100 އަހަރުތެރޭވެސް ނާންނަ ވަރުގެ ދޫނި ރޯގާގެ އައުޓް ބްރޭކްއެއް އިނގިރޭސި ފާން އައިލަންޑްސްއަށް
25 ޖުލައި 2022 | ހޯމަ 09:55މަރުވެފައިވާ 3000ށް ވުރެގިނަ ދޫނި އެއްގަމުން ފެނިފައިވާއިރު، އޭގެ ދިހަ ގުނަ ކަނޑަށް ވެއްޓިފައިވާނެ ކަމަށް ބެލެވޭ
ދޫނި ރޯގާގައި މަރުވެފައިވާ ދޫނިތައް އެއްކުރަނީ
އިނގިރޭސިވިލާތުގެ ނޯދަމްބަރލޭންޑް ކައިރީގައިވާ ފާން އައިލަންޑްސްއަށް އޭވިއަން ފްލޫ ނުވަތަ ދޫނި ރޯގާގެ ވަރުގަދަ އައުޓް ބްރޭކްއެއް އައިސް، އެތައްހާސް ކަނޑުމަތީ ދޫނި މަރުވެފައިވާ ކަމަށް ރިޕޯޓްކޮށްފިއެވެ. މިއީ ފާއިތުވި 100 އަހަރުތެރޭވެސް ދޫނިތަކަށް މިބަލި އެންމެ ބޮޑަށް ޖެހުނު ފަހަރު ކަމަށް ރިޕޯޓްތައް ބުނެއެވެ.
އިނގިރޭސި ފާން އައިލަންޑްސް ބަލަހައްޓަމުންގެންދާ ނެޝަނަލް ޓްރަސްޓްއިން ބުނެފައިވާ ގޮތުގައި މަރުވެފައިވާ ތިންހާހަށް ވުރެގިނަ ދޫނި އެއްގަމުން ފެނިފައިވާއިރު އޭގެ ދިހަ ގުނަ އިތުރަށް ކަނޑަށް ވެއްޓިފައިވާނެ ކަމަށް ބެލެވެއެވެ. ނޯދަމްބަލޭންޑް އައްސޭރިފަށުގައިވާ ފާން އައިލެންޑްސްގައި ދެލައްކައެއްހާ ދޫނި އުޅޭނެ ކަމަށް ވަނީ އަންދާޒާ ކުރެވިފައެވެ. އަދި މި ޖަޒީރާތަކަކީ ބައިނަލްއަގްވާމީ ގޮތުން ހިމާޔަތް ކުރެވިފައިވާ ދޫނީގެ 23 ބާވަތެއްގެ ވެށި ވެސް މެއެވެ. މީގެ ތެރެއިން ބައެއް ދޫނިތަކުގައި، ކުރެވޭ އެކި ދިރާސާތަކުގެ ތެރެއިން، އެސޮރުމެންގެ އުދުހޭ ދުރުމިން އަދި ދަތުރު ކުރާ ތަންތަނުގެ މައުލޫމާތު އެނގޭގޮތަށް ޑިވައިސްތައްވެސް ހަރުކުރެވިފައިވާ ކަމަށް ވެއެވެ.
ފާން އައިލަންޑްސްގެ ޖެނެރަލް މެނޭޖަރު ވިދާޅުވި ގޮތުގައި އިނގިރޭސި ނެޝަނަލް ޓްރަސްޓްގެ ފަރާތުން އެރަށްތައް ބަލަހައްޓަމުންދާތާ މިވީ ސަތޭކައެއްހާ އަހަރުތެރޭވެސް ދޫނިތަކަށް މިވަރުގެ ބަލިމަޑުކަމެއް ދިމާވެފައެއް ނުވެއެވެ. އަދި މިކަން ހައްލުކުރުމަށް ކަންބޮޑުވުމާއެކު އަވަސް ފިޔަވަޅުތަކެއް އަޅަން ޖެހިފައިވާ ކަމަށް އޭނާ ވިދާޅުވިއެވެ.
