ހެނބަދޫއިން ގެއްލިގެން ހޯދާ މީހާ ދަތުރު ކުރި ކެނޯ ފެނިއްޖެ، މީހާ ނުފެނޭ!

ނ. ހެނބަދޫއިން ގެއްލިގެން ހޯދާ މީހާ ދަތުރު ކުރިކަމަަށް ބެލެވޭ ކެނޯ ފެނިއްޖެއެވެ.

ހެނބަދޫ، ކުންނާރުގެ އުމުރުން 28 އަހަރުގެ އިބްރާހިމް ރާމިޒް ގެއްލިގެން ހޯދަން ފަށާފައިވަނީ ހުކުރު ދުވަހުއެވެ. އޭނާ ގެއްލިގެން ހޯދަމުން އަންނައިރު އޭނާ ދަތުރު ކުރި ކަމަށް ބެލެވޭ ކެނޯ ފެނިފައިވަނީ އެ އަތޮޅުގެ ކެނދިކުޅުދޫގެ ހުޅަނގު އުތުރު ފަރާތު އަތިރިމައްޗަށް ލައްގާފައި އޮއްވައި ކަމަށް މޯލްޑިވްސް ނޭޝަނަލް ޑިފެންސް ފޯސް (އެމްއެންޑީއެފް) އިން މައުލޫމާތު ދެއެވެ.

އެމްއެންޑިއެފް އިން ބުނިގޮތުގައި އާއްމު މީހަކަށް ކެނޯ ފެނިގެން ކެނދިކުޅުދޫ ކައުންސިލަށް ރިޕޯޓް ކޮށްފައިވަނީ ހޮނިހިރު ދުވަހުއެވެ. އަދި އެމްއެންޑީއެފްގެ ކޯސްޓްގާޑަށް އޭގެ މައުލޫމާތު ލިބިފައިވަނީ ހޮނިހިރު ދުވަހުގެ ހެނދުނު 10:15 އެހާއިރު ކަމަށް ވެސް އެ އިދާރާއިން ބުންޏެވެ.

ރާމިޒް ހޯދުމުގެ މަސައްކަތް ހެނބަދޫގެ ރައްޔިތުންނާއި އެމްއެންޑީއެފްގެ ނޮދަން އޭރިއަރ ކޯސްޓްގާޑް ފަސްޓް ސްކޮޑްރަނުން އަންނަނީ ކުރަމުންނެވެ. ނަމަވެސް މިހާތަނަށް އޭނާގެ އެއްވެސް މައުލޫމާތެއް ލިބިފައި ނުވެއެވެ.

ރާމިޒް ގެއްލިގެން ހޯދަން ފަށާފައިވަނީ ހުކުރު ދުވަހުގެ ރޭ 7:00 އެހާއިރުން ފެށިގެންނެވެ. އެ މައްސަލަ ފުލުހަށް ރިޕޯޓް ކޮށްފައިވާއިރު އޭނާ ހޯދުމުގެ ތެރޭގައި އެ ރަށުގައި އޮތް ކެނޯއެއް ނެތްކަން ފާހަގަ ކުރެވިފައިވާ ކަމަށް ހެނބަދޫ ކައުންސިލުން ވަނީ ބުނެފައެވެ.