ދިރުވާލައިގެން ރާއްޖެއަށް އެތެރެކުރަން އުޅުނު 8 މިލިއަން ރުފިޔާގެ މަސްތުވާތަކެތި އަތުލައިގެންފި

ރާއްޖެ އެތެރެކުރަން އުޅުނު 8 މިލިއަން ރުފިޔާގެ މަސްތުވާތަކެތި އަތުލައިގެންފިއެވެ.

ކަސްޓަމްސްއިން ބުނީ، އެ ތަކެތި އަތުލައިގެންފައިވަނީ ވައިގެ މަގުން އިތިއޯޕިއާއިން ރާއްޖެ އައި 2 މީހެއްގެ އަތުން ކަމަށެވެ. އެ ދެމީހުންވެސް މަސްތުވާތަކެތި އެތެރެކުރުމަށް މަސައްކަތް ކޮށްފައިވަނީ ދިރުވާލައިގެން ހަށިގަނޑުގެ ތެރޭގައި ފޮރުވައިގެން ކަމަށް ކަސްޓަމްސްއިން ބުނެއެވެ.

Advertisement

އެ ދެ ފަސިންޖަރުންނަކީ އުމުރުން 41 އަހަރުގެ އިނގިރޭސިވިލާތުގެ 2 ފިރިހެނުންނެވެ.

ކަސްޓަމްސްއިން މައުލޫމާތު ދޭ ގޮތުގައި އެމީހުން ރާއްޖެ އައިސްފައިވަނީ 2022 ޖޫން 28 ގައެވެ. އޭރު އެމީހުންގެ އަމަލުތައް ހުރި ގޮތުން އެމީހުންނާމެދު ޝައްކު ކުރެވިގެން އެމީހުންގެ ހަށިގަނޑު ވަނީ ސްކޭން ކޮށްފައެވެ.

އެމީހުންގެ ހަށިގަނޑުގެ ތެރެއިން ފޮރިން ބޮޑީސް ފެނިފައިވާއިރު، އޭގެ ތެރޭގައި މަސްތުވާތަކެތީގެ ބާވަތެއްކަމަށްވާ "ކޮކެއިން" ހުރިކަމަށް ޝައްކު ކުރެވިފައިވެއެވެ. އެގޮތުން ފޮރިން ބޮޑީސް ގޮތުގައި ޖުމުލަ 220 ބުލެޓު ނަގާފައިވެއެވެ.

އެ ތަކެތީގެ ޖުމުލަ ބަރުދަނުގައި ޕެކިންއާއެކު، 2.328 ކިލޯގްރާމް ހުރިކަމަށްވެސް ކަސްޓަމްސްއިން މައުލޫމާތުދެއެވެ.

ކަސްޓަމްސްއިން މައުލޫމާތު ދޭ ގޮތުގައި އެތަކެތީގެ މަގުމަތީ އަގު 8،100،000 (އަށް މިލިއަން އެއްލައްކަ) ރުފިޔާއަށް އަރައެވެ.

މި މައްސަލައިގައި ޝާމިލުވާ މީހުންނާއި، އަތުލައިގަނެވުނު މަސްތުވާތަކެތި ކަމަށް ޝައްކު ކުރެވޭ ތަކެތި މިހާރު ވަނީ އިތުރަށް ތަހުގީގު ކުރުމަށް ފުލުހުންނާ ޙަވާލު ކުރެވިފައިވާކަމަށް ކަސްޓަމްސްއިން ބުނެއެވެ.

ނޮވެމްބަރު 2018ން ފެށިގެން މިހާތަނަށް 182 ކިލޯއަށްވުރެ ގިނަ މަސްތުވާތަކެތި ކަސްޓަމްސްއިން އަތުލައިގަނެފައިވެއެވެ. އެގޮތުން މަސްތުވާތަކެއްޗާ ދެކޮޅަށް ކުރާ މަސައްކަތްތަކުގެ ތެރެއިން ނޮވެމްބަރު 2018ން ފެށިގެން މިހާތަނަށް 182 ކިލޯއަށްވުރެ ގިނަ މަސްތުވާތަކެތި ކަސްޓަމްސްއިން އަތުލައިގަނެފައިވާއިރު، މިއީ އޭގެ ކުރީގެ 5 އަހަރާ އަޅައިބަލާއިރު، 32 އިންސައްތައަށްވުރެ އިތުރު އަދަދެއްކަމަށް ރައީސުލްޖުމްހޫރިއްޔާ އިބްރާހިމް މުޙައްމަދު ސާލިޙު ދާދި ފަހުން ވިދާޅުވެފައިވެއެވެ.