ރާމިޒް އަދިވެސް ނުފެނޭ، ހޯދުމުގެ މަސައްކަތް ދަނީ ކުރިއަށް

ނ. ހެނބަދޫއިން ގެއްލުނު މީހާ އަދިވެސް ނުފެންނަ ކަމަށް އެ ރަށު ކައުންސިލުން ބުނެފިއެވެ.

އެ ރަށު، ކުންނާރުގެ އުމުރުން 28 އަހަރުގެ އިބްރާހިމް ރާމިޒް ގެއްލިގެން ހޯދަން ފަށާފައިވަނީ ހުކުރު ދުވަހުއެވެ. މިހާތަނަށް އޭނާގެ އެއްވެސް ޚަބަރެއް ލިބިފައިނުވާކަމަށާއި އަދިވެސް އޭނާ ހޯދުމުގެ މަސައްކަތް ފުލުހުންނާއި އެމްއެންޑީއެފްއާ ގުޅިގެން ކުރަމުން އަންނަ ކަމަށް ހެނބަދޫ ކައުންސިލުން ބުނެއެވެ.

Advertisement

ރާމިޒް ހޯދުމުގެ މަސައްކަތް ފުލުހުންނާއި އެމްއެންޑީއެފް އިން ކުރަމުން އަންނައިރު އޭނާ ދަތުރު ކުރި ކަމަށް ބެލެވޭ ކެނޯއެއް ވަނީ ނ. ކެނދިކުޅުދޫ ހުޅަނގު އަތިރިމައްޗަށް ލައްގާފައި އޮއްވާ ފެނިފައެވެ. އެ ކެނޯގައި އޭނާ ދަތުރު ކުރި ކަމަށް ލަފާކުރަނީ އޭނާ ގެއްލިގެން ހޯދަމުން ދިޔައިރު އެ ރަށުގެ ގޮނޑުދޮށުގައި އޮތް ކެނޯއެއް ބާލާފައިވާކަން ފާހަގަކުރެވިފައިވާތީއެވެ.

ރާމިޒު ކުރިން މަސައްކަތް ކުރަމުން އައީ ރަށުން ބޭރުގައެވެ. ނަމަވެސް އޭނާ ގެއްލުނީ ފުލުހުން ބަލަމުންދާ މައްސަލައަކާ ގުޅިގެން އެ ރަށަށް ބަދަލުވެގެން އުޅެނިކޮށެވެ.

ހެނބަދޫ ކައުންސިލްގެ ރައީސް ހުސައިން އަބޫބަކުރު "ރާއްޖެ އެމްވީ" އަށް ވިދާޅުވީ ރާމިޒުއަކީ މަސްތުވާތަކެތި ބޭނުން ކުރާ މީހެއް ކަމަށް ތުހުމަތުކުރެވޭ މީހެއް ކަމަށެވެ.

ރާމިޒް ގެއްލިގެން ހޯދަން ފަށާފައިވަނީ ހުކުރު ދުވަހުގެ ރޭ 7:00 އެހާއިރުން ފެށިގެންނެވެ. ރާމިޒް ހޯދުމުގެ މަސައްކަތް ހެނބަދޫގެ ރައްޔިތުންނާއި އެމްއެންޑީއެފްގެ ނޮދަން އޭރިއަރ ކޯސްޓްގާޑް ފަސްޓް ސްކޮޑްރަނުން އަންނަނީ ކުރަމުންނެވެ.

އެމްއެންޑީއެފްއިން ބުނިގޮތުގައި ކެނދިކުޅުދޫއަށް ލައްގާފައި އޮތް ކެނޯ އާއްމު މީހަކަށް ފެނިގެން އެ ރަށު ކައުންސިލަށް ރިޕޯޓްކޮށްފައިވަނީ ހޮނިހިރު ދުވަހުއެވެ. އަދި އެމްއެންޑީއެފްގެ ކޯސްޓްގާޑަށް އޭގެ މައުލޫމާތު ލިބިފައިވަނީ ހޮނިހިރު ދުވަހުގެ ހެނދުނު 10:15 އެހާއިރު ކަމަށް ވެސް އެ އިދާރާއިން ބުނެއެވެ.

ރާމިޒު ހޯދަން ހެނބަދޫ އާއި ކެނދިކުޅުދޫ އަދި ކައިރީގައިވާ ރަށްތަކުގެ ގޮނޑުދޮށްތަކާއި ކަނޑުގެ ސަރަހައްދު ކޯސްޓްގާޑުގެ ސިފައިން ވަނީ ބަލާފައެވެ. އަދި އެމްއެންޑީއެފް ޑޯނިއާ މަތިންދާބޯޓުގައި ވައިގެ މަގުން އެ ހިސާބުގެ ކަނޑުގެ ސަރަހައްދު ބަލާފައިވާ ކަމަށް ވެސް މައުލޫމާތު ލިބެއެވެ.