިފެންސް ފޯސް ވަނީ ބައްދަލުކުރައްވާފައެވެ.

މި ރަސްމިއްޔާތުގައި ޗީފް އޮފް ޑިފެންސް ފޯސްގެ އަރިހުގައި އެމަނިކުފާނުގެ އަނބިކަނބަލުން ބައިވެރިވެ ވަޑައިގެންނެވިއެވެ.