ޑައިވިންނަށް ގޮސް އުޅުނު ފަތުރުވެރިއަކު މަރުވެއްޖެ
ޑައިވިނަށް ގޮސް އުޅެނިކޮށް މަރުވީ 49 އަހަރުގެ ކޮރެއާ ފަތުރުވެރިއެއް
އެމްއެންޑީއެފްގެ ޑައިވަރުންނަށް އެމީހާގެ ހަށިގަނޑު ފެނިފައިވަނީ ކ. ގާގަނޑުގެ ދެކުނުގައި އޮތް ފަރު ކައިރިން
ފަރުކޮޅުފުށި ކައިރިން ޑައިވިނަށް ގޮސް އުޅުނު ފަތުރުވެރިއަކު މަރުވެއްޖެއެވެ.
މޯލްޑިވްސް ނޭޝަނަލް ޑިފެންސް ފޯސް (އެމްއެންޑީއެފް) އިން މައުލޫމާތު ދޭ ގޮތުގައި ޑައިވިނަށް ގޮސް އުޅެނިކޮށް މަރުވެފައިވަނީ 49 އަހަރުގެ ސައުތު ކޮރެއާ ފަތުރުވެރިއެކެވެ.
އެމްއެންޑީއެފް އިން ބުނީ ފަރުކޮޅުފުށީގެ ހުޅަނގުއުތުރު ފަރާތަށް މޫދަށް އެރި، ފްރީޑައިވްކުރަން ދިޔަ އެ ފަތުރުވެރިޔާ ގެއްލިގެން ހޯދަމުން ދަނިކޮށް އެމްއެންޑީއެފް ކޯސްޓްގާޑު ސެކަންޑް ސްކޮޑްރަންގެ ޑައިވަރުންނަށް އެމީހާގެ ހަށިގަނޑު ފެނިފައިވާ ކަމަށެވެ.
އެ މީހާ ގެއްލިގެން އުޅޭކަމުގެ މަޢުލޫމާތު އެމްއެންޑީއެފް ކޯސްޓްގާޑު މެރިޓައިމް ރެސްކިޔު ކޯޑިނޭޝަން ސެންޓާ (އެމްއާރުސީސީ) އަށް ލިބުނީ އަންގާރަ ދުވަހުގެ 11:05 ހާއިރުކަމަށާއި އެ މަޢުލޫމާތު ލިބުމާއެކު އެމްއެންޑީއެފް ކޯސްޓްގާޑު ސެކަންޑް ސްކޮޑްރަންގެ ޑައިވަރުންގެ ޓީމެއް އެ ސަހަރައްދަށް ގޮސް ގެއްލުނު މީހާ ހޯދުމަށް މަސައްކަތްކޮށްފައި ވާކަމަށް އެމްއެންޑީއެފް އިން ބުނެއެވެ. އަދި، ގެއްލުނު މީހާގެ ހަށިގަނޑު އެމްއެންޑީއެފް ކޯސްޓްގާޑުގެ ޑައިވަރުންނަށް ފެނިފައިވަނީ ކ. ގާގަނޑު ދެކުނުގައި އޮތް ފަރު ކައިރިން، ކަނޑުގެ 30 މީޓަރު އަޑިން، ކަމަށް ވެސް އެމްއެންޑީއެފް އިން ބުނެއެވެ.
ކޯސްޓްގާޑުގެ ޑައިވަރުން އެމީހާގެ ހަށިގަނޑު މޫދުން ނެގުމަށް ފަހު، އަންގާރަ ދުވަހުގެ މެންދުރު 12:21 ހާއިރު ހަށިގަނޑު މާލެއަށް ގެނެސް، އައިޖީއެމްއެޗްއަށް ގެންގޮސްފައިވާކަމަށް ވެސް އެމްއެންޑީއެފުން ބުނެއެވެ.
