ސުއަރޭޒް އޭނާގެ ކުރީގެ ކުލަބަށް ބަދަލުވަނީ

އުރުގުއޭގެ ފޯވާޑް ލުއިސް ސުއަރޭޒް އޭނޭގެ ކުރީގެ ކުލަބަށް ގުޅެން ނިންމާފައިވާކަން ހާމަކޮށްފިއެވެ.

އެކަން ހާމަކޮށް ސުއަރޭޒް ބުނީ އޭނާގެ ކުރީގެ ކުލަބް ނަސިއޮނާލަށް ގުޅުމަށް ލިބުނު ހުށަހެޅުމަކީ ދޫކޮށްލެވޭ ވަރުގެ ފުރުސަތެއް ނޫންކަމަށެވެ. ނަސިއޮނާލް އަކީ ސުއަރޭޒް އޭނާގެ ސީނިއަރ ކެރިއަރު ފެށި ކުލަބެވެ. އޭގެ ކުރިން ޔޫތު ކެރިއަރުގައި ވެސް ސުއަރޭޒް ވަނީ އެ ޓީމަށް ކުޅެފައެވެ. ސުއަރޭޒް އެ ޓީމު ދޫކޮށްލީ 2007 ވަނަ އަހަރުއެވެ. އެއަށްފަހު އޭނާ ގުޅުނީ ގްރޮނިންގެން އަށެވެ. އެ ޓީމުގައި އެއް އަހަރު ހޭދަކުރުމަށްފަހު، 2007 ވަނަ އަހަރު އަޔެކްސް އަށް ބަދަލުވިއެވެ. ސުއަރޭޒްގެ މޮޅު ކުޅުމުގެ ސަބަބުން ލިބުނު ފުރުސަތެއްގައި އޭނާ ވަނީ 2011 ވަނަ އަހަރު ލިވަޕޫލަށް ބަދަލުވެފައެވެ.

އޭގެ ފަހުން ލިވަޕޫލް ދޫކޮށް ބާސެލޯނާއަށް ބަދަލުވެ އެ ޓީމުގައި ވެސް މޮޅު ކުޅުމެއް ދެއްކިއެވެ. ސުއަރޭޒް އޭނާ އެންމެ ފަހުން ކުޅުނު ކުލަބް އެތުލެޓިކޯ މެޑްރިޑަށް ބަދަލުވީ 2020 ވަނަ އަހަރުއެވެ. ދެ އަހަރު ދުވަހު އެ ޓީމަށް ކުޅެދިނުމަށްފަހު، 2022 ވަނަ އަހަރު އެ ޓީމު ދޫކޮށްލިއެވެ. ސުއަރޭޒް އަކީ މިވަގުތު ފްރީ އެޖެންޓެކެވެ.

ނަސިއޮނާލަށް ބަދަލުވުމާ ގުޅޭ ގޮތުން ސުއަރޭޒް ބުނީ އެ ޓީމާއެކު ޕްރީ-އެގްރީމަންޓަކަށް އާދެވިފައިވާކަމަށެވެ. މީގެ އިތުރުން އޭނާ ބުނީ ބަދަލުވުމުގެ ކަންކަން ރަސްމީކޮށް ހަމަޖެހުމާއެކު އިތުރު ކަންކަން ހިއްސާކުރާނެ ކަމަށެވެ.

އުމުރުން 35 އަހަރުގެ ސުއަރޭޒް ވަނީ އުރުގުއޭއާއެކު މިއަހަރުގެ ފަހުކޮޅު ޤަތަރުގައި އޮންނަ ވޯލްޑް ކަޕުން ޖާގަ ހޯދާފައެވެ. އޭނާ ވަނީ މިހާތަނަށް ޤައުމީ ޓީމަށް ކުޅެދިން 132 މެޗުގައި 68 ލަނޑު ޖަހާފައެވެ. މީގެ އިތުރުން ޤައުމީ ޓީމާއެކު އޭނާ ވަނީ 2011 ވަނަ އަހަރުގެ ކޮޕަ އެމެރިކާ މުބާރާތް ކާމިޔާބުކޮށްފައެވެ.