މާތް ﷲ ހަރާމް ކުރެއްވިކަން ސާބިތުނުވާ އެއްވެސް ކަމަކީ ހަރާމް ކަމެއް ކަމުގައި ބުނުމުގެ ހައްގު އެއްވެސް އިންސާނަކަށް ނޯންނާނެ ކަމަށް ކުރީގެ ރައީސް އަދި ދީނީ އިލްމުވެރިޔާ މައުމޫން އަބްދުލް ގައްޔޫމް ވިދާޅުވެއްޖެއެވެ.
އިޖުތިމާއީ އެކިއެކި ހަރަކާތްތަކާއި އިސްލާމް ދީނާއި ގުޅުވައި ރައްޔިތުންގެ މެދުގައި ފަތުރާ ބައެއް ރައުޔުތަކާއި ގުޅިގެން ރައީސް މައުމޫންގެ ދިިރާސާ ލިޔުއްވުން މޯލްޑިވްސް ރިފޯމް މޫވްމެންޓް (އެމްއާރްއެމް)އިން ވަނީ އާންމުކޮށްފައެވެ. މިގޮތުން ޔޯގާ ހަރަކާތަކީ ހަރާމް ކަމެއް ކަމުގައި ބުނެ އެކި މީހުން އެކި ގޮތްގޮތަށް ވާހަކަދައްކަމުންދާ މި ދަނޑިވަޅުގައި ރައީސް މައުމޫންގެ ކުރައްވާފައިވާ ދިރާސާ ލިޔުމުގައި ވަނީ އިންސާނާ ކުރާ ކަންތައްތަކުގެ ތެރެއިން ހުއްދަ ކަންކަމާއި، ހަރާމް ކަންކަން ކަނޑައަޅުއްވާ ފަރާތަކީ ހަމައެކަނި މާތް ﷲ ކަން ފާހަގަކުރައްވާފައެވެ. ސުންނަތް ކަންކަމާއި، މަކުރޫހަ ކަންކަންވެސް ކަނޑައަޅުއްވާ ފަރާތަކީ އެއީ ކަމަށާއި، ހުކުމް ކުރެއްވުމުގައި ބާރު އޮންނަނީ ހަމައެކަނި އެ ކަލާނގެއަށް ކަމުގައި މައުމޫން ވިދާޅުވިއެވެ.
ހަރާމް ކަމަކީ އެކަމެއް ކުރުން މާތް ﷲ މުޅިން މަނާކުރައްވާފައިވާ ކޮންމެ ކަމެއް ކަމަށް ރައީސް މައުމޫން ވިދާޅުވިއެވެ. ކަމެއް ކުރުން މާތް ﷲ މުޅިން މަނާކުރައްވާފައިވާ ކަންކަން އެނގޭނެ ގޮތްތަކެއް ވާކަމަށާއި، އޭގެ ތެރެއިން އެންމެ ފާޅުކަން ބޮޑުގޮތަކީ ކީރިތި ގުރުއާނުގެ އާޔަތްތަކުން ނުވަތަ ރަސޫލާގެ ބަސްފުޅަކުން އެކަން ސަރީހަކޮށް އެނގެން އޮތުން ކަމުގައި ވިދާޅުވިއެވެ.
އަދި އަނެއް ގޮތަކީ ގަރީނާއަކުން އެކަން އެނގުން ކަމަށް ރައީސް މައުމޫން ވިދާޅުވިއެވެ. މިސާލެއްގެ ގޮތުގައި ފާހަގަކުރައްވާފައިވަނީ އެކަމެއް ނުކުރުމަށް ނުވަތަ އެކަމަކުން ދުރުހެލިވުމަށް މާތް ﷲ އަންގަވާފައިވާ އެންގެވުމާއި ގުޅިގެން އެކަމަކީ ފާފައެއް ކަމުގައި ނުވަތަ ޝައިތާނާގެ އަމަލެއް ކަމުގައި އަންގަވާފައިވުމެވެ. އެކަމެއް ކުރާ މީހަކަށް އުގުބާތެއް ކަނޑައަޅުއްވާފައިވާކަމުގައި މާތްﷲ އަންގަވާ އެންގެވުމަކީވެސް އެކަމަކީ ހަރާމް ކަމެއްކަން އެނގޭނެ ވަރަށް ވަރުގަދަ ގަރީނާއެއް ކަމުގައި ރައީސް މައުމޫން ވިދާޅުވިއެވެ.
އިސްލާމްދީނުގައި ހަރާމް ކުރައްވާފައިވާ ކަންތައްތަކާ ބެހޭގޮތުން ނަޒަރު ހިންގާލާއިރު، އިސްލާމް ދީނަކީ ލުއިފަސޭހަ އަދި ހުރިހާ ޒަމާނަކަށާއި، ތަނަކަށް އެކަށީގެންވާ ނިޒާމެއްކަން ސާބިތުކޮށްދޭއިރު، މާތް ﷲ ހަރާމް ކުރައްވާފައިނުވާ ކޮންމެ ކަމަކީ ހުއްދަ ކަމެއް ކަމުގައި ކަނޑައަޅުއްވާފައިވާކަމަށް ރައީސް މައުމޫން ވިދާޅުވިއެވެ. މިސާލެއްގެ ގޮތުން ވިދާޅުވީ ކަމެއްގެ ހުކުމާ ބެހޭގޮތުން މުފްތީއެއްގެ އަރިހުގައި ސުވާލުވެވިއްޖެނަމަ އެކަމާބެހޭ ހުކުމެއް ކީރިތި ގުރުއާނުން ނުވަތަ ސުންނަތުން ނުވަތަ އެހެން ޝްރުއީ ދަލީލަކުން ފެނިވަޑައިނުގެންނެވިނަމަ މުފްތީއަށް އޮންނާނީ އެއީ ހުއްދަ ކަމެއް ކަމުގައި ވިދާޅުވުން ކަމަށް ރައީސް މައުމޫން ވިދާޅުވިއެވެ.
މައުމޫންގެ ދިރާސާ ލިޔުމުގައި ވިދާޅުވެފައި ވަނީ މާތް ﷲ ހަރާމް ކުރެއްވި ކަންކަން ސާބިތު ނުވާ އެއްވެސް ކަމަކީ ހަރާމް ކަމެއް ކަމުގައި ބުނުމުގެ ހައްގު އެއްވެސް އިންސާނަކަށް ނޯންނާނެ ކަމަށެވެ. އަލަށް އުފެދޭ މުއާމަލާތްތަކާއި، އާދަކާދަތަކުގެ ތެރެއިންވެސް އެކަމަކީ ހަރާމް ކަމެއްކަން ސާބިތުނުވާ ކޮންމެ ކަމެއް ވާނީ ހުއްދަ ކަމަކަށްކަން ވަނީ ފާހަގަކުރައްވާފައެވެ. ހަރާމް ކަމެކޭ ބުނެވޭނީ ގުރުއާނާ ސުންނަތުން އެއީ ހަރާމް ކަމެއްކަން ސާބިތުވާން އޮތްނަމަ އެ ހާލަތެއްގައި ކަމަށް މައުމޫން ވިދާޅުވިއެވެ.
ޔޯގާ ފަދަ ސިއްހީ ނުވަތަ ނަފްސާނީ ދުޅަހެޔޮކަން ބަދަހިކޮށް ވަރުގަދަ ކުރުމަށްޓަކައި ކުރާ ކަސްރަތުތަކާއި، ލަވަކިޔުމާއި، މިޔުޒިކު ކުޅުން ފަދަ ކަންކަމަކީވެސް ހަރާމް ކަންކަމޭ ބުނާނެ ތަނެއް ނެތް ކަމަށް ރައީސް މައުމޫން ވިދާޅުވިއެވެ. އެހެންނަމަވެސް އެއިން އެއްވެސް ކަމެއް ކުރުމުގެ ތެރޭގައި ހަރާމް ކަމެއް އެކުލެވިގެންވާނަމަ ނުވަތަ އެކަމަކީ ހަރާމް ކަމަކަށް އަރައިގަތުމަށްޓަކައި ބޭނުން ކުރެވޭ ވަސީލަތްތަކަށް ވާނަމަ އެކަމެއް ޔަގީނުންވެސް ހަރާމްވާނެ ކަމަށް ރައީސް މައުމޫން ވިދާޅުވިއެވެ.
