ނޮވެންބަރު 2018ން ފެށިގެން މިހާތަނަށް 182 ކިލޯއަށްވުރެ ގިނަ މަސްތުވާތަކެތި ކަސްޓަމްސްއިން އަތުލައިގަނެފައިވާމަށް ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހު ވިދާޅުވެއްޖެއެވެ.
ރައީސް މިކަން ހާމަކުރެއްވީ ކަސްޓަމްސް ސަރވިސްގެ 132 ވަނަ އަހަރީ ހަފްލާ ޝަރަފްވެރިކޮށްދެއްވައި ދެއްކެވި ވާހަކަފުޅުގައެވެ. ރައީސް ވިދާޅުވީ، އިމްޕޯޓް އެކްސްޕޯޓާ ގުޅުންހުރި ހުރިހާ ކަމެއް ބެލެހެއްޓުމަކީވެސް ކަސްޓަމްސްގެ ޒިންމާއެއްކަމަށެވެ. އަދި މިކަންކަމާ ގުޅުންހުރި ހުރިހާ ނުރަނގަޅު ކަމެއް ހުއްޓުވައި ކޮންޓްރޯލް ކުރުމަކީވެސް، ކަސްޓަމްސްގެ ޒިންމާއެއްކަމަށެވެ. މި ނޫނަސް ކަސްޓަމްސްއިން އަދާކުރަންޖެހޭ ޒިންމާތަކާއި އުފުލަންޖެހޭ ވަރަށް ގިނަ މަސްއޫލިއްޔަތުތައް އެބަހުރިކަމަށް ރައީސް ވިދާޅުވިއެވެ.
ކަސްޓަމްސްއަކީ، ރާއްޖޭގެ ބޯޑަރުތަކުގެ ފާރަވެރިޔާ. ރާއްޖެއަށް އެތެރެކުރާ، އަދި ރާއްޖެއިން ބޭރުކުރާ ކޮންމެ އެއްޗެއްގެ ގާނޫނީ ސައްހަކަން ކަށަވަރުކުރުމުގެ ޒިންމާ އަދާކުރަނީ ކަސްޓަމްސްއިން. އެ މަސައްކަތުގައި ކަސްޓަމްސްއަށްވެސް ކުރިމަތިވެފައިވާ އެންމެ ބޮޑު ގޮންޖެހުމަކީ މަސްތުވާތަކެތީގެ މައްސަލަ. މަސްތުވާތަކެތި ރާއްޖެއަށް އެތެރެކުރުމާ، އެފަދަ ތަކެތި ރާއްޖޭގަ ޓްރާންސިޓް ކުރުން ހުއްޓުވުމަކީ، ގޮންޖެހުން ބޮޑު މަސައްކަތެއް. މަސްތުވާތަކެތީގެ ވިޔަފާރިކުރާ ބައިނަލްއަގުވާމީ ވިއުގަތައް ފުޅާވެފައި އޮތީ ކަންބޮޑުވާހާ ބޮޑު މިންވަރަކަށް. އަދި ރާއްޖޭގަ އޭގެ ވިޔަފާރިއާ، އޭގެ ބޭނުންކުރުން ފުޅާވެފަ އޮތީވެސް އިންތިހާ ދަރަޖައަށް. މި މައްސަލަ ހައްލުކުރުމަށް ދައުލަތުގެ މުއައްސަސާތަކަށް ބޭނުންވާ އެކަށޭނަ އާލާތްތަކާއި ވަސީލަތްތައް ލިބުމުގަވެސް އެތައް ދަތިތަކެއް އެބަހުރި. ގޮންޖެހުން ކިތަންމެ ބޮޑު ނަމަވެސް، މަސްތުވާތަކެތީގެ މައްސަލައަކީ ސަރުކާރުން ޚާއްސަ އިސްކަމެއްދީގެން ހައްލުކުރަން ބޭނުންވާ މައްސަލައެއް. އެހެންކަމުން، މިކަން ހައްލުކުރުމަށް ބޭނުންވާ ވަސީލަތްތައް ހަމަކުރުމަށް ސަރުކާރުން ޚާއްސަ ސަމާލުކަމެއް ދީގެން މަސައްކަތްތަކެއް އެބަ ކުރަން.ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހު
ރައީސް ވިދާޅުވީ މަސްތުވާތަކެތި ރާއްޖެ އެތެރެކުރުން ހުއްޓުވުމުގައި، ކަސްޓަމްސްގެ ދައުރު ކިތަންމެ ބޮޑު ނަމަވެސް، މުޅި މައްސަލަ ހައްލުކުރެވޭނީ ދައުލަތުގެ ކަމާގުޅޭ ހުރިހާ އިދާރާތަކެއް ގުޅިގެންކަމަށެވެ. މިކަން ހައްލުކުރުމުގެގޮތުން އެކުލަވައިލި އެކްޝަން ޕްލޭން ތަންފީޒުކުރުމަށް، ކަމާގުޅޭ އިދާރާތަކަށް 2021 ވަނަ އަހަރު ޚާއްސަ ބަޖެޓެއް ހަމަޖައްސަވައިދެއްވިކަމަށް ރައީސް ވިދާޅުވިއެވެ.
އޭގެ އިތުރުން، މަސްތުވާތަކެއްޗާ ދެކޮޅަށް ކުރާ މަސައްކަތްތައް ހަރުދަނާ ކުރުމަށް، ކަސްޓަމްސްގެ ސަރަހައްދީ އޮފީސްތަކަށް ބޭނުންވާ ވަސީލަތްތައް ހަމަކުރުމަށް، މި އަހަރުގެ ތެރޭގައި އެހީތެރިކަން ފޯރުކޮށްދީފައިވާ ކަމަށާއި، އަދި ކަސްޓަމްސްއަށް ބޭނުންވާ އިންސާނީ ވަސީލަތްތައް ހަމަކުރުމަށްވެސް ސަރުކާރުން ގެންދަނީ އެހީތެރިކަން ފޯރުކޮށްދެމުންކަމަށް ރައީސް ވިދާޅުވިއެވެ.
ރައީސް ވިދާޅުވީ މިކަންކަމުގެ ރަނގަޅު ނަތީޖާވެސް އަންނަނީ ފެންނަމުންކަމަށާއި، މަސްތުވާތަކެއްޗާ ދެކޮޅަށް ކުރާ މަސައްކަތްތަކުގެ ތެރެއިން (ނޮވެންބަރު 2018ން ފެށިގެން) މިހާތަނަށް 182 ކިލޯއަށްވުރެ ގިނަ މަސްތުވާތަކެތި ކަސްޓަމްސްއިން އަތުލައިގަނެފައިވާކަމަށެވެ. މިއީ އޭގެ ކުރީގެ 5 އަހަރާ އަޅައިބަލާއިރު، 32 އިންސައްތައަށްވުރެ އިތުރު އަދަދެއްކަމަށް ރައީސް ވިދާޅުވިއެވެ.
އެއަރޕޯޓްގަ މަސައްކަތް ކުރުމުގަ ކަސްޓަމްސް އޮފިސަރުންނަށް ދިމާވާ ދަތިތަކާ ގޮންޖެހުންތައް ހައްލުކުރުމަށްވެސް ކަސްޓަމްސްގެ އިސް ވެރިންނާއެކު އަޅުގަނޑުމެން މި އަންނަނީ މަސައްކަތްތަކެއް ކުރަމުން. ވެލާނާ އިންޓަރނޭޝަނަލް އެއަރޕޯޓްގަ މިހާރު ތަރައްގީކުރަމުންދާ އައު ޓަރމިނަލް ބޭނުންކުރަން ފެށުމުން، ކަސްޓަމްސްއަށް މިހާރު ދިމާވެފަވާ ޖާގައިގެ ދަތިކަމަށް ބޮޑު ހައްލެއް ލިބިގެންދާނެ. އެއްގަމުމަގުން އެހެން ގައުމަކާ ގުޅިފަ ނެތަސްވެސް، އަޅުގަނޑުމެންވެސް މިހާރު އުޅެމުން މިދަނީ ހުރިހާ ގައުމުތަކެއް ގުޅިފަވާ ދުނިޔެއެއްގަ. ޒަމާނީ ޓެކްނޯލޮޖީއާ ދަތުރުފަތުރުގެ ލުއިފަސޭހަތަކާއެކު، އެއް ގައުމު އަނެއް ގައުމާ މިއޮތީ ވަރަށް ބޮޑަށް ލާމެހިފަ. އެހެންކަމުން، ބައިނަލްއަގުވާމީ މުޖުތަމައުގަ ހިނގާ ކޮންމެ ރަނގަޅުކަމަކާ ނުރަނގަޅުކަމެއްގެ އަސަރު ސީދާ ގޮތުންނާ ނުސީދާ ގޮތުން، ރާއްޖެއަށްވެސް އެބަ ފޯރާ.ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހު
މަނީ ލޯންޑަރިންގއަކީވެސް ބައިނަލްއަގުވާމީ ޖިނާއީ ކުށްތަކުގެ ތެރެއިން، ރާއްޖެއިންވެސް އެކަމާ ދެކޮޅަށް ވަރުގަދަ މަސައްކަތްތަކެއް ކުރަންޖެހިފައިވާ ކަމެއްކަމަށް ރައީސް ވިދާޅުވިއެވެ. ބޯޑަރުތައް ހުރަސްކޮށް، ދޭދޭ ގައުމުތަކުގެ ވަކިވަކި ފަރުދުންނާއި ގުރޫޕްތަކުގެ މެދުގައި ދުރާލައި ރާވައިގެން ހިންގާ ޖިނާއީ ކުށްތަކަކީވެސް ހަމަ އެފަދަ މައްސަލަތަކެއްކަމަށް ރައީސް ވިދާޅުވިއެވެ.
ރާއްޖޭގެ ބޯޑަރު ހުރަސްކޮށް، މިފަދަ އެއްވެސް ކަމެއް ހިނގާތޯ ބަލައި ފާރަވެރިވުމަކީ، ކަސްޓަމްސްގެ މަސްއޫލިއްޔަތުތަކުގެ ތެރޭގައި ހިމެނޭ ވަރަށް މުހިންމު ޒިންމާއެއްކަމަށާއި، މިފަދަ ޖަރީމާތައް ހުއްޓުވުމަށްޓަކައި، ކަސްޓަމްސްގެ ގާބިލްކަން އިތުރުކުރުމަކީ އަބަދުވެސް ކުރަންޖެހޭ ކަމެއް ކަމަށް ރައީސް ވިދާޅުވިއެވެ. އެހެންކަމުން، ރާއްޖޭގެ ބޯޑަރުތަކުގައި ކަސްޓަމްސްގެ ކޮންޓްރޯލް ހަރުދަނާކުރުމަށްޓަކައި، ރާއްޖޭގެ ބަނދަރުތަކުގައި ހުރި ވަސީލަތްތަކާއި އިންފްރާސްޓްރަކްޗަރ އިތުރަށް ހަރުދަނާކުރުމަށް ސަރުކާރުން ގިނަ މަސައްކަތްތަކެއް ކުރަމުންދާ ކަމަށް ރައީސް ވިދާޅުވިއެވެ.
ދިވެހިރާއްޖެއަކީ މާސިންގާ ކަނޑެއްގެ ތެރެއަށް ފެތުރިފަ އޮތް ޖަޒީރާތަކެއް. މި ސަބަބަށްޓަކާ، ރާއްޖޭގެ ކަނޑުގެ ސަރަހައްދުގައި ހަރަކާތްތެރިވާ އުޅަނދުފަހަރު ދަތުރުކުރާ ގޮތް މޮނިޓަރކުރުމުގެ ގާބިލުކަން އިތުރުކުރުމަކީވެސް ކޮންމެހެން ކުރަން ޖެހިފަވާ ކަމެއް. އެ ގާބިލުކަން އިތުރުކުރުމުން، މަސްތުވާތަކެތި އެތެރެކުރުމާ، ޓެރަރިޒަމްގެ ހަރަކާތްތައް ހުއްޓުވުމުގެ ގާބިލުކަން އިތުރުވެގެންދާނެ.ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހު
ދައުލަތުގެ ފަރާތުން ރައްޔިތުންނަށް ދޭ ޚިދުމަތްތައް ލާމަރުކަޒުކުރުމަކީ، ސަރުކާރުގެ ވަރަށް މުހިއްމު ސިޔާސަތެއްކަމަށާއި، މިކަމުގަވެސް ކަސްޓަމްސްއަކީ ވަރަށް މުހިއްމު ދައުރެއް އަދާކުރަމުން އަންނަ މުއައްސަސާއެއްކަމަށް ރައީސް ވިދާޅުވިއެވެ. އަދި ރާއްޖޭގެ ސަރަހައްދީ ބަނދަރުތައް އިތުރުކުރަމުންދާއިރު، އެއިން ކޮންމެ ތަނެއްގަވެސް ފުރިހަމަ ޚިދުމަތްތައް ދިނުމުގައި ކަސްޓަމްސްގެ މުވައްޒަފުން މުހިންމު މަސައްކަތްތަކެއް ކުރަމުން އަންނަކަމަށް ރައީސް ވިދާޅުވިއެވެ.
މޯލްޑިވްސް ކަސްޓަމްސް ސަރވިސްގެ ޚިދުމަތް ފެށިފައި ވަނީ 18 ޖުލައި 1890ގައެވެ. މޯލްޑިވްސް ކަސްޓަމްސް ސަރވިސްއަކީ ވަކި ގާނޫނެއްގެ ދަށުން ހިންގަމުން އަންނަ، ދައުލަތުގެ މުއައްސަސާއެކެވެ.
