ހެނބަދޫ ޖޯޝް ޗެމްޕިއަންޝިޕް ފަށައިފި

ނ. ހެނބަދޫގައި އެރަށު ޖޯޝް ޖަމްއިއްޔާއިން ކޮންމެ އަހަަރަކު ބާއްވަމުން އަންނަ ޖޯޝް ޗެމްޕިއަންޝިޕް ފުޓްބޯޅަ މުބާރާތް ފަށައިފިއެވެ.

މުބާރާތުގެ ފުރަތަމަ މެޗުގައި ބައްދަލުކުރީ އެފްސީ ހާގަނޑާއި އެފްސީ ބްރަދަރސްއެވެ. މި މެޗު 5-1ން ކާމިޔާބުކުރި އެފްސީ ބްރަދަރސްއެވެ. މެޗުގެ ފުރަތަމަ ހާފުގައި ބްރަދަރސްއަށް ލީޑުނަގައިދިނީ އަހުމަދު އަލީއެވެ. ނަމަވެސް އޭގެ ކުޑައިރުކޮޅެއް ފަހުން ހާގަނޑުގެ އަހުޝަން އަލީ ވަނީ ލަނޑެއްޖަހައި ނަތީޖާ ހަމަހަކޮށްފައެވެ. ބްރަދަރސްއަށް ދެވަނަ ފަހަރަށް ލީޑު ނަގައިދިނީ މުހައްމަދު ވަހީދެވެ. އަދި ފުރަތަމަ ހާފުގެ ފަހުކޮޅު ލިބުނު ޕެނަލްޓީއަކުން ބްރަދަރސްގެ ލީޑު ފުޅާކޮށްދިނީ ފުރަތަމަ ލަނޑު ޖެހި އަހުމަދު އަލީއެވެ. ދެވަނަ ހާފުގައި ކުޅެން ނިކުމެ ބްރަދަރސްގެ ވަހީދު ވަނީ އިތުރު ދެލަނޑުޖަހައި ހެޓްރިކް ހަދާފައެވެ. މެޗުގެ މޮޅު ކުޅުންތެރިއަކީވެސް ވަހީދެވެ.

މި މުބާރާތަކީ 2006 ވަނަ އަހަރުން ފެށިގެން ހެނބަދޫގައި ބާއްވަމުން އަންނަ މުބާރާތެކެވެ. ނަމަވެސް 2016 ވަނަ އަހަރު މެދުކަނޑާލުމަށްފަހު މުބާރާތް އަލުން ފެށީ 2018 ވަނަ އަހަރުއެވެ. މިފަހަރުގެ މުބާރާތުގައި ފަސް ޓީމަކުން ވާދަކުރެއެވެ. ބްރަދަރސްއާއި ހާގަނޑުގެ އިތުރުން މުބާރާތުގައި ދެން ވާދަކުރަނީ ޔަންގް ޝޫޓަރސް، ގްރޭވްސް އެފްސީ އަދި ލަވެންޑަރސް ޔުނައިޓެޑްއެވެ. މުބާރާތުގެ ޗެމްޕިއަން ޓީމަށް 8،000 ރުފިޔާ އަދި ރަނަރއަޕް ޓީމަށް 4،000 ރުފިޔާގެ އިތުރުން، ޓްރޮފީ ދިނުމަށް ވަނީ ހަމަޖެހިފައެވެ.

މުބާރާތުގެ ފައިނަލުގެ ފުރަތަމަ ޖާގަ ލިބޭނީ ލީގު ބުރެއް ކުޅުމަށްފަހު އެންމެ މަތިން ޕޮއިންޓު ހޯދާ ޓީމަކަށެވެ. ފައިނަލުގެ ދެވަނަ ޖާގަ ލިބޭނީ ލީގު ބުރުގެ ދެވަނަ އަދި ތިންވަނަ ޓީމު ބައްދަލުކޮށް މޮޅުވާ ޓީމަކަށެވެ.

މުބާރާތުގައި މާދަމާ ހަވީރު ބައްދަލުކުރާނީ ޔަންގް ޝޫޓަރސްއާއި ލަވެންޑަރސްއެވެ.