ފެނުގެ މައްސަލަ ހައްލުކުރުމަށް ހިންގަމުންދާ މަޝްރޫއުތަކުގެ ތެރެއިން 2021 ވަނަ އަހަރުގެ ނިޔަލަށް އެންމެ ގިނައިން ފެނަށް ޖެހޭ 6 އަތޮޅެއްގެ 14 ރަށެއްގައި މަޝްރޫއު ނިމިފައިވާއިރު 59 ރަށެއްގައި މަޝްރޫއު ކުރިއަށްދާކަމަށް ހޫނު މޫސުމުގައި ރާއްޖޭގެ ރަށްތަކަށް ބޯފެން ފޯރުކޮށްދިނުމާ ގުޅޭ ޕަރޕޯމެންސް އޮޑިޓް ރިޕޯޓުގައި ބުނެފިއެވެ.

މި އޮޑިޓްގައި ބުނެފައިވަނީ ފެނުގެ މައްސަލަ ހައްލުކުރުމަށް ސަރުކާރުންދަނީ ހުރިހާ ރަށެއްގައި ފެނުގެ ވިއުގަ ގާއިމްކުރުމުގެ މަސައްކަތް ކުރަމުން ކަމަށެވެ. އެގޮތުން، މި މައްސަލަ ހައްލުކުރުމަށް ސަރުކާރުން މަޝްރޫއުތައް ހިންގާފައިވާ މިންވަރަށް ބަލައިއިރު، އެންމެ ގިނައިން ފެނަށް ޖެހޭ އަތޮޅުތަކުގައި (ހއ، ހދ، ށ، ނ، ރ، ބ) ފެނުގެ ވިއުގަ ގާއިމްކުރުމުގެ 14 މަޝްރޫއެއް ނިމިފައިވާކަމަށެވެ. އެއީ، ނިންމާފައިވާ ޖުމްލަ މަޝްރޫއުތަކުގެ 31 އިންސައްތަ މަޝްރޫއުކަމަށާއި، މި އަތޮޅުތަކުގެ 59 ރަށެއްގައި މި މަޝްރޫގެ މަސައްކަތް މިހާރު ކުރިއަށްދާކަމަށް އޮޑިޓްގައި ބުނެފައިވެއެވެ.

މީގެ އިތުރުން، ކޮންމެ އަހަރެއްގެ ހޫނު މޫސުމާ ގުޅިގެން އަތޮޅުތެރޭ ގިނަ ރަށްތައް ފެނަށްޖެހޭ މައްސަލަ ހައްލުކުރުމަށް ސަރުކާރުން އެކި މަޝްރޫތައް ހިންގާފައިވާކަމަށް ބުނެފައިވެއެވެ. އެގޮތުން، 2021 ވަނަ އަހަރުގެ ނިޔަލަށް ވާރޭ ފެން ރައްކާކުރާ ނިޒާމް 47 ރަށެއްގައި ގާއިމްކޮށްފައިވާކަމާއި 43 ރަށެއްގައި ފެނުގެ ވިއުގަ ގާއިމްކޮށް ނިންމާފައިވާކަމަށް މި އޮޑިޓްގައި ބުނެފައިވެއެވެ.

ވާރޭފެން ނަގައި ރައްކާކުރާ މަޝްރޫތަކަކީ މުޅިރަށުގެ ބޯފެނުގެ ޑިމާންޑަށް ކޭޓަރ ކުރާގޮތަށް ފަރުމާކޮށްފައިވާ ނިޒާމަކަށް ނުވާތީ، މި ނިޒާމް މީގެ ކުރިން ގާއިމުކޮށްފައިވާ ރަށްތައް ވެސް ފެނަށްޖެހިފައިވާކަން ފާހަގަކޮށްފައިވެއެވެ. ފެނަށް ޖެހުމުގެ މައްސަލައަށް ދާއިމީ ހައްލެއް ގެނެސްދެވިފައިވަނީ ފެނުގެ ވިއުގަ ގާއިމުކޮށްފައިވާ ރަށްރަށުގައި ކަމަށް ވާއިރު، ފެނުގެ ވިއުގަ ގާއިމުކޮށްދިނުމުގައި އެންމެ ބޮޑު އަހައްމިއްޔަތުކަމެއް ތަކުރާރުކޮށް ފެން ފޯރުކޮށްދޭ ރަށްރަށަށް ދެވިފައިނުވުމުގެ ސަބަބުން، މިރަށްރަށަށް އެކަށީގެންވާ ހައްލެއް ނުލިބި ގިނަ ދުވަސްތަކެއްވެފައިވާކަން އޮޑިޓްގައި ފާހަގަކޮށްފައިވެއެވެ.

އެގޮތުން، 7 އަހަރަށްވުރެ ގިނަ އަހަރު ތަކުރާރުކޮށް ފެން ފޯރުކޮށްދީފައިވާ 29 ރަށުގެ ތެރެއިން ފެނުގެ ވިއުގައިގެ މަޝްރޫއު ނިމިފައިވަނީ 2 ރަށެއްގައިކަމަށް ބުނެފައިވެއެވެ. އަދި 27 ރަށެއްގައި މި މަޝްރޫއުގެ މަސައްކަތްތައް ކުރިއަށްދާކަމަށް ބުނެފައިވެއެވެ. އެހެންކަމުން، އަތޮޅުތެރޭގެ އެކި ރަށްރަށުން ފެނަށްޖެހޭ މައްސަލަ ދާއިމީ ގޮތެއްގައި ހައްލުކުރެވި، އަހަރުން އަހަރަށް ސަރުކާރުން ކުރަންޖެހޭ ޚަރަދު ކުޑަކުރެވޭނީ މިހާރު ހިންގަމުންދާ މަޝްރޫތައް ވީހާވެސް އަވަހަށް ނިންމާ ރައްޔިތުންނަށް އޭގެ މަންފާ ލިބިގެން ކަމަށް އޮޑިޓް ގައި ބުނެފައިވެއެވެ.

ފެން ފޯރުކޮށްދިނުމުގެ މައްސަލަ ހައްލުކުރުމަށްޓަކައި 2015 ވަނަ އަހަރު މިނިސްޓްރީ އޮފް އެންވަޔަރަންމަންޓުން ވާރޭފެން ރައްކާރުމުގެ ނިޒާމު ގާއިމުކުރުމުގެ މަސައްކަތް ފެށި ނަމަވެސް މި މައްސަލައަށް ހައްލެއް ހޯދުމަށް މުޅިރާއްޖޭގައި ޖުމްލަ 47 ރަށެއްގައި މި މަޝްރޫއުގެ މަސައްކަތް ނިންމާފައިވާ ކަމަށް ބުނެފައިވެއެވެ. މީގެ އިތުރުން 8 ރަށެއްގައި މަޝްރޫއު ހިންގުމަށް ރޭވި ނަމަވެސް، ސަރުކާރުގެ ސިޔާސަތު ބަދަލުވުމާ ގުޅިގެން ކުރިއަށް ނުގެންދިޔުމަށް ނިންމާފައިވާ ކަމަށް ބުނެފައިވެއެވެ.

އަތޮޅުތެރޭގެ އެކި ރަށްރަށުގައި ވާރޭފެން ރައްކާކުރާ ނިޒާމް ގާއިމް ކުރެވިފައި ވީނަމަވެސް މީގެ ތެރެއިން ގިނަ ރަށްރަށަށް ކުއްލި ހާލަތުގައި ފެން ފޯރުކޮށްދީފައިވާކަން ފާހަގަކޮށްފައިވެއެވެ. އެގޮތުން، މި މަޝްރޫއުތައް ހިންގާފައިވާ 47 ރަށުގެ ތެރެއިން 33 ރަށަކަށް މި މަޝްރޫއު ނިންމާފައިވާ މުއްދަތުގެ ފަހުންވެސް ކުއްލި ހާލަތުގައި ފެން ފޯރުކޮށްދީފައިވާކަން ފާހަގަކުރެވިފައިވާ ކަމަށް އޮޑިޓްގައި ބުނެފައިވެއެވެ.

މިހެން ދިމާވަނީ، ރަށަށް އެކަށީގެންވާ ކެޕޭސިޓީގެ ހަޓުތައް ނެތުމާއި ފެން ހަޓުތައް ސާފުކޮށް ވާރޭފެން ނެގުމަށް ތައްޔާރުކޮށްފައި ނެތުމުގެ ސަބަބުން ކަމަށް ބައެއް ކައުންސިލްތަކުން މައުލޫމާތު ދީފައިވާކަމަށް އޮޑިޓްގައި ވެއެވެ. އަދި ވީހާވެސް ގިނަ ރައްޔިތުންނަށް ސާފު ބޯފެނުގެ ޚިދުމަތް ފޯރުކޮށްދީ ފެނަށްޖެހޭ މައްސަލައަށް އަވަސް ހައްލެއް ހޯދައި އެކަމަށް ދައުލަތުން ކުރާ ހޭދަ ކުޑަކުރުމަށް ހިންގާ މަޝްރޫއުތަކުގެ ބޭނުން އެކަށީގެންވާގޮތުގައި ނުހިފޭނަމަ ދައުލަތުން މިކަމަށް ކުރަންޖެހޭ ޚަރަދުތައް އަހަރުން އަހަރަށް އިތުރުވެ މި މައްސަލައަށް ދާއިމީ ހައްލެއް ނުލިބި ދިގުލައިގެން ދާނެކަން އޮޑިޓްގައި ފާހަގަކޮށްފައިވެއެވެ.

ވާރޭފެން ނަގާ ރައްކާކުރާ ނިޒާމު ގާއިމުކުރުމަށް ބީލަން ހުށަހަޅާފައިވާ ކޮންޓްރެކްޓަރުން، އެވަރެޖްކޮށް 72 ދުވަހުގެ ތެރޭގައި މަސައްކަތް ނިންމޭނެކަމަށް ބަޔާންކޮށްފައިވެއެވެ. އަދި، މިނިސްޓްރީ އޮފް އެންވަޔަރަންމަންޓާއި އެކިއެކި ކޮންޓްރެކްޓަރުންނާއެކު ހެދިފައިވާ އެއްބަސްވުންތަކުގައި އެންމެ ކުރު މުއްދަތެއްގެ ގޮތުގައި 30 ދުވަސް އަދި އެންމެ ދިގު މުއްދަތެއްގެ ގޮތުގައި 90 ދުވަސް ހިމަނާފައިވާކަން ފާހަގަކޮށްފައިވެއެވެ. ނަމަވެސް، 2015 އިން 2018 ވަނަ އަހަރަށް ހިންގާފައިވާ 18 މަޝްރޫއުގެ ތެރެއިން 94 އިންސައްތަ މަޝްރޫއުގެ މުއްދަތު އިތުރުކޮށްދީފައިވާކަމާއި މުއްދަތު އިތުރުކޮށްނުދީ މަސައްކަތް ނިންމާލެވިފައިވަނީ އެންމެ މަޝްރޫއެއްގައިކަމަށް ބުނެފައިވެއެވެ. އަދި 28 އިންސައްތަ މަޝްރޫއަށް ފުރަތަމަ އެއްބަސްވި މުއްދަތަށްވުރެ 3 ގުނަ އިތުރަށް މުއްދަތު ދީފައިވާކަންވެސް އޮޑިޓްގައި ފާހަގަކޮށްފައިވެއެވެ.