ސްޓްރެޓެޖީއެއް އެބަ އޮތް، ވަގުތު ނަގާނެ: ޓެން ހާގް

މެންޗެސްޓަރ ޔުނައިޓެޑާ ހަވާލުވެ އޭނާގެ ސްޓްރެޓެޖީއެއް އެބަ އޮތް ކަމަށާއި، އެކަމަށް ވަގުތު ނަގާނެ ކަމަށް އެ ޓީމުގެ ކޯޗު އެރިކް ޓެން ހާގް ބުނެފިއެވެ.

ނިމުނު ސީޒަނުގައި ޔުނައިޓެޑަށް ލިބުނު ދަށް ނަތީޖާގެ ސަބަބުން އެ ޓީމުގެ ކޯޗު ކަމުގެ މަގާމުގައި ހުރި ރަލްފް ރަންގްނިކް ވަކިކޮށް، އެ މަގާމަށް ވަނީ ޓެން ހާގް ހަމަޖައްސާފައެވެ. އޭނާގެ އިރުޝާދުގެ ދަށުން ޔުނައިޓެޑުން މިހާތަށް ކުޅުނީ ދެ މެޗެވެ. އެއީ ޕްރީ ސީޒަންގެ ދެ މެޗެވެ. އެ މެޗުން ވެސް ޔުނައިޓެޑު ވަނީ މޮޅުވެފައެވެ.

ޓެން ހާގް ބުނީ ޔުނައިޓެޑު ގޮވައިގެން ކުރިއަށް ދާން އޭނާގެ ސްޓްރެޓެޖީއެއް އެބަ އޮތް ކަމަށާއި، އެކަން ހިނގާނެ ކަމަށެވެ. އެކަމަށް ވަގުތު ނަގާނެ ކަން ފާހަގަކުރަމުން ޓެން ހާގް ބުނީ ފަހު ވަގުތު އޭގެ ނަތީޖާއަކަށް ވާންވާނީ މޮޅު ޓީމެއް އުފެދުން ކަމަށެވެ. މީގެ އިތުރުން ޓެން ހާގް ބުނީ އެކަމަށް މަތީ ފަންތީގެ ކުޅުންތެރިޔެއްގެ އެހީތެރިކަން ބޭނުންވާނެ ކަމަށާއި، ކްރިސްޓިއާނޯ ރޮނާލްޑޯ އަކީ އެފަދަ ކުޅުންތެރިއެއް ކަމަށެވެ. ޓެން ހާގް ބުނީ ވަކިން ޚާއްސަކޮށް ގޯލު ޖަހާ ކުޅުންތެރިންނަކީ ޓީމަށް މުހިންމު ކުޅުންތެރިންކަމަށާއި، ޓީމު އުފައްދަން ޖެހޭނީ އެ ކުޅުންތެރިން ހިމަނައިގެން ކަމަށެވެ.

ރޮނާލްޑޯއާ ގުޅޭ ގޮތުން ޓެން ހާގް މިފަދައިން ވާހަކަ ދައްކާފައިވާއިރު، އޭނާ ވަނީ ޓީމު ދޫކޮށްލަން ބޭނުންވާކަން އެ ޓީމުގެ ސީނިއަރ މެނޭޖުމަންޓަށް އަންގާފައެވެ. އެވާހަކަތައް ދެކެވުނު ފުރަތަމަ ދުވަސްކޮޅު ވެސް ޓެން ހާގް ބުނީ ރޮނާލްޑޯއަކީ ވިއްކާލާނެ ކުޅުންތެރިއެއް ނޫން ކަމަށެވެ. އޭނާ އޭރު ވެސް ފާހަގަކުރި ގޮތުގައި ޔުނައިޓެޑާއެކު އޭނާ ކުރިއަށް ދާން ބޭނުންވާ ޕްލޭންގައި ރޮނާލްޑޯ ހިމެނެއެވެ. ޓީމާ ހަވާލުވެ ކާމިޔާބު ހޯދަން ބޭނުންވަނީ ރޮނާލްޑޯ ހިމަނައިގެން ކަމަށް ވެސް ޓެން ހާގް ބުނެފައެވެ.

އޭގެ ފަހުން ޓެން ހާގް އަނެއްކާ ވެސް މި ވަނީ ރޮނާލްޑޯގެ ވާހަކަ ދައްކާފައެވެ. އޭނާ ބުނީ ޔުނައިޓެޑުން ރޮނާލްޑޯ ދޫކޮށް ނުލާނެ ކަމަށާއި، ރޮނާލްޑޯއާއެކު މަސައްކަތްކޮށްގެން ޔުނައިޓެޑުގެ ރަން ދުވަސްތަކަށް ޓީމު ގެންދަން ބޭނުންވާ ކަމަށެވެ. މީގެ އިތުރުން ރޮނާލްޑޯއަށް އިތުރު ކޮންޓްރެކްޓެއް ހުށަހަޅާނެ ކަމުގެ އިޝާރާތެއް ވެސް ޓެން ހާގް ވަނީ ދީފައެވެ. ދެ އަހަރު ދުވަހުގެ ދަށުން ރޮނާލްޑޯ ޔުނައިޓެޑަށް ބަދަލުވެފައިވާއިރު، އެ އެއްބަސްވުމުގައި ބާކީ އޮތީ އެއް އަހަރެވެ.

އިތުރަށް ޓެން ހާގް ބުނީ އެކަމާ ގުޅޭ މައުލޫމާތު އޭނާއަށް ފުރިހަމަ އަށް ލިބޭ ކަމަށެވެ. ރޮނާލްޑޯއަށް ޔުނައިޓެޑުގައި އިތުރު އަހަރުތަކެއް މަޑުކުރުމުގެ ފުރުސަތު އޮތްކަން ފާހަގަކުރަމުން ޓެން ހާގް ބުނީ، ކުރިއަށް އޮތް ސީޒަނުގައި ވެސް އޭނާ މަޑުކުރާނެ ކަމަށެވެ. ޓެން ހާގް ބުނީ އޭނާ ޔުނައިޓެޑާ ހަވާލުވީ ތިން އަހަރު ދުވަހުގެ އެއްބަސްވުމެއްގެ ދަށުން ކަމަށެވެ. ނަމަވެސް ފުޓުބޯޅައިގައި އެއީ ކުޑަ މުއްދަތެއް ކަން ފާހަގަކުރަމުން އޭނާ ބުނީ ފުރަތަމަ މެޗުން ފެށިގެން ޖެހޭނީ މޮޅުވާން ކަމަށެވެ.

ޔުނައިޓެޑު ދޫކޮށްލަން ބޭނުންވާކަން އަންގައި ރޮނާލްޑޯ އަންނަނީ އޭނާ ބަދަލުވާނެ ކުލަބެއް ހޯދުމުގެ މަސައްކަތް ކުރަމުންނެވެ. މިހާތަނަށް ތިން ކުލަބަކުން ވަނީ ރޮނާލްޑޯ ގެންދިޔުމަށް ދެކޮޅު ހަދާފައިކަމަށް މީޑިއާ ރިޕޯޓުތައް ބުނެއެވެ. އޭގެ ތެރޭގައި ހިމެނެނީ ޕެރިސް ސެއިންޓް ޖާމަން (ޕީއެސްޖީ)، ބަޔާން މިއުކިން އަދި ޗެލްސީއެވެ. ދާދި ފަހުން ބައެއް މީޑިއާތަކުގައި ރިޕޯޓުކޮށްފައިވާ ގޮތުގައި މިހާރު ރޮނާލްޑޯ އަންނަނީ އެތުލެޓިކޯ މެޑްރިޑަށް ބަދަލުވާން އެ ޓީމުގެ ކޯޗު ޑިއޭގޯ ސިމިއޯނީއާ ވާހަކަ ދައްކާފައެވެ. މީގެ އިތުރުން ބައެއް ރިޕޯޓުތައް ބުނާ ގޮތުގައި އެ ޓީމުގެ ރައީސް އެންރީކޭ ސެރޭޒޯ ވެސް ވަނީ ރޮނާލްޑޯއަށް ބިޑު ކުރުމާ ގުޅޭ ގޮތުން ސިމިއޯނީއާ މަޝްވަރާކޮށްފައެވެ.