ޔަންގް ޝޫޓަރސްއިން ފެށުން ރަނގަޅުކޮށްފި

ނ. ހެނބަދޫ ޖޯޝް ޖަމްއިއްޔާއިން ކުރިއަށްގެންދާ ޖޯޝް ޗެމްޕިއަންޝިޕްގައި ޔަންގް ޝޫޓަރސްއިން ފެށުން ރަނގަޅުކޮށްފިއެވެ.

މުބާރާތުގައި ޔަންގް ޝޫޓަރސްގެ ފުރަތަމަ މެޗުގައި އެޓީމު ބައްދަލުކުރީ ލަވެންޑަރ ޔުނައިޓެޑާއެވެ. މި މެޗުގައި ލަވެންޑަރސްގެ މައްޗަށް ޔަންގް ޝޫޓަރސް ކުރިހޯދީ 2-0ންނެވެ. ޔަންގް ޝޫޓަރސްއަށް ފުރަތަމަ ހާފުގެ 20 ވަނަ މިނެޓުގައި ލީޑު ނަގައިފދިނީ މުހައްމަދު މައުރޫފްއެވެ. އެޓީމުގެ ދެވަނަ ލަނޑު މެޗު ފަހު ވަގުތުގައި ކާމިޔާބުކޮށްދިނީ އަހުމަދު ޝުއޫންއެވެ. މެޗުގެ މޮޅު ކުޅުންތެރިއަކީ ފުރަތަމަ ލަނޑު ޖެހި މައުރޫފްއެވެ.

މުބާރާތުގެ ފުރަތަމަ މެޗުގައި ބުދަ ދުވަހު ބައްދަލުކުރީ އެފްސީ ހާގަނޑާއި އެފްސީ ބްރަދަރސްއެވެ. މި މެޗު 5-1ން ކާމިޔާބުކުރި އެފްސީ ބްރަދަރސްއެވެ.

މިފަހަރުގެ މުބާރާތުގައި ފަސް ޓީމު ވާދަކުރާއިރު ޗެމްޕިއަން ޓީމަށް 8،000 ރުފިޔާ، އަދި ރަނަރއަޕް ޓީމަށް 4،000 ރުފިޔާގެ އިތުރުން، ޓްރޮފީ ދިނުމަށް ވަނީ ހަމަޖެހިފައެވެ.

މުބާރާތުގެ ފައިނަލުގެ ފުރަތަމަ ޖާގަ ލިބޭނީ ލީގު ބުރެއް ކުޅުމަށްފަހު އެންމެ މަތިން ޕޮއިންޓު ހޯދާ ޓީމަކަށެވެ. ފައިނަލުގެ ދެވަނަ ޖާގަ ލިބޭނީ ލީގު ބުރުގެ ދެވަނަ އަދި ތިންވަނަ ޓީމު ބައްދަލުކޮށް މޮޅުވާ ޓީމަކަށެވެ.