ދެވަނަ މެޗުވެސް ބްރަދާސް ކާމިޔާބުކޮށްފި

ނ.ހެނބަދޫގައި މިހާރު ކުރިއަށް ގެންދާ ޖޯޝް ޗެމްޕިއަންޝިޕް 2022 ގައި ކުޅުނު ދެވަނަ މެޗުވެސް އެފްސީ ބްރަދާސް ކާމިޔާބުކޮށްފިއެވެ.

މި މެޗުގައި ބްރަދާސް ނިކުތީ ގްރޭވްސް އެފްސީއާ ދެކޮޅަށެވެ. މެޗުން ބްރަދާސް މޮޅުވި ނަމަވެސް ފުރަތަމަ ލަނޑު ޖަހާ ލީޑު ނެގީ ގްރޭވްސްއިންނެވެ. ފުރަތަމަ ހާފުގައި ގްރޭވްސްގެ އިބްރާހިމް ރަމީޒް ވަނީ ދެލަނޑު ޖަހާ ޓީމަށް ރަނގަޅު ލީޑެއް ނަގައިދީފައެވެ. ނަމަވެސް ފުރަތަމަ ހާފު ނިމުމުގެ ކުރިން ބްރަދާސްގެ ހަސަން ޖަވާދު ލަނޑެއް ޖަހާ ފަރަގު ކުޑަކުރިއެވެ.

ދެވަނަ ހާފުގައި ބްރަދާސްވަނީ އިތުރު ތިން ލަނޑު ޖަހާ މެޗުގެ ނަތީޖާ އަނބުރާލާފައެވެ. ބްރަދާސްއިން ދެވަނަ ހާފުގައި ޖެހި ތިން ލަނޑުގެ ތެރެއިން ދެލަނޑު ކާމިޔާބުކުރީ މެޗުގެ މޮޅު ކުޅުންތެރިޔާ މުހައްމަދު ވަހީދު (ކޮކީ) އެވެ. ބްރަދާސް މެޗު ކާމިޔާބުރީ 4-2ންނެވެ.

މުބާރާތުގެ ފުރަތަމަ މެޗުގައި ބްރަދާސް ވަނީ އެފްސީ ހާގަނޑާއި ވާދަކޮށް 5-1ން މޮޅުވެފައެވެ.

މުބާރާތުގައި މާދަމާ ބައްދަލުކުރާނީ ލަވެންޑާ ޔުނައިޓެޑާއި އެފްސީ ހާގަނޑެވެ.