ދުވާފަރު ކައުންސިލާއި އަންހެނުންގެ ކޮމިޓީގެ ޚިޔާނާތްތަކެއް ފަޅާއަރައިފި

ރ. ދުވާފަރުގެ ރަށު ކައުންސިލާއި އަންހެނުންގެ ތަރައްގީއަށް މަސައްކަތް ކުރާ ކޮމިޓީގެ މެމްބަރުންގެ ޚިޔާނާތްތަކެއް ފަޅާ އަރައިފިއެވެ.

ލޯކަލް ގަވަރމަންޓް އޮތޯރިޓީ (އެލްޖީއޭ) އިން އާއްމުކޮށްފައިވަނީ ދުވާފަރު ކައުންސިލްގެ ހާއްސަ މޮނިޓަރިން ރިޕޯޓުގައި ބުނެފައިވާ ގޮތުގައި އެ ކައުންސިލް މެމްބަރުންނާއި ޑަބްލިއުޑީސީ މެމްބަރުންނާއި ކައުންސިލްގެ ބައެއް މުވައްޒަފުން ޚިޔާނާތުގައި ހިމެނެއެވެ. އެގޮތުން، މާލިއްޔަތު ގަވާއިދާއި ސިވިލް ސާވިސް ގަވާއިދާއި މާލީ ކަންކަމާ ގުޅުންހުރި ގާނޫނުތަކާ ޚިލާފަށް އެ ކައުންސިލުން އަމަލު ކޮށްފައިވާ ކަމަށް މި ރިޕޯޓުގައި ވަނީ ބުނެފައެވެ.

އެ ރިޕޯޓުގައި ބުނެފައިވާ ގޮތުގައި މާލީ ކަންކަމާ ގުޅޭ ލިޔެކިޔުންތައް ނެތި މެމްބަރުންގެ އަމިއްލަ އެކައުންޓަށް ގިނަ އަދަދެއްގެ ފައިސާ ވަނީ ޖަމާކޮށްފައެވެ. އަދި ނަގުދު ފައިސާއިން ވެސް ކައުންސިލަރުންނާއި މުވައްޒަފުންނާއި ޑަބްލިއުޑީސީ މެމްބަރުންނަށް ފައިސާ ބަހާފައިވާ ކަމަށް ވަނީ ބުނެފައެވެ. މި ފައިސާތަކުގެ ތަފްސީލު އެނގޭ އެއްވެސް ލިޔެކިޔުމެއް ނެތް ކަމަށް ވެސް ވަނީ ބުނެފައެވެ.

އެލްޖީއޭއިން ވަނީ މި ރިޕޯޓުގައި ދުވާފަރު ކައުންސިލުން ފާހަގަ ކުރެވުނު 34 މައްސަލައެއް ފާހަގަކޮށް އެކަންކަން ހައްލު ކުރުމަށް ލަފާދީފައެވެ. މީގެ ތެރޭގަިއ ގިނައިން ހިމެނެނީ މާލީކަންކަމުގައި ފަރުވާ ކުޑަވުމާއި ޚިޔާނަތުގެ ކަންކަމެވެ.

އެލްޖީއޭ އިން ބުނީ، 'އިން-ކައިންޑް' ގެ ގޮތުގައި ފައިސާ އާއި ތަކެތި މާލިއްޔަތުން ދިނުމާއި ކައުންސިލްގެ މެންޑޭޓުގައި ނުހިމެނޭ ކަންކަމަށް ވެސް ދުވާފަރު ކައުންސިލުން ބޮޑެތި ހަރަދުތަކެއް ކޮށްފައިވާ ކަމަށެވެ.

މި ރިޕޯޓުން ދައްކާ ގޮތުގައި ދުވާފަރު ކައުންސިލްގެ އެސިސްޓެންޓް ޑިރެކްޓަރ މުޙައްމަދު އަލިފުޅުގެ އެކައުންޓަށް ވަނީ ގިނަ އަދަދެއްގެ ފައިސާ ޖަމާ ކޮށްފައެވެ. އެގޮތުން ލިޔެކިޔުމުން އެއްވެސް ތަފްސީލެއް ނޭނގޭ 711،617 ރުފިޔާ އޭނާއަށް ނަގުދު ފައިސާގެ ގޮތުގައްޔާއި އެކައުންޓަށް ޖަމާކޮށްފައިވާ ކަމަށް ވަނީ ބުނެފައެވެ.

މުޙައްމަދު އަލިފުޅުގެ އިތުރުން ކައުންސިލް މެމްބަރު މުޙައްމަދު ޝާމުއަށް 447،837 ރުފިޔާ ލިބިފައިވާއިރު ކައުންސިލްގެ ނައިބު ރައީސް އިޒްމީލް އަހުމަދު އަށް 252،048 ރުފިޔާ، ކައުންސިލް މެމްބަރު ޒުހުދާ އާދަމް އަށް 181،666ރުފިޔާ، ކައުންސިލްގެ ސެކެޓްރީ ޖެނެރަލް މުޙައްމަދު ނާސިހުއަށް 165،200.79 ރުފިޔާ، ކައުންސިލް މެމްބަރު އަހުމަދު ސަމޫހުއަށް 128،696.47 ރުފިޔާ، ކައުންސިލް މެމްބަރު އާމިނަތު ސަލާހުއަށް 119،535 ރުފިޔާ ވަނީ ލިބިފައެވެ.

އެ ރަށުގެ އަންހެނުންގެ ތަރައްގީއަށް މަސައްކަތް ކުރާ ކޮމިޓީއަށް ވަކި ތަފްސީލެއް ނެތި 21،981 ރުފިޔާ ދީފައިވާއިރު ކޮމިޓީގެ ރައީސް އާމިނަތު އަހުމަދުއަށް 67،820 ރުފިޔާ ވަނީ ލިބިފައެވެ. އަދި ކޮންޓްރެކްޓް މުވައްޒަފެއް ކަމަށްވާ އަހުމަދު ޝާމިލު އަށް 6042 ރުފިޔާ ވަނީ ލިބިފައިވާއިރު މަސައްކަތު މީހެއްގެ ގޮތުގައި މަސައްކަތް ކުރާ ލުގުމާން އަބްދުއްރަހުމާނަށާއި ސަޕޯޓް ސްޓާފް، އަބްދުﷲ ނާޝިދުއަށާއި ކައުންސިލް މެމްބަރު މަރިޔަމް ޔަޝްފާއަށް ވެސް ލިޔެކިޔުމުގެ އެއްވެސް ތަފްސީލެއް ނެތް ގޮތަށް ވަނީ މަދު އަދަދުން ނަމަވެސް ފައިސާ ލިބިފައެވެ.

އެލްޖީއޭގެ ރިޕޯޓުގައި ބުނެފައިވާ ގޮތުން ކައުންސިލުން މުދަލުގެ ޒަކާތުގެ ގޮތުގައި ދިނުމަށް ބޭނުންވާ 318،600 ރުފިޔާ ވެސް މިދިޔަ އަހަރުގެ ސެޕްޓެމްބަރު މަހު ކައުންސިލްގެ އެސިސްޓެންޓް ޑިރެކްޓަރު މުހައްމަދު އަލިފުޅުގެ އަމިއްލަ އެކައުންޓަށް ވަނީ ޖަމާކޮށްފައެވެ. އަދި ފިތުރު ޒަކާތަށް ބަހަން ބޭނުންވާ 54،000 ރުފިޔާ ވެސް ކައުންސިލް މެމްބަރު ޒުހުދާ އާދަމްއާ ނަގުދު ފައިސާގެ ގޮތުގައި ހަވާލު ކޮށްފައިވާ ކަމަށާއި އެ ފައިސާ ލިބެންވީ މީހުންނަށް ލިބިފައިވާ ކަމެއް އެއްވެސް ލިޔުމަކުން ކަށަވަރު ނުކުރެވޭ ކަމަށް އެ ރިޕޯޓުގައި ވަނީ ބަޔާންކޮށްފައެވެ.