ހާސްކަން ފިލުވާލުމަށް ލުބްނާންގެ ރާޒުވާ މުބާރަތަށް ޝަރުތެއް ނެތް!

ހިމޭން ކުޅިވަރުތަކުގެ ތެރެއިންވެސް ރާޒުވާއަކީ އެ ކުޅިވަރަކަށް ގިނަ ބައެއްގެ ހިތްތަކުން ހާއްސަ ޖާގައަކާއި މަގާމެއް ދެވިފައި އޮންނަ، ޒަމާންވީ ކުޅިވަރެކެވެ. އަދުގެ ހަލަބޮލި ދުނިޔޭގެ ހަމަނުޖެހުންތަކުން ނުތަނަވަސްވެފައިވާ ސިކުނޑިތަކަށް ހަމަޖެހުން ގެނުވާ ކުޅިވަރެކެވެ. އެތައް އަހަރަކަށް ދިގުލާ ގޮސްފައިވާ އެތައް ކާރިސާއަކާ ކުރިމަތިލަމުން ދާ ލުބްނާންގެ ރާޒުވާ މައިދާނުންވެސް ދެނީ އެފަދަ މެސެޖެކެވެ. ކޮންމެ އަހަރެއްގެވެސް ޖުލައި 20 ވަނަ ދުވަސް ފާހަގަ ކުރަނީ ބައިނަލްއަގުވާމީ ރާޒުވާ ދުވަހުގެ ގޮތުގައި ކަމަށް ވާ އިރު، ލުބްނާންގައި ތިބި ރާޒުވާ ފޭނުންވެސް އެދުވަސް ފާހަގަ ކުރިއެވެ. ގައުމު އޮތް ހިތްދަތި ހާލަތުގެ މަތިން ހިނދު ކޮޅަކަށްވެސް ދުރުވެލުމަށެވެ.

ވެރިރަށް ބެއިރޫތުގެ ރަށްބޭރުގައި ގާއިމުކޮށްފައިވާ ރާޒުވާ މަރުކަޒު ތެރެއިން ފެނިގެން ދަނީ އާދަޔާ ޚިލާފު މަންޒަރެކެވެ. އުމުރުން 30 ގެ އަހަރުތައް ގުނަމުންދާ ޒުވާނަކާއެކު ރާޒުވާ ކުޅިބައިގެ އަނެއް ކޮޅުގައި އެ އިނީ އުމުރުން އެންމެ 6 އަހަރުގެ ކުއްޖެކެވެ. އަނެއް ކަނުގައި ޒުވާނަކާއެކު ރާޒުވާ ގަނޑެއް ޖަހަމުން އެ ދަނީ، އެއް އިރެއްގައި ލުބްނާންގެ ރާޒުވާ ޗެމްޕިއަންއެވެ. މިހާރު އޭނާ ގުނަމުން އެދަނީ އޭނާގެ އުމުރުން 70 އަހަރުތަކުގެ ދުވަސްތަކެވެ.

ކިޝްމަތު ސެންޓަރުގައި މި ހުރިހާ އެންމެންވެސް ކުޅެމުން އެ ދަނީ މުބާރާތެކެވެ. ބައިނަލްއަގުވާމީ ރާޒުވާ ދުވަސް ފާހަގަ ކުރުމުގެ ގޮތުން ލުބްނާންގައި ކުރިއަށް ގެންދާ ހާއްސަ ފެސްޓިވަލެއްގައެވެ.

ބައިނަލްއަގުވާމީ ރާޒުވާ ކޯޗް އަދި ރެފްރީ، ޗާލްސް ކޭލް ގެ ވާހަކަތައް އަޑު އަހާލުމުން ސަބަބު ސާފުވެއެވެ.

އެތައް އަހަރަކަށް ދިގުލާ ގޮސްފައިވާ ސިޔާސީ ހަމަނުޖެހުންތަކުގެ ރެކޯޑް އޮތް ލުބްނާނަށް އަދިވެސް ހިންދެމިލާނެ ވަގުތެއް ނުލިބެއެވެ. އިގުތިސާދީ ކާރިސާގެ ތަކުލީފުތައް އުފުލަމުންދަނިކޮށް ކޮވިޑް-19ގެ ރާޅުވެސް ބިންދާލީއެވެ.

ނަމަވެސް ރާޒުވާއަށް ލޯބި ކުރާ ފަރާތްތަކަށް އުފާވެރި ވަގުތުކޮޅެއް ހޯދާ ދިނުމަށް މާކް ފައްރާ ދަނީ ބުރަ މަސައްކަތްތަކެއް ކުރަމުންނެވެ. ކުޅުމުގެ ފެންވަރު ރަނގަޅު ކުރުމަށްވެސް އޭނާ ދަނީ އެހީތެރިކަން ފޯރުކޮށްދެމުންނެވެ.

ރާޒުވާއަށް ހާއްސަ އެ މަރުކަޒުގައި އެކަކު އަނެކަކާ އެއްވެސް ތަފާތު ކުރުމެއް ނެތެވެ. އޭނާއަށް ހާއްސަ ރާޒުވާ ބޯޑެއްގައި، ލޯފާން ކުޅުންތެރިއަކުވެސް މުބާރާތުގައި ވާދަ ކުރަމުން ދިޔައެވެ.

އާންމުންގެ ހިތްތަކުގައިވެސް އުއްމީދު އާލާވެފައިވާ ކަން، އެމީހުންގެ ވާހަކަތަކުން އެނގިގެން ދެއެވެ.

މިއަދު ލުބްނާނުން ތަހައްމަލު ކުރަމުންދާ ތަކުލީފުތަކާއި ހަމަނުޖެހުންތަކަކީ 1975 އިން 1990 އަށް އެ ގައުމުގައި ކުރި ވަރުގަދަ ދާޚިލީ ހަނގުރާމައަށް ފަހު، ވޭތު ކުރަމުންދާ އެންމެ ހިތްދަތި ދުވަސްތަކެވެ. ލުބްނާންގެ ފައިސާގެ އަގު ވަނީ 90 ޕަސެންޓް ދަށަށް ގޮސްފައެވެ. އާބާދީގެ 4 ބައިކުޅަ 3 ބައި ހާ މީހުން ވަނީ އިންތިހާ ފަޤީރުކަމުގެ ތެރެއަށް ވެއްޓިފައެވެ.