ބަންގްލަދޭޝް އިން އިންޓަރނޭޝަނަލް މަނިޓަރީ ފަންޑު (އައިއެމްއެފް)ން ލޯނު ނެގުމަށް އެދުމާއެކު އެކަމާއި ގުޅޭގޮތުން މަޝްވަރާކުރާނެކަމަށް އައިއެމްއެފް އިން ބުނެފިއެވެ.
ބަންގްލަދޭޝް އަކީ ދެކުނު އޭޝިޔާގެ ގައުމުތަކުގެ ތެރެއިން އައިއެމްއެފްގެ އެހީތެރިކަން ހޯދާ ތިން ވަނަ ގައުމެވެ. މީގެކުރިން ސްރީލަންކާ އާއި ޕާކިސްތާނުން ވަނީ އައިއެމްއެފްގެ އެހީތެރިކަމަށް އެދިފައެވެ.
ބަންގްލަދޭޝްގެ 416 ބިލިއަން ޑޮލަރުގެ އިގްތިޞާދު އެންމެ ހަލުވި މިނުގައި ކުރިއަށްދާ އިގްތިޞާދުގެ ތެރޭގައި ހިމެނެއެވެ. ނަމަވެސް ރަޝިޔާ އާއި ޔޫކްރެއިން ހަނގުރާމައިގެ ސަބަބުން ހަކަތައާއި ކާނާގެ ބާވަތްތަކުގެ އަގު ބޮޑުވުމާއެކު ބަންގްލަދޭޝްއަށް އެތެރެކުރާ ތަކެތީގެ އަގު ބޮޑުވެ ޑެފިސިޓްވުމާ ހަމައަށް ވަނީ ގޮސްފައެވެ.
އައިއެމްއެފް އިން ބުނީ ބަންގްލަދޭޝް އިން ޝައުގުވެރިކަން ފާޅުކޮށްފައިވަނީ މޫސުމީ ބަދަލުތަކާއި ގުޅިގެން އެއިދާރާއިން އެކުލަވާލާފައިވާ ޕްރޮގްރާމަށެވެ. އަދި އައިއެމްއެފްގެ ޕްރޮގްރާމްގައި ބައިވެރިވުމަށް އެދިފައިވާކަމަށް އައިއެމްއެފް އިން ބުނެއެވެ.
އެކަމާއި ގުޅޭގޮތުން އައިއެމްއެފްގެ ސްޕޯކްސްޕާސަން ވިދާޅުވީ ބަންގްލަދޭޝްއަށް އެހީވުމަށް އެއިދާރާއިން އޮތީ ތައްޔާރަށްކަމަށާއި އައިއެމްއެފްގެ ސްޓާފުން ބަންގްލަދޭޝްގެ އެކި އިދާރާތަކާއި ގުޅިގެން ޕްރޮގްރާމެއް އެކުލަވާލުމުގެ މަސައްކަތްކުރާނެކަމަށެވެ. އަދި ޕްރޮގްރާމް އެކުލަވާލަމުންދާއިރު އެހީތެރިކަންދޭނެ މިންވަރު ކަނޑައެޅޭނެކަމަށް އައިއެމްއެފުން ބުނެއެވެ.
ބަންގްލަދޭޝްގެ ފިނޭންސް މިނިސްޓަރު ނޫސްވެރިންނާ ވާހަކަދައްކަވަމުން ވިދާޅުވީ އެގައުމުން އައިއެމްއެފުން ލޯނު ނަގާނީ ލޯނުގެ ޝަރުތުތަކަކީ ބަންގްލަދޭޝްއަށް ފައިދާވަނިވި ގޮތަކަށް ހުރި ލޯނަކަށްވާނަމަ ކަމަށެވެ. އަދި އައިއެމްއެފުން ލޯނު ނެގުމަށް ބަންގްލަދޭޝް ބޭނުންވުމަކީ އެގައުމުގެ އިގްތިޞާދީ ހާލަތު ގޯސްކޮށް އޮތުން ނޫންކަމަށް ވެސް މިނިސްޓަރު ވިދާޅުވިއެވެ.
