ކަސްޓަމްސް ބާރުވެރިކުރުވަން އެހެން ސަރުކާރުތަކުން ނުދޭވަރަށް މި ސަރުކާރުން އެއްބާރުލުން ދޭ: ކޮމިޝަނަރ ޖެނެރަލް
19 ޖުލައި 2022 | އަންގާރަ 02:15ކަސްޓަމްސްއަށް އެންމެ ގިނަ މުވައްޒަފުން ނެގީ މި ދައުރުގައި ކަން ފާހަގަ ކުރެއްވި
ރައީސުލްޖުމްހޫރިއްޔާ، ކޮމިޝަނަރ ޖެނެރަލް އޮފް ކަސްޓަމްސް އަބްދުﷲ ޝަރީފުއަށް އެވޯޑު ހަވާލުކުރައްވަނީ
މޯލްޑިވްސް ކަސްޓަމްސް ސަރވިސް ބާރުވެރިކުރުވުމަށް އެހެން ސަރުކާރުތަކުން ނުދޭވަރަށް މި ސަރުކާރުން އެއްބާރުލުން ދެމުން އަންނަ ކަމަށް ކޮމިޝަނަރ ޖެނެރަލް އޮފް ކަސްޓަމްސް އަބްދުﷲ ޝަރީފް ވިދާޅުވެއްޖެއެވެ.
ޝަރީފު މިހެން ވިދާޅުވީ ކަސްޓަމްސްގެ 132 ވަނަ އަހަރީ ދުވަސް ފާހަގަ ކުރުމަށް ބޭއްވި ރަސްމިއްޔާތުގައި އެ އިދާރާއަށް މިހާތަނަށް ލިބިފައިވާ ކުރިއެރުން ފާހަގަ ކުރައްވައި ދެއްކެވި ވާހަކަފުޅުގައެވެ. އެގޮތުން، މި ސަރުކާރުން ކަސްޓަމްސްގެ ކަންކަން ކުރިއެރުވުމަށް އެއްބާރުލުން ދެއްވާކަން އޭނާ ފާހަގަކުރެއްވިއެވެ.
ޝަރީފް ވިދާޅުވީ ރައީސުލްޖުމްހޫރިއްޔާ އިބްރާހިމް މުޙައްމަދު ސާލިހު ކޮވިޑް-19ގެ ހާލަތުގައި ވެސް ކަސްޓަމްސްގެ މުވައްޒަފުންނަށް ވަޒީފާގެ ކުރިއެރުން ދެއްވަން ނިންމެވި ނިންމެވުމަކީ ވަރަށް މުހިންމު ނިންމެވުމެއް ކަމަށެވެ. އެގޮތުން، ރައީސް އެ ހާލަތުގައި ވެސް އެގޮތަށް ނިންމެވީ 2013ގައި މަޤާމުތަކުގެ ކުރިއެރުން ދިންއިރު ބޮޑެތި މައްސަލަތަކެއް ހުރުމުންނާއި މަޤާމުގެ ކުރިއެރުން ހައްޤުވާ ގިނަ މުވައްޒަފުންތަކަކަށް ކުރިއެރުން ނުލިބިތިބިކަން ރައީސަށް ފާހަގަކުރެއްވިފައިވާތީ ކަމަށް އޭނާ ވިދާޅުވިއެވެ.
ފާއިތުވި 2 އަހަރުވެސް ކަސްޓަމްސްގެ ތަރައްޤީއާއި ކުރިއެރުމަށް ގިނަ މަސައްކަތްތަކެއް ކޮށްފައިވާ ކަމަށް ވެސް ޝަރީފް ފާހަގަކުރެއްވިއެވެ. އެގޮތުން، ކަސްޓަމްސްގެ ޒިންމާ އަދާކުރުމަށް ބޭނުންވާ ގިނަ ވަސީލަތްތައް ގާއިމުކުރުމާއި މުވައްޒަފުންގެ ޤާބިލުކަން އިތުރު ކުރުމަށް ގިނަ މަސައްކަތްތަކެއް ކޮށްފައިވާ ކަމަށް އޭނާ ވިދާޅުވިއެވެ.
ޝަރީފް ވިދާޅުވީ ކަސްޓަމްސްއަށް ދިމާވެފައިވާ މުވައްޒަފުންގެ މައްސަލަ ހައްލު ކުރުމަށް ވެސް މި ސަރުކާރުން ގިނަ މަސައްކަތަކެއް ކޮށްފައިވާ ކަމަށެވެ. އެގޮތުން، ރައީސް އުފެއްދެވި ޓާސްކް ފޯސްގެ ބެލުމުގެ ދަށުން 90 ކަސްޓަމްސް އޮފިސަރުން ނެގުމަށް ބެޖެޓް ކަނޑައަޅާފައިވާ ކަމަށާއި އޭގެ ތެރެއިން 60 ކަސްޓަމްސް އޮފިސަރުން ނެގުމުގެ އެންމެ ފަހުގެ މަރުހަލާގެ މަސައްކަތް މިހާރު ކުރިއަށްދާ ކަމަށް އޭނާ ވިދާޅުވިއެވެ.
މީގެ އިތުރުން ބާކީ 30 އޮފިސަރުން 2023ގައި ނަގާނެ ކަމަށާއި 2020 ވަނަ އަހަރު ނަގާފައިވާ މުވައްޒަފުން ހިމެނޭހެން އަންނަ އަހަރުގެ ނިޔަލަށް ކަސްޓަމަސްގައި 100 އަށްވުރެ ގިނަ މުވައްޒަފުން ތިބޭނެ ކަން ޝަރީފް ފާހަގަކުރެއްވިއެވެ.
ޝަރީފް ވިދާޅުވީ ކަސްޓަމްސްގެ 132 އަހަރުގެ ދިގު ތާރީޚުގައި އެ އިދާރާއަށް އެންމެ ގިނަ މުވައްޒަފުން ނަގާފައިވަނީ ވެސް މި ދައުރުގައި ކަމަށެވެ.
