ކުރީ ސަރުކާރުން ފެން ރައްކާކުރާ ނިޒާމު ގާއިމުކޮށްފައިވާ 33 ރަށަކަށް ފެން ފޯރުކޮށްދޭން ޖެހުނު – އޮޑިޓް
ގިނަ ރަށްރަށަށް ކުއްލި ހާލަތުގައި ފެން ފޯރުކޮށްދީފައިވޭ
ރަށެއްގައި ގާއިމްކޮށްފައި ހުރި ފެން ޕްލާންޓެއް
ކުރީ ސަރުކާރުން ވާރޭ ފެން ރައްކާކުރާ ނިޒާމު ގާއިމްކޮށްފައިވާ 33 ރަށަކަށް މި މަޝްރޫއު ނިންމާފައިވާ މުއްދަތުގެ ފަހުންވެސް ކުއްލި ހާލަތުގައި ފެން ފޯރުކޮށްދީފައިވާކަމަށް ހޫނު މޫސުމުގައި ރާއްޖޭގެ ރަށްތަކަށް ބޯފެން ފޯރުކޮށްދިނުމާ ގުޅޭ ޕަރޕޯމެންސް އޮޑިޓް ރިޕޯޓުގައި ބުނެފިއެވެ.
މި އޮޑިޓްގައި ވާރޭފެން ރައްކާކުރާ ނިޒާމު ގާއިމުކުރުމަށް ހިންގުނު މަޝްރޫއުގެ ނަތީޖާ ހާސިލްވެފައިވާ މިންވަރު ބަޔާންކޮށްދީފައިވާ ބައިގައި ބުނެފައިވަނީ ފެން ފޯރުކޮށްދިނުމުގެ މައްސަލަ ހައްލުކުރުމަށްޓަކައި 2015 ވަނަ އަހަރު މިނިސްޓްރީ އޮފް އެންވަޔަރަންމަންޓުން ވާރޭފެން ރައްކާރުމުގެ ނިޒާމު ގާއިމުކުރުމުގެ މަސައްކަތް ފަށާފައިވާކަމަށެވެ. މިގޮތުން މި މައްސަލައަށް ހައްލެއް ހޯދުމަށް މުޅި ރާއްޖޭގައި ޖުމްލަ 47 ރަށެއްގައި މި މަޝްރޫއުގެ މަސައްކަތް ނިންމާފައިވާކަމަށެވެ. މީގެ އިތުރުން 8 ރަށެއްގައި މަޝްރޫއު ހިންގުމަށް ރޭވި ނަމަވެސް، ސަރުކާރުގެ ސިޔާސަތު ބަދަލުވުމާ ގުޅިގެން ކުރިއަށް ނުގެންދިޔުމަށް ނިންމާފައިވާ ކަމަށެވެ.
އަތޮޅުތެރޭގެ އެކި ރަށްރަށުގައި ވާރޭފެން ރައްކާކުރާ ނިޒާމް ގާއިމުކުރެވިފައިވީ ނަމަވެސް މީގެ ތެރެއިން ގިނަ ރަށްރަށަށް ކުއްލި ހާލަތުގައި ފެން ފޯރުކޮށްދީފައިވާކަން ފާހަގަކުރެވުނު ކަމަށް މިއޮޑިޓުގައި ބުނެފައިވެއެވެ. އެގޮތުން، މި މަޝްރޫއުތައް ހިންގާފައިވާ 47 ރަށުގެ ތެރެއިން 33 ރަށަކަށް މި މަޝްރޫއު ނިންމާފައިވާ މުއްދަތުގެ ފަހުންވެސް ކުއްލި ހާލަތުގައި ފެން ފޯރުކޮށްދީފައިވާކަން ފާހަގަކުރެވިފައިވާކަމަށް ވެސް ވަނީ ބުނެފައެވެ. މިހެން ދިމާވަނީ، ރަށަށް އެކަށީގެންވާ ކެޕޭސިޓީގެ ހަޓުތައް ނެތުމާއި ފެން ހަޓުތައް ސާފުކޮށް ވާރޭފެން ނެގުމަށް ތައްޔާރުކޮށްފައި ނެތުމުގެ ސަބަބުން ކަމަށް ބައެއް ކައުންސިލްތަކުން މައުލޫމާތު ދީފައިވާކަމަށް މިއޮޑިޓުގައި ވަނީ ބުނެފައެވެ.
އަދި ވީހާވެސް ގިނަ ރައްޔިތުންނަށް ސާފު ބޯފެނުގެ ޚިދުމަތް ފޯރުކޮށްދީ ފެނަށް ޖެހޭ މައްސަލައަށް އަވަސް ހައްލެއް ހޯދައި އެކަމަށް ދައުލަތުން ކުރާ ހޭދަ ކުޑަކުރުމަށް ހިންގާ މަޝްރޫއުތަކުގެ ބޭނުން އެކަށީގެންވާގޮތުގައި ނުހިފޭނަމަ، ދައުލަތުން މިކަމަށް ކުރަންޖެހޭ ޚަރަދުތައް އަހަރުން އަހަރަށް އިތުރުވެ މި މައްސަލައަށް ދާއިމީ ހައްލެއް ނުލިބި ދިގުލައިގެން ދާނެކަން އޮޑިޓްގައި ފާހަގަކޮށްފައިވެއެވެ.
މީގެ އިތުރުން ފެން ރައްކާކުރާ ނިޒާމު މެއިންޓެއިންކޮށް ބަލަހައްޓާފައި ނުވާ ކަމަށް ރިޕޯޓުގައި ބުނެފައިވެއެވެ. އެގޮތުން އިރުވައި މޫސުމާއި ގުޅިގެން ފެނަށްޖެހޭ މައްސަލަ ހައްލުކުރުމަށް ރަށްތަކަށް އަމާޒުކޮށް ފެން ރައްކާކުރެވޭ ގޮތަށް ތާނގިތައް ބަހައްޓައިގެން ފެން ނެގޭ ގޮތަށް އެކި ރަށްތަކުގައި މަޝްރޫއުތައް ހިންގައި، އޭގެ ބޭނުން ކުރެވެމުންދާ ކަމަށް ބުނެފައިވެއެވެ. އެގޮތުން، މިފަދަ މަޝްރޫއުތައް ހިންގާފައިވާ ރަށްތަކުގައި، ފެނަށް ޖެހުމުގެ މައްސަލަ ހައްލުކުރެވިފައިވަނީ ކިހާ މިންވަރަކަށްތޯ ދެނެގަތުމާއި، ފެން ތާނގިތައް ބަލަހައްޓަމުންދާ ގޮތާއި ފެން ރައްކާކުރެވޭ ތާންގިތަކުގެ ސާފުތާހިރުކަމާއި އެކަމާ ގުޅޭ އެހެނިހެން ކަންތައްތައް ދެނެގަތުމަށް މި އޮޑިޓުގައި އިންސްޕެކްޝަނެއް ކުރިއަށް ގެންގޮސްފައިވާ ކަމަށް ބުނެފައިވެއެވެ.
މި އިންސްޕެކްޝަނުން ފާހަގަވި ގޮތުގައި ރ. އަތޮޅުގެ ތިން ރަށެއްގެ އިޖްތިމާއީ ތާނގީތައް ގަވާއިދުން ސާފުކޮށް ބަލަހައްޓަމުން ނުދާކަމާއި ބައެއް ފެން ތާނގީތައް ހަލާކުވެ، މަރާމާތު ނުކޮށް ގިނަ ދުވަސްވެފައިވުމާއި ތާނގީތަކުގެ މަތީގައި ހިރަފުސްބޯވެފައިވާ ކަމަށް ބުނެފައިވެއެވެ. އަދި، އިންސްޕެކްޝަން ކުރިއަށްގެންދިޔަ ރަށްތަކުގެ ކައުންސިލު އިދާރާތަކުން، ތާނގީތަށް ސާފުކޮށް ބަލަހައްޓަމުންދާ ގޮތުގެ ތަފްސީލުތައް ބަލަހައްޓާފައި ނުވާކަން ފާހަގަކުރެވުނު ކަމަށް ވެސް ރިޕޯޓްކޮށްފައިވެއެވެ.
އަދި މި ރަށްރަށުގައި ގާއިމުކޮށްފައިވާ މިފަދަ ޚިދުމަތްތައް ރައްޔިތުންނަށް ފޯރުކޮށްދިނުމަކީ ޤާނޫނު ނަންބަރު (2010/7 ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ޤާނޫނު) ދަށުން ކައުންސިލާ ހަވާލުކޮށްފައިވާ ކަމެއްކަމުން، އެފަދަ ތަންތަން ބަލަހައްޓައި، އެކަމަށް ބޭނުންވާ ފައިސާ ބަޖެޓްކޮށް އެތަންތަން މަރާމާތުކޮށް ގަވާއިދުން ބެލެހެއްޓުމަކީ ކައުންސިލުން ކުރަންޖެހޭ ކަމެއް ކަމަށް ބުނެފައިވެއެވެ.
ނަމަވެސް، ފެން ހަޓު ކައުންސިލާ ރަސްމީ ހައިސިއްޔަތަކުން ހަވާލުކޮށްފައިވާކަމުގެ ލިޔުމެއް ނެތްކަމާއި އެތަންތަން ސާފުކޮށް ބެލެހެއްޓުމުގެ އުސޫލެއް އެކުލަވާލެވި އެކަމަށް އެއްބަސްވެވިފައި ނުވާކަން ފާހަގަކޮށްފައިވެއެވެ. މީގެ އިތުރުން، އިޖްތިމާއީ ތާނގީތަކުގެ މަރާމާތެއް ކުރުމަށް ބޭނުންޖެހޭ ހާލަތްތަކުގައި އެކަމަށް ބޭނުންވާ ބަޖެޓު ހަމަޖެހިފައިނުވާކަމާއި މަރާމާތުގެ ކަންކަން ކުރަންޖެހެނީ ކައުންސިލުގެ ރިކަރަންޓު ޚަރަދުންކަމަށް ބައެއް ކައުންސިލު އިދާރާތަކުން މައުލޫމާތު ދީފައިވާކަމާ، މިއީ ދެމެހެއްޓެނިވި ގޮތެއްގައި ތާނގީތަކުގެ ބޭނުން ރައްޔިތުންނަށް ލިބޭނެ މުއްދަތު ކުރުވާނެ ކަމެއްކަން ފާހަގަކޮށްފައިވެއެވެ.
އަދި މި ކަންކަން އިސްލާހުކުރަން ދެ ގޮތަކަށް ލަފާދީފައިވެއެވެ. އެއީ ވާރޭފެން ރައްކާކުރާ ނިޒާމުތަކުގެ މަޝްރޫއު ނިންމައި، ކައުންސިލު އިދާރާތަކާ ލިޔުމުން ހަވާލުކުރުމަށް މިނިސްޓްރީ އޮފް އެންވަޔަރަންމަންޓް، ކްލައިމެޓް ޗޭންޖް އެންޑް ޓެކްނޯލޮޖީއަށް ދެންނެވުމާއި، ވާރޭ ފެން ރައްކާކުރާ ނިޒާމުތައް ބަލަހައްޓައި މަރާމާތުކުރުމަށް އުސޫލެއް ކަނޑައަޅައި، އެ އުސޫލާ އެއްގޮތަށް މިފަދަ ތަންތަން މަރާމާތުކޮށް ބެލެހެއްޓޭނެ އިންތިޒާމް ހަމަޖެއްސުމަށް ރަށު ކައުންސިލްތަކަށް އެންގުން ހިމެނެއެވެ.
