އެފްރިކާގެ މޮޅު ކުޅުންތެރިޔާގެ މަގާމު ދެވަނަ ފަހަރަށް މާނޭއަށް
މީގެ ކުރިން މާނޭ ވަނީ 2019 ވަނަ އަހަރު މި އެވޯޑު ހޯދާފައި
އެވޯޑާއެކު މާނޭ
އެފްރިކާގެ އެންމެ މޮޅު ފުޓުބޯޅަ ކުޅުންތެރިޔާއަށް ދޭ އެވޯޑު ސެނެގޯލްގެ ސަޑިއޯ މާނޭ ހޯދައިފިއެވެ.
މިއީ މާނޭ މި އެވޯޑު ހޯދި ދެ ވަނަ ފަހަރެވެ. މީގެ ކުރިން މާނޭ ވަނީ 2019 ވަނަ އަހަރު މި އެވޯޑު ހޯދާފައެވެ. ހުކުރު ދުވަހުގެ ރޭ އޮތް އެވޯޑު ދިނުމުގެ ރަސްމިއްޔާތުގައި މާނޭ މި އެވޯޑު ހޯދީ މިސްރުގެ މުޙައްމަދު ސަލާހާއި، ސެނެގާލްގެ އެޑޮއާޑް މެންޑީއާ ވާދަކޮށެވެ.
އެވޯޑު ހާސިލްކުރުމަށްފަހު މާނޭ ބުނީ ދެ ވަނަ ފަހަރަށް އެ އެވޯޑު ލިބުމުން އޭނާ ވަރަށް އުފާވާ ކަމަށެވެ. މާނޭ ވަނީ ޤައުމީ ޓީމާއި، ކުލަބް ލެވެލްގައި އޭނާއަށް އެހީތެރިވެދިން ކޯޗުންނާއި އޮފިޝަލުންނަށް ޝުކުރު އަދާކުރާ ކަމަށް ބުނެފައެވެ.
މިއަހަރުގެ ކުރީކޮޅު މާނޭ ވަނީ ސެނެގޯލްއާއިއެކު އެފްރިކަން ކަޕް އޮފް ނޭޝަންސް ކާމިޔާބުކޮށްފައެވެ. އަދި އޭރު އޭނާ ކުޅުނު ކުލަބް، ލިވަޕޫލާއެކު މާނޭ ވަނީ ލީގު ކަޕާއި އެފްއޭ ކަޕް ކާމިޔާބުކޮށް، ޗެމްޕިއަންސް ލީގުގެ ފައިނަލް ކުޅެފައެވެ.
ސީޒަން ނިމުމާއެކު މާނޭ ވަނީ ލިވަޕޫލް ދޫކޮށް، ޖަރުމަނުގެ ބަޔާން މިއުނިކަށް ބަދަލުވެފައެވެ.
