ޔަންގް ޝޫޓަރސްއިން ޖޯޝް ޗެމްޕިއަންޝިޕް ކާމިޔާބުކޮށްފި

ނ. ހެނބަދޫ ޖޯޝް ޖަމްއިއްޔާއިން ކުރިއަށްގެންދިޔަ ޖޯޝް ޗެމްޕިއަންޝިޕްގެ ޗެމްޕިއަންކަން ޔަންގް ޝޫޓަރސްއިން ކާމިޔާބުކޮށްފިއެވެ.

ޔަންގް ޝޫޓަރސް މުބާރާތުގެ ތަށި އުފުލާލީ ފައިނަލް މެޗުގައި 3-0ން އެފްސީ ބްރަދަރސް ބަލިކޮށްގެންނެވެ. މެޗުގެ ފަސްވަނަ މިނެޓުގައި ޔަންގް ޝޫޓަރސްއަށް ލީޑު ނަގައިދިނީ ކެޕްޓަން ހުސައިން އަބްދުﷲ (އުޗީ)އެވެ. ޔަންގް ޝޫޓަރސްގެ އަނެއް ދެލަނޑުވެސް ކާމިޔާބުކޮށްދިނީ މެޗުގެ މޮޅު ކުޅުންތެރިޔާ މުހައްމަދު މައުރޫފްއެވެ.

ފުރަތަމަ ހާފްގައި ލަނޑު ޖަހަން ބްރަދަރސްއަށް ރަނުގެ ފުރުސަތެއް ލިބުނެވެ. ނަމަވެސް މުހައްމަދު ވަހީދު (ކޮކީ) ފޮނުވާލި ޕެނަލްޓީ، ޔަންގް ޝޫޓަރސްގެ ކީޕަރު ވަނީ ހުޝިޔާރުކަމާއެކު ދިފާއުކޮށްފައެވެ.

ޔަންގް ޝޫޓަރސްއިން މުބާރާތް ކާމިޔާބުކުރީ ކުޅުނު އެއްވެސް މެޗަކުން ބަލިނުވެއެވެ. މިއީ އެޓީމުން މުބާރާތް ކާމިޔާބުކުރި ތިންވަނަ ފަހަރެވެ. މުބާރާތުގެ ރަނައަޕްކަން ބްރަދަރސްއަށް ލިބުނުއިރު، ފެއާ ޕްލޭ ޓީމަކީ އެފްސީ ހާގަނޑެވެ.

މުބާރާތުގެ އެންމެ މޮޅު ކުޅުންތެރިއަކީ ބްރަދަރސްގެ މުހައްމަދު ވަހީދުއެވެ. އޭނާ ވަނީ މުބާރާތުގެ ރަން ބޫޓާއި އެންމެ މޮޅު ފޯވާޑްގެ މަގާމުވެސް ހޯދާފައެވެ. މުބާރާތުގެ އެންމެ މޮޅު މިޑްފީލްޑަރަކީ ގްރޭވްސް އެފްސީގެ ހުސައިން އިބްރާހިމް (ކުޑޫ)އެވެ. އެންމެ މޮޅު ޑިފެންޑަރަކަށް ހޮވުނީ ޗެމްޕިއަން ޔަންގް ޝޫޓަރސްގެ އިގްލީމް އަލީއެވެ. އެންމެ މޮޅު ގޯލް ކީޕަރަކީ ޔަންގް ޝޫޓަރސްގެ މުހައްމަދު ޝާހީންއެވެ. އެންމެ އުންމީދީ ކުޅުންތެރިއަކީ ހާގަނޑުގެ ނައިސަމް މުހައްމަދު ނަސީމްއެވެ.

މުބާރާތުގެ އެންމެ މޮޅު ކޯޗަކަށް ހޮވުނީ ބްރަދަރސްގެ ކޯޗު އިސްމާއިލް ވަހީދުއެވެ. ފެއަރ ޕްލޭ ކުޅުންތެރިއަކީ ބްރަދަރސްގެ ހަސަން ޖަވާދުއެވެ.