ޖާބިރު މިއަދު ހުކުރަށް ވަޑައިގަތީ ދިޔާނާ ޑީއާރުޕީއާ ގުޅިވަޑައިގެންފައިވާ ކަމުގެ ޚަބަރު ދެއްވާފައި
22 ޖުލައި 2022 | ހުކުރު 10:46ދިޔާނާ ވަނީ މީގެ ކުރިންވެސް ޑީއާރުޕީގައި ހަރަކާތްތެރިވެފައި
ދިޔާނާ ސައީދު
ކުރީގެ ބަންޑާރަނާއިބު ދިޔާނާ ސައީދު ދިވެހި ރައްޔިތުންގެ ޕާޓީ (ޑީއާރުޕީ)އަށް ސޮއިކުރައްވައިފިއެވެ.
ޑީއާރުޕީގެ ލީޑަރު، ކާށިދޫ ދާއިރާގެ މެމްބަރު އަބްދުﷲ ޖާބިރު މިއަދު ބާރަށުގައި ހުންނަވާ ހުކުރަށް ވަޑައިގަތުމުގެ ކުރިން އާންމުކުރެެއްވި ވީޑިއޯއެއްގައި ވަނީ މިކަން ހާމަކުރައްވާފައެވެ.
ދިޔާނާ ޑީއާރުޕީއާ ގުޅިވަޑައިގެންފައިވާކަން ހާމަކުރައްވައި ޖާބިރު އާންމުކުރެއްވި ވީޑިއޯގައި ވަނީ ދިޔާނާ މީގެ ކުރިންވެސް ޑީއާރުޕީގައި މަސައްކަތްކުރައްވާފައިވާކަން ފާހަގަކުރައްވާފައެވެ. މީގެ ކުރިން ދިޔާނާ ވަނީ ޑީއާރުޕީގެ ކައުންސިލް މެމްބަރެއްގެ މަގާމު އަދާކުރައްވާފައެވެ. ދިޔާނާއަކީ އެޕާޓީގެ ފައުންޑިންގ މެމްބަރަކަށްވާއިރު، ޑީއާރުޕީގެ އަސާސީ ގަވާއިދު އުފަންކުރުމުގައި ދިޔާނާ މަސައްކަތްތަކެއް ކުރައްވާފައިވާކަން ޖާބިރު ފާހަގަކުރެއްވިއެވެ.
އެންމެ ފަހުން ދިޔާނާ ހުންނެވީ އެމްޑީޕީގައެވެ. މި ސަރުކާރު ގެނައުމުގައިވެސް ދިޔާނާ ވަރަށް އިސް ރޯލެއް އަދާކުރައްވާފައިވާކަމަށް ޖާބިރު ވިދާޅުވިއެވެ. ދިޔާނާއަކީ ގާބިލް ބޭކަނބަލެއް ކަމުގައި ޖާބިރު ވިދާޅުވިއެވެ.
