ރާއްޖޭގެ 4 ސަރަހައްދަކަށް ބޭނުންވާ 36 މިނީ ބަސް ގެނެސްފި
ޚިދުމަތް ދޭން 41 ބަސް ގެންނަން ވަނީ ހަމަޖެހިފައި
އެމްޓީސީސީން ގެނައި މިނީ ބަސްތައް އާޒިމް ބައްލަވާލައްވަނީ
ރާއްޖޭގެ 4 ސަރަހައްދަކަށް ބޭނުންވާ 36 މިނީ ބަސް، މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ)ން ގެނެސްފިއެވެ.
މި ބަސްތައް ރާއްޖެގެނައީ ހޮނިހިރު ދުވަހުއެވެ. މި ބަސްތައް މާލޭ ވިޔަފާރި ބަނދަރަށް ބާލާފައިވާއިރު، މިހާރު ކުރިއަށްދަނީ ޕޯރޓް ކްލިއަރެންސްގެ މަސައްކަތްތައް ކަމަށް އެމްޓީސީސީން ބުނެއެވެ. ބަސްތައް ބައްލަވާލެއްވުމަށް އެމްޓީސީސީގެ ސީއީއޯ އާދަމް އާޒިމް ވަނީ ޕޯރޓަށް ވަޑައިގެންފައެވެ.
އާޒިމް "ރާއްޖެ އެމްވީ"އަށް ވިދާޅުވީ، މިއީ އެ ކުންފުނިން ގެންނަން ނިންމާފައިވާ 41 ބަހުގެ ތެރެއިން 36 ބަސް ކަމަށެވެ. ބާކީ ހުރި 5 ބަސް މި މަހުގެ 18 ވަނަ ދުވަހު ރާއްޖެ އަންނާނެ ކަމަށްވެސް އާޒިމް ވިދާޅުވިއެވެ.
އާޒިމް ވިދާޅުވިގޮތުގައި، މި ބަސްތަކަކީ މާލެއާއި އައްޑޫސިޓީއާއި ފުވައްމުލައްސިޓީއާއި ލ އަތޮޅުގައި ބަހުގެ ޚިދުމަތް ފަށަން ގެނައި ބަސްތަކެކެވެ. މާލޭގައި މިނީ ބަހުގެ ޚިދުމަތް 31 ޖުލައިގައި ފެށުމަށް މަސައްކަތް ކުރަމުން އަންނަކަމަށްވެސް އޭނާ ވިދާޅުވިއެވެ.
މާލޭގެ އިތުރުން އައްޑޫއާއި ފުވައްމުލަކާއި ލ އަތޮޅުގައި ވެސް 31 ޖުލައިގައި ބަސް ދަތުރުތައް ފެށުމަށް މަސައްކަތްކުރަމުންދާކަމަށް އާޒިމް ވިދާޅުވިއެވެ. އެގޮތުން، ބަސްތައް ވީހާވެސް އަވަހަކަށް އެ ރަށްރަށަށް ފޮނުވުމުގެ މަސައްކަތް ކުރައްވާނެކަމަށް އޭނާ ވިދާޅުވިއެވެ.
މާލޭގައި މިނީ ބަހުގެ ޚިދުމަތް ފެށުމަށް އެކި ސަރަހައްދުތަކުގައި ބަސް ސްޓޭންޑުތައް ބަހައްޓާނެއެވެ. މި މަސައްކަތް ކުރަން ބޭނުންވާ ހުއްދައަށް މާލެ ސިޓީ ކައުންސިލުގައި އެދިފައިވާ ކަމަށާއި، އަދި ޖަވާބެއް ނުލިބޭކަން އާޒިމް ފާހަގަކުރެއްވިއެވެ. ބަސް ސްޓޭންޑްތައް ބެހެއްޓުމުން ކޮންމެ ބަސް ސްޓޭންޑަކަށް 10 މިނެޓުން ބަސް އަންނަގޮތަށް ދަތުރުތައް ރާވަން ނިންމާފައިވާކަމަށްވެސް އޭނާ ވިދާޅުވިއެވެ.
އާޒިމް ވިދާޅުވީ މާލޭގައި މިނީ ބަހުގެ ޚިދުމަތް ފަށާއިރު އާއްމުންގެ ފަރާތުން ވަރަށް ބޮޑު އެއްބާރުލުމެއް ބޭނުންވާނެ ކަމަށެވެ. އެގޮތުން، ޓްރެފިކް ގަވާއިދަށް އެންމެންވެސް ހުރުމަތްތެރިކޮށްހިތުމަށާއި ޕާކުކުރުން މަނާ ސަރަހައްދުތަކުގައި ޕާކުނުކުރުމަށް އޭނާ އެދިވަޑައިގެންނެވިއެވެ.
މިނީ ބަހުގެ ޚިދުމަތް ފެށުމަށް ގެނައި ބަސްތަކަކީ 25 މީހުންގެ ޖާގައިގެ ބަސްތަކެކެވެ. އެއީ 20 ސީޓާއި، އަދި ކޮޅަށް ތިބެގެން ދަތުރުކުރެވޭ ގޮތަށެވެ. މި ބަސްތަކުގައި ޚާއްސަ އެހީއަށް ބޭނުންވާ ފަރާތްތަކަށް ޚާއްސަ ސީޓުތައް ހުންނައިރު، ވީލްޗެއަރ ބޭނުންކުރާ ފަރާތްތަކަށްވެސް ފަސޭހަކަމާއެކު ބަހަށް އަރައި ފޭބޭނެކަމަށް އާޒިމް ވިދާޅުވިއެވެ.
ރާއްޖެއަށް ގެންނަ 41 ބަހުގެ ތެރެއިން މާލޭގައި ބޭނުން ކުރާނީ 12 ބަސް ކަމަށް އެމްޓީސީސީން މައުލޫމާތުދެއެވެ. ބާކީ ހުރި ބަސްތައް އައްޑޫއާއި ފުވައްމުލަކާއި ލ އަތޮޅަށް ފޮނުވަން ނިންމާފައިވާކަމަށްވެސް އެ ކުންފުނިން ބުންޏެވެ.
އެމްޓީސީސީން އަންނަނީ މިނީ ބަހުގެ ޚިދުމަތުގެ އިތުރުން މާލެއާ ހުޅުމާލެއާ ދެމެދު ދެމުން އަންނަ ބަހުގެ ޚިދުމަތްތަކަށް ބޭނުންވާ ޑްރައިވަރުން ތަމްރީންކުރުމުގެ މަސައްކަތްވެސް ކުރަމުންނެވެ. މި ބަސްތަކާއެކު އިތުރު ވަޒީފާގެ ފުރުސަތު ހުޅުވިގެންދާނެ ކަމަށްވެސް އެމްޓީސީސީން ބުނެއެވެ.
ޓްރާންސްޕޯޓް މިނިސްޓްރީން މިނީ ބަހުގެ ޚިދުމަތް ފެށުމަށް އެމްޓީސީސީއާ ހަވާލުކުރީ 2019 ވަނަ އަހަރުގައެވެ. މިއީ ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހުގެ ވައުދުފުޅުތަކުގެ ތެރޭގައި ހިމެނޭ ކަމެކެވެ.
