އޮފިޝަލް ލިވަޕޫލް ސަޕޯޓާސް ކްލަބް އޮފް މޯލްޑިވްސް (އޯއެލްއެސްސީ) އިން އިސްނަގައިގެން ޚާއްސަ އެހީއެއް ބޭނުންވާ ފަރާތްތަކަށް އެހީވުމުގެ ހަރަކާތެއް ފަށައިފިއެވެ.

"ފްރީޑަމް ޗެރިޓީ"ގެ ނަމުގައި ކުރިއަށްގެންދާ މި ޙަރަކާތް ރަސްމީކޮށް ފަށާފައިވަނީ ހުކުރު ދުވަހުގެ ރޭ ޒުވާނުންގެ މަރުކަޒުގައި ބޭއްވި ރަސްމިއްޔާތެއްގައެވެ. މި ހަރާކާތުގެ ދަށުން، އެ ޖަމިއްޔާއިން ފަންޑުރައިސް އިވެންޓެއް ކުރިއަށް ގެންގޮސްގެން ދެ ފަރާތަކަށް ޕަވާ ވީލް ޗެއަރއެއް ހަދިޔާކުރުމަށް ވަނީ ނިންމާފައެވެ.

އެ ޖަމިއްޔާއިން ނިންމާފައިވަނީ ފަންޑު ހޯދުމުގެ މަސައްކަތް ކުރިއަށްގެންދާނީ ސަޕޯޓަރުން މެޗު ބަލަން އިންތިޒާމުކުރާ އިވެންޓްތަކުގެ ތެރެއިން ކަމަށެވެ. އެ ޖަމިއްޔާއިން މައުލޫމާތުދީފައިވާ ގޮތުގައި ފަންޑުރައިސިން ކުރިއަށްގެންދާނީ މެޗު ބެލުމަށް ޓިކެޓު ވިއްކުމުގެ އިތުރުން ޗެރިޓީ ޓިކެޓު ވިއްކައިގެންނެވެ.

މެޗު ބެލުމަށް ވިއްކާ ޓިކެޓުގެ އަގު ވެސް އެ ޖަމިއްޔާއިން ވަނީ ހާމަކޮށްފައެވެ. އެގޮތުން މެޗު ބެލުމުގެ ޓިކެޓު ވިއްކުމަށް ހަމަޖެހިފައިވަނީ 150 ރުފިޔާއަށެވެ. އޭގެ ތެރެއިން 50 އިންސައްތަ ޚަރަދުކުރާނީ އެހީގެ ފަންޑަށެވެ. މީގެ އިތުރުން ޗެރިޓީ ޓިކެޓު ވިއްކުމަށް ހަމަޖެހިފައިވަނީ ފަސް ކެޓަގަރީއަކަށް ބަހާލައިގެންނެވެ. އޭގެ ތެރޭގައި ހިމެނޭ ޗެރިޓީ ރެޑްގެ އަގަކީ 100 ރުފިޔާއެވެ. ޕްލެޓިނަމްގެ އަގުގެ ގޮތުގައި 500 ރުފިޔާ ހަމަޖައްސާފައިވާއިރު، ކޮޕައިޓްގެ އަގަކީ 1000 ރުފިޔާއެވެ. ދެން މި ކެޓަގަރީގައި ހިމެނޭ ޝޭންކްސް 5000 ރުފިޔާއަށް ވިއްކާއިރު، 10،000 ރުފިޔާއަށް ވިއްކުމަށް ހަމަޖެހިފައިވަނީ މައިޓީ ރެޑްއެވެ.

އެ ޖަމިއްޔާއިން ހާމަކޮށްފައިވާ މައުލޫމާތަށް ބަލާއިރު، މި ހަރަކާތް ނިންމާލުމަށް އަމާޒު ހިފާފައިވަނީ އަންނަ އޮކްޓޫބަރު މަހުގެ ނިޔަލަށެވެ. އަދި މި ހަރަކާތުގެ ތެރެއިން ވީލްޗެއަރ ގަތުމާއި، ހަވާލުކުރުން ނޮވެމްބަރު މަހުން ފެށިގެން ކުރިއަށްދާނެއެވެ.

ރާއްޖޭގައި ތިބި ލިވަޕޫލަށް ސަޕޯޓުކުރާ ސަޕޯޓަރުން މީހުން ހިމެނޭ މި ޖަމިއްޔާއަކީ ވަރަށް ހަރަކާތްތެރި ޖަމިއްޔާއެކެވެ.