ކުލަބް އެމެރިކާއިން ރެއާލް މެޑްރިޑާ އެއްވަރުކޮށްފި

އައު ސީޒަނަށް ތައްޔާރުވުމުގެ ގޮތުން ކުލަބް އެމެރިކާއާ ދެކޮޅަށް ކުޅުނު މެޗުން ރެއާލް މެޑްރިޑު އެއްވަރުވެއްޖެއެވެ.

މިއީ ކުރިއަށް އޮތް ސީޒަނަށް ތައްޔާރުވުމުގެ ގޮތުން ރެއާލުން ކުޅުނު ދެ ވަނަ މެޗެވެ. ފުރަތަމަ މެޗު ވާދަވެރި ބާސެލޯނާއާ ދެކޮޅަށް ކުޅުނުއިރު، އެ މެޗުން ރެއާލް ބަލިވީ 1-0 ންނެވެ. ކުލަބް އެމެރިކާއާ ދެކޮޅަށް ރެއާލުން ކުޅުނު މެޗު ނިމުނީ 2-2 ން އެއްވަރުވެގެންނެވެ. މެޗު ރެއާލުން ފެށީ އެ ޓީމުގެ މުހިންމު ކުޅުންތެރިންނާއެކުއެވެ. އޭގެ ތެރޭގައި ކެޕްޓަން ކަރީމް ބެންޒީމާ، ވިނީޝިއަސް ޖޫނިއަރ، މާކޯ އަސެންސިއޯ، ޓޯނީ ކްރޫސް، ކަސެމިރޯ، ލޫކާ މޮޑްރިޗް އަދި ރޫޑިގާ ހިމެނެއެވެ.

މެޗުގައި ފުރަތަމަ ލަނޑު ޖަހައި ލީޑު ނެގީ ކުލަބް އެމެރިކާއިންނެވެ. އެއީ މެޗުގެ ފަސް ވަނަ މިނެޓުގައި ހެންރީ މާޓިން ޖަހައިދިން ލަނޑެކެވެ. ރެއާލަށް ނަތީޖާ ހަމަހަމަކޮށްދިން ލަނޑު 22 ވަނަ މިނެޓުގައި ޖެހީ ބެންޒީމާއެވެ. ފުރަތަމަ ހާފު ނިމުނުއިރު ދެ ޓީމު އެއްވަރުވެފައި އޮތް ނަމަވެސް، ދެ ވަނަ ހާފުގެ ކުރީކޮޅު ރެއާލުން ވަނީ ލީޑު ނަގާފައެވެ. މެޗުގެ 55 ވަނަ މިނެޓުގައި ލިބުނު ޕެނަލްޓީއެއް ކާމިޔާބުކޮށް ލީޑު ނަގައިދިނީ އެޑެން ހަޒާޑްއެވެ. ލީޑުގައި އޮވެ ރެއާލުން ކުޅެމުން ދަނިކޮށް މެޗުގެ ފަހު 10 މިނެޓުގެ ތެރޭގައި ކުލަބް އެމެރިކާއިން ވަނީ ނަތީޖާ ހަމަހަމަކޮށްފައެވެ. އެ ޓީމަށް ލިބުނު ޕެނަލްޓީއަކުން ނަތީޖާ ހަމަހަމަކޮށްދިނީ އަލްވާރޯ ފިޑާލްގޯއެވެ.

ޕްރީ ސީޒަންގެ އެކުވެރިކަމުގެ ފަހު މެޗުގައި ރެއާލުން ނިކުންނާނީ އިޓަލީގެ ޔުވެންޓަސްއާ ދެކޮޅަށެވެ.