ޓެންޓާއި ބިސްބުރަށް މޮޅެއް

އެފްއޭއެމް ދެވަނަ ޑިވިޝަން ފުޓްބޯޅަ މުބާރާތުގައި މިއަދު ކުޅުނު ދެ މެޗުން ޓެންޓް ސްޕޯޓްސް ކްލަބާއި ބިސްބުރު ސްޕޯޓްސް ކްލަބް މޮޅުވެއްޖެއެވެ.

މުބާރާތުގައި މިއަދު ހަވީރު ގަލޮޅު ދަނޑުގައި ބައްދަލުކުރީ ބިސްބުރާއި ކެޕިޓަލް ސިޓީ ސްޕޯޓްސް ކްލަބެވެ. މި މެޗު ބިސްބުރުން ކާމިޔާބުކުރީ 4-1ންނެވެ. މެޗުގެ ތިންވަނަ މިނެޓުގައި ބިސްބުރުގެ ބިދޭސީ ކުޅުންތެރިޔާ އާމިރް މެމަރީ މަނޭޝް ވަނީ ލަނޑެއް ޖަހައި އެޓީމަށް ލީޑު ނަގައިދީފައެވެ. އަދި ފުރަތަމަ ހާފުގެ 27 ވަނަ މިނެޓުގައި އެޓީމަށް ލީޑު ފުޅާކޮށްދިނީވެސް ފުރަތަމަ ލަނޑު ޖެހި އާމިރުއެވެ. ނަމަވެސް އޭގެ ދެމިނެޓު ފަހުން ކެޕިޓަލް ސީޓީގެ އާދަމް ނަސީމް ލަނޑެއްޖަހައި ފަރަގު ކުޑަކުރިއެވެ.

ދެވަނަ ހާފުގެ 62 ވަނަ މިނެޓުގައި ބިސްބުރުގެ އާމިރު ތިންވަނަ ލަނޑު ޖަހައި ހެޓްރިކް ހެދިއެވެ. މެޗުގެ ފަހު ލަނޑު 89 ވަނަ މިނެޓުގައި ބިސްބުރަށް ކާމިޔާބުކޮށްދިނީ އެޓީމުގެ ބިދޭސީ ކުޅުންތެރިޔާ މުޖްތަބާ ރަޝީދީއެވެ.

މުބާރާތުގައި މިއަދު ހަވީރު ދެން ކުޅުނީ ޓެންޓް ސްޕޯޓްސް ކްލަބާއި ދިވެހި ސިފައިންގެ ކްލަބެވެ. މިއީ މޫސުން ގޯސްވުމުގެ ސަބަބުން އިއްޔެ މެޗު ކުރިއަށް ނުގެންދެވިގެން މިއަދު ކުޅުނު މެޗެކެވެ. އެފްއޭއެމް އެއް ނަންބަރު ޓާފުގައި ކުޅުނު މި މެޗު ޓެންޓުން ކާމިޔާބުކުރީ 2-0ންނެވެ. މެޗުގެ ދެލަނޑުވެސް ޓެންޓުން ޖެހީ ފުރަތަމަ ހާފުގައެވެ. ފުރަތަމަ ހާފުގެ 40 ވަނަ މިނެޓުގައި އަރަޝް އައްސަދު މުހައްމަދު ޓެންޓަށް ލީޑު ނަގައިދިންއިރު، 41 ވަނަ މިނެޓުގައި އެޓީމަށް ލީޑު ފުޅާކޮށްދިނީ ޝަފްރާޒް އިބްރާހިީމެވެ.

ރޭ ކުޅެން ހަމަޖެހިފައިވާ ކްލަބް ޕީކޭއާއި ކުޑަ ހެންވޭރު ވާދަކުރާ މެޗުވެސް ވިއްސާރަވުމުގެ ސަބަބުން ވަނީ ކެންސަލްކޮށްފައެވެ. މި މެޗު ކުޅުމަށް މިހާރު ތާވަލުކުރެވިފައި އޮތީ މާދަމާ ހަވީރަށެވެ.