ދިވެހިންގެ މިނިވަންކަން ދިފާއުކޮށް ދިވެހި ދިދަ ވިހުރެމުންދަނީ އަވައްޓެރި ގައުމުތަކާއެކު އޮތް ބަދަހި ރަހުމަތްތެރި ގުޅުންތަކުގެވެސް ސަބަބުން - އިމްރާން
25 ޖުލައި 2022 | ހޯމަ 17:37ރާއްޖޭގެ މިނިވަންކަން ދެމި އޮތީ، އަދި ދެމި އޮންނާނީވެސް ދިވެހިން މިނިވަން ބައެއްގެ ގޮތުގައި ދެމިއޮންނަން ކުރާ މަސައްކަތްތަކެއްގެ މައްޗަށް
ހޯމް މިނިސްޓަރ އިމްރާން އަބްދުﷲ (ވ) އާއި ރައީސް ސޯލިހު (މ) އަދި އެމަނިކުފާނުގެ އަނބިކަނބަލުން ފަޒްނާ އަހުމަދު (ކ)
ދިވެހިންގެ މިނިވަންކަން ދިފާއުކޮށް ދިވެހި ދިދަ ވިހުރެމުންދަނީ އަވައްޓެރި ގައުމުތަކާއެކު އޮތް ބަދަހި ރަހުމަތްތެރި ގުޅުންތަކުގެވެސް ސަބަބުންކަމަށް ހޯމް މިނިސްޓަރ އިމްރާން އަބްދުﷲ ވިދާޅުވެއްޖެއެވެ.
ހޯމް މިނިސްޓަރ އިމްރާން އަބްދުﷲ މިހެން ވިދާޅުވީ ރާއްޖޭގެ 57 ވަނަ މިނިވަން ދުވަހުގެ މުނާސަބަތުގައި ރާއްޖެ.އެމްވީއަށް ދެއްވި ޚާއްސަ ޚިތާބުގައެވެ. މިނިސްޓަރ ވިދާޅުވީ، ރާއްޖޭގެ މިނިވަންކަން ދެމި އޮތީ، އަދި ދެމި އޮންނާނީވެސް ދިވެހިން މިނިވަން ބައެއްގެ ގޮތުގައި ދެމިއޮންނަން ކުރާ މަސައްކަތްތަކެއްގެ މައްޗަށްކަމަށެވެ.
ޚިތާބުގައި މިނިސްޓަރ ވިދާޅުވީ ދިވެހިންގެ މިނިވަންކަމުގެ އެންމެ ބޮޑު އަސްލަކީ އިސްލާމް ދީން ކަމަށެވެ. ހަމައެހެންމެ ދިވެހިންގެ މެދުގައި އޮތް އެއްބައިވަންތަކަމާއި، ދިވެހި ގައުމުގެ މިނިވަންކަން ދެމިއޮތީ އެއްބައިވަންތަ ބައެއްގެ ގޮތުގައި އަޅުގަނޑުމެން ދެމިތިބީތީ ކަމަށެވެ. އަޅުގަނޑުމެންގެ އެއްބައިވަންތަކަމަށް ބުރޫއަރާ، ނުތަނަވަސްކަމާއި ހަލަބޮލިކަން އުފެދިގެންދާ ކޮންމެ ވަގުތަކީ މިނިވަންކަމުގެ އިހުސާސް ކުޑަކޮށްދޭ ވަގުތެއް ކަމަށާއި، މިނިވަން ގައުމެއްގެ ވިސްނުން އަޅުގަނޑުމެންގެ ހިތްތަކާއި ސިކުނޑިތަކުން އެއްފަރާތްކުރުމަށް ބައެއް ފަރާތްތަކުން ކުރާ މަސައްކަތުގެ ހަމަލާ އަމާޒުކުރަމުންދާތަން ފެންނަނީވެސް ދިވެހިންގެ އެއްބައިވަންތަކަމަށް ކަމަށް މިނިސްޓަރ ވިދާޅުވިއެވެ.
މިނިސްޓަރ ވިދާޅުވީ ބައިބައިވުމާއި، ދެކޮޅުވެރިކަން ސިކުނޑިތަކަށް ވައްދައިދީގެން، އަޅުގަނޑުމެންނަކީ އަޅުވެތި ގައުމެއްކަމުގެ ވިސްނުން ކުރިއަށްނެރެ، ބައިބައިވުން އުފެއްދުމަށް ކުރެވޭ މަސައްކަތްތަކާމެދު މިއަދު ވިސްނާލަންޖެހޭކަމަށެވެ.
މިނިސްޓަރ ވިދާޅުވީ، ގައުމުތަކާމެދު އޮތް އިތުބާރު އަޅުގަނޑުމެން ދަމަހައްޓަންޖެހޭކަމަށެވެ. އަދި ރައްޔިތުންގެ އިތުބާރު ސަރުކާރަށްވެސް އޮންނަންޖެހޭ ކަމަށާއި، އެ އިތުބާރު ސަރުކާރުން ދަމަހައްޓާނެކަމަށެވެ.
މީގެ އިތުރުން ގާނޫނީ ނިޒާމް ތަންފީޒުކުރާނެ ކަމަށާއި، ގާނޫނު ތަންފީޒު ކުރުމުގައި ސަރުކާރު އޮންނާނީ ސާބިތުކަމާއެކުގައި ކަމަށެވެ. އަދި ގާނޫނު ތަންފީޒުކުރުމުގައި ހަމަ އެންމެ މުއައްސަސާއަކުން ފަސްޖެހުނު ނަމަވެސް ރައްޔިތުންގެ އިތުބާރު ކުޑަވެގެންދާކަމަށެވެ.
މިނިސްޓަރ ވިދާޅުވީ ދިވެހި ގައުމުގެ މިނިވަންކަން ހަގީގަތުގައިވެސް ދެމި އޮންނާނީ އަޅުގަނޑުމެން އެމިނިވަންކަން ދަމަހައްޓަން ބޭނުންވި މިންވަރެއްގެ މައްޗަށް ކަމަށާއި، އަދި އަޅުގަނޑުމެންގެ މެދުގައި ބަދަހިކަމާއި އެއްބައިވަންތަކަން އޮތް މިންވަރެއްގެ މައްޗަށް ކަމަށެވެ. ދިވެހި ގައުމަށް ހާސިލްވި ކޮންމެ ކަމެއް ހާސިލްވީވެސް ދިވެހިންގެ އެއްބައިވަންތަކަމުގެ ސަބަބުންކަމަށެވެ.
ރާއްޖޭގެ 57 ވަނަ މިނިވަންދުވަހުގެ މުނާސަބަތުގައި ރާއްޖޭގެ ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހުގެ ދެކަނބަލުންނަށް އެމަނިކުފާނު ވަނީ ތަހުނިޔާ ދަންނަވާފައެވެ. އަދ ރާއްޖޭގެ ލޮބުވެތި ރައްޔިތުންނަށްވެސް މި މުނާސަބަތުގައި އެމަނިކުފާނު ވަނީ ތަހުނިޔާވިދާޅުވެފައެވެ.
