މިނިވަން ދުވަހާ ގުޅިގެން ޖުލައި 28 ވެސް ބަންދުކޮށްފި
25 ޖޫން 2025 | ބުދަ 07:19ޖުލައި 27 ވާ އާދީއްތަ ދުވަހުގެ އިތުރުން، 28 ވާ ހޯމަ ދުވަހު ވެސް ޙަރަކާތްތަކެއް ބޭއްވުމަށް ހަމަޖެހިފައިވާތީ، އެ ދުވަސް ބަންދު ކުރަން ވަނީ ނިންމާފައި.
ފުޅަނދުބުރު
ދިވެހި ރާއްޖޭގެ މިނިވަން ދުވަހުގެ މުނާސަބަތާ ގުޅިގެން، 2025 ޖުލައި 28 ވާ ހޯމަ ދުވަސް ބަންދު ކޮށްފި އެވެ.
ރައީސުލްޖުމްހޫރިއްޔާގެ އޮފީހުން ބުނެފައި ވަނީ މިނިވަން ދުވަހުގެ މުނާސަބަތާ ގުޅިގެން ޖުލައި މަހުގެ 28 ވަނަ ދުވަސް ބަންދު ކުރުމަށް ރައީސުލްޖުމްހޫރިއްޔާ ޑޮކްޓަރު މުޙައްމަދު މުޢިއްޒު ނިންމަވާފައިވާ ކަމަށެވެ.
ރައީސް އޮފީހުން ބުނެފައި ވަނީ މި އަހަރަކީ، ރާއްޖޭގެ މިނިވަން ކަމަށް 60 އަހަރު ފުރޭ އަހަރު ކަމަށްވުމާ އެކު، މި އަހަރުގެ މިނިވަން ދުވަހާ ގުޅިގެން، ގިނަ ހަރަކާތްތަކެއް ބޭއްވުމަށް ހަމަޖެހިފައިވާތީ އަދި، މިނިވަން ދުވަހުގެ މުނާސަބަތުގައި ބަންދުވާ 2025 ޖުލައި 27 ވާ އާދީއްތަ ދުވަހު ބާއްވާ ހަރަކާތްތަކުގެ އިތުރުން، ޖުލައި 28 ވާ ހޯމަ ދުވަހުގެ ޕުރޮގުރާމުގައި ވެސް މުހިންމު ބައެއް ކަންކަން ހިމެނޭތީ، 2025 ޖުލައި 28 ވާ ހޯމަ ދުވަސް، ސަރުކާރު ބަންދު ދުވަހެއްގެ ގޮތުގައި ރައީސް މުޢިއްޒު ހަމަޖައްސަވާފައިވާ ކަމަށެވެ.
މިނިވަން ދުވަހާ ގުޅިގެން ޖުލައި 28 ވާ ހޯމަ ދުވަސް ބަންދު ކުރުމަށް ރައީސް މުޢިއްޒު ނިންމަވާފައިވާއިރު، އެންމެ ފަހުން އައި ޢަޟްޙާ އީދާ ގުޅިގެން ގިނަ ބަޔަކު އެދެމުން ދިޔަ ނަަމަވެސް، އެ ހަފުތާ ބަންދު ނުކުރަން ސަރުކާރުން ނިންމި އެވެ.
ރައްޔިތުންނާ އެކު ޕޮޑްކާސްޓުގައި ވާހަކަ ދައްކަވަމުން ރައީސް މުޢިއްޒު ވިދާޅުވީ، އެ ގޮތަށް ދުވަސްތައް ބަންދު ކުރުމަކީ ޒިންމާދާރު ކަމެއްގެ ގޮތުގައި ދެކި ނުލައްވާ ކަމަށެވެ.
