ގްރޭވްސް ބަލިކޮށް ބްރަދަރސް ފައިނަލަށް
ފައިނަލް މެޗު އޮންނާނީ ޖުލައި 26 ވަނަ ދުވަހު
މުބާރާތުގައި ބްރަދަރސްއާއި ގްރޭވްސް ބައްދަލުކުރި މެޗުގެ ތެރެއިން
ނ. ހެނބަދޫގައި މިހާރު ކުރިއަށްދާ ޖޯޝް ޗެމްޕިއަންޝިޕްގެ ފައިނަލްގެ ފަހު ޖާގަ އެފްސީ ބްރަދަރސް ކަށަވަރުކޮށްފިއެވެ.
ބްރަދަރސް ފައިނަލަށް ދަތުރުކުރީ ސެމީ ފައިނަލްގައި ގްރޭވްސް އެފްސީ ބަލިކޮށްގެންނެވެ. މިއަދު ކުޅުނު ސެމީ ފައިނަލް މެޗު އެޓީމުން ކާމިޔާބުކުރީ 2-1ންނެވެ. މެޗުގައި ފުރަތަމަ ލަނޑު ޖަހައި ލީޑުނެގީ ގްރޭވްސްއިންނެވެ. މި ލަނޑު ފުރަތަމަ ހާފުގައި އެޓީމަށް ކާމިޔާބުކޮށްދިނީ އިބްރާހީމް ރަމީޒްއެވެ. ނަމަވެސް ބްރަދަރސްގެ މުހައްމަދު ވަހީދު (ކޮކީ) ވަނީ ފުރަތަމަ ހާފު ނިމެނިކޮށް ލިބުނު ޕެނަލްޓީއަކުން ލަނޑެއް ޖަހައި ނަތީޖާ ހަމަހަމަކޮށްފައެވެ.
ބްރަދަރސް މޮޅުވި ލަނޑު ދެވަނަ ހާފުގައި އެޓީމަށް ކާމިޔާބުކޮށްދިނީ މެޗުގެ މޮޅު ކުޅުންތެރިޔާ އިބްރާހީމް ޝަރީފުއެވެ.
މުބާރާތުގެ ފައިނަލް މެޗު އޮންނާނީ ޖުލައި 26 ވަނަ ދުވަހުއެވެ. ފައިނަލްގައި ބައްދަލުކުރާނީ ބްރަދަރސްއާއި ޔަންގް ޝޫޓަރސްއެވެ. ލީގު ބުރުގައި މި ދެޓީމު ބައްދަލުކުރި މެޗު ކާމިޔާބުކުރީ ޔަންގް ޝޫޓަރސްއެވެ.
