ބަސް ސްޓޮޕްތައް ކަނޑައެޅުން ލަސްވަނީ ޕާކިންއަށް ބަދަލު ގެންނަން ޖެހޭތީ: ނަރީޝް

މިނީ ބަހުގެ ޚިދުމަތް ފަށަން ބަސް ސްޓޮޕްތައް ބަހައްޓާނެ ތަންތަން ކަނޑައެޅުން ލަސްވެފައިވަނީ މާލޭގެ ޕާކިންއަށް ބަދަލު ގެންނަން ޖެހޭތީ ކަމަށް މާލެ ސިޓީ ކައުންސިލްގެ ޑެޕިއުޓީ މޭޔަރު އަހުމަދު ނަރީޝް ވިދާޅުވެއްޖެއެވެ.

ރާއްޖެ ޓްރާންސްޕޯޓް ލިންކް (އާރްޓީއެލް)ގެ ދަށުން މިނީ ބަހުގެ ޚިދުމަތް މާލެ ތެރޭގައި ދިނުމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) އާއި ސަރުކާރާ ގުޅިގެން ދަނީ މަސައްކަތްކުރަމުންނެވެ. މި ޚިދުމަތް ފަށައިގަތުމަށް ބެނުންވާ ބަސްތައް މިހާރު ވަނީ ލިބިފައެވެ. މި މަސް ނިމުމުގެ ކުރިން މި ޚިދުމަތް ފެށުމަށް އެމްޓީސީސީން މަސައްކަތްކުރަމުންދާއިރު، އަދިވެސް ބަސް ސްޓޮޕްތައް ބަހައްޓަން މާލެ ސިޓީ ކައުންސިލްގެ ހުއްދަ ލިބިފައިނުވާކަމަށް އެމްޓީސީސީން ވަނީ ބުނެފައެވެ.

Advertisement

މިކަމާއި ގުޅިގެން ސިޓީ ކައުންސިލްގެ ޑެޕިއުޓީ މޭޔަރު ރާއްޖެއެމްވީއަށް ވިދާޅުވީ ބަސް ސްޓޮޕްތައް ބަހައްޓާނެ ތަންތަން ފައިނަލްކުރުމުގެ މަސައްކަތް ރައީސް އޮފީހާއި، ޓްރާންސްޕޯޓް މިނިސްޓްރީއާއި، ޕްލޭނިން މިނިސްޓްރީ އަދި އެމްޓީސީސީއާ ގުޅިގެން ކުރަމުންދާކަމަށެވެ. މިކަމުގެ ބައްދަލުވުންތައްވެސް ބާއްވަމުންދާކަމަށާއި، މި ބައްދަލުވުންތަކުގައި ބަސް ސްޓޮޕްތައް ފައިނަލް ކުރުމުގެ މަސައްކަތް ކުރިއަށްދާކަމަށް ނަރީޝް ވިދާޅުވިއެވެ.

ނަރީޝް ވިދާޅުވީ މިހާރު ބަސް ސްޓޮޕްތައް ބަހައްޓަން ކަނޑައަޅާފައިވާ ބައެއް ތަންތަނަށްވެސް ބަދަލު ގެންނަމުންދާ ކަމަށެވެ. އެއީ މި މަސައްކަތް ކުރަންޖެހެނީ މާލޭގެ ޕާކިންއަށް އިތުރު މައްސަލައެއް ދިމާނުވާގޮތަށް ވާތީ ކަމަށް ނަރީޝް ވިދާޅުވިއެވެ. އައު ޕާކިން ސަރަހައްދު ހެދުމަށް ބޭނުންވާ ބިންތައް ހޯމަ ދުވަހުގެ ބައްދަލުވުމަށްފަހު ރައީސް އޮފީހުން ދޭނެ ކަމަށް ބެލެވޭ ކަމަށް ނަރީޝް ވިދާޅުވިއެވެ. އަދި ބިންތައް ދިންހާ އަވަހަކަށް ޕާކިން ސަރަހައްދު ބަދަލުކޮށް ބަސް ސްޓޮޕްތައް ފައިނަލް ކުރެވިގެންދާނެ ކަމަށް ނަރީޝް ވިދާޅުވިއެވެ.

ނަރީޝް ވިދާޅުވީ މިކަމާއި ގުޅޭގޮތުން މިހާތަނަށް ބޭއްވި ހުރިހާ ބައްދަލުވުމެއްގައި މާލެ ސިޓީ ކައުންސިލުން ބައިވެރިވެފައިވާކަމަށެވެ. އަދި ސިޓީ ކައުންސިލުން ދޭންވާ އެއްބާރުލުންވެސް ދެމުންދާކަމަށް ނަރީޝް ވިދާޅުވިއެވެ.

ރާއްޖެޓީވީގެ ފަލަސުރުޚީ ޕްރޮގްރާމެއްގައި ވާހަކަދައްކަވަމުން އެމްޓީސީސީގެ ސީއީއޯ އާދަމް އާޒިމް ވަނީ މި މަސައްކަތުގައި ސިޓީ ކައުންސިލްގެ އެއްބާރުލުން ނުލިބޭކަމަށް ވިދާޅުވެފައެވެ. ބަސް ސްޓޮޕްތައް ހެދުމަށް ބޭނުންވާ ހުއްދައަށް ސިޓީ ކައުންސިލުގައި އެދިފައިވާ ކަމަށާއި، ނަމަވެސް ސިޓީ ކައުންސިލުން މިހާތަނަށް އެމްޓީސީސީގެ އެއްވެސް ސިޓީއަކަށް ޖަވާބު ދީފައިނުވާކަމަށް އާޒިމް ވިދާޅުވިއެވެ.

އެމްޓީސީސީން ވަނީ ރާއްޖޭގެ 4 ސަރަހައްދެއްގައި އާރްޓީއެލް މީނީ ބަހުގެ ޚިދުމަތް ފަށަން ނިންމާފައެވެ. އެގޮތުން، މި ޚިދުމަތް ފަށަން ބޭނުންވާ 41 ބަހުގެ ތެރެއިން 36 ބަސް މިހާރު ވަނީ ރާއްޖެއަށް ގެނެސްފައެވެ. އެއީ މާލެ އާއި އައްޑޫ ސިޓީ އާއި ފުވައްމުލައް ސިޓީގެ އިތުރުން ލ. އަތޮޅުގައެވެ.

އެ ކުންފުނިން މައުލޫމާތުދޭ ގޮތުގައި މާލޭގައި އާރްޓީއެލް މިނީ ބަހުގެ ޚިދުމަތް ފެށުމުން ކޮންމެ 10 މިނެޓަކުން ބަސް ސްޓޮޕުތަކުން ދަތުރުތައް އޮންނާނެއެވެ. މި މަސައްކަތަށް ގެނެސްފައިވާ މިނީ ބަސްތަކަކީ 20-25 މީހުންގެ ޖާގައިގެ ބަސްތަކެކެވެ.