ޖެޓް ފިޔުލްގެ އައު ޝިޕްމަންޓް ލިބިއްޖެ، ލިމިޓް އުވާލައިފި
ޖެޓްފިޔުލް ލިބުމާއެކު އެމްއޭސީއެލުން ކަނޑައަޅާފައި އޮތް ލިމިޓް ވަނީ އުވާލާފައި
އެމްއޭސީއެލް
ޖެޓް ފިޔުލްގެ އައު ޝިޕްމަންޓެއް ލިބިއްޖެކަމަށް މޯލްޑިވްސް އެއަރޕޯޓްސް ކޮމްޕެނީ ލިމިޓެޑް (އެމްއޭސީއެލް)އިން ބުނެފިއެވެ.
އެމްއޭސީއެލްގެ ކޯޕަރޭޓް ކޮމިއުނިކޭޝަންސް މެނޭޖަރ ޝަމްއާން ޝާކިރު "ރާއްޖެ އެމްވީ"އަށް ވިދާޅުވީ، ޖެޓް ފިޔުލްގެ އާ ޝިޕްމަންޓް މިހާރު ލިބިފައިވާކަމަށާއި ކުރިން ކަނޑައަޅާފައި އޮތް ލިމިޓް އުވާލާފައިވާކަމަށެވެ. އެހެންކަމުން މިހާރު ކޮންމެ ފްލައިޓަކަށްވެސް ބޭނުންވާވަރަށް ފިޔުލް ލިބޭނެކަމަށް އޭނާ ވިދާޅުވިއެވެ.
ސްރީލަންކާއިން ތެޔޮ ހުސްވެ، މަތިންދާ ބޯޓުތަކަށް ބޭނުންވާ ފިޔުލް ނުލިބުމުގެ ސަބަބުން އެމްއޭސީއެލްގެ ޖެޓް ފިޔުލްގެ ޑިމާންޑް ވަރަށް ބޮޑަށް އިތުރުވިއެވެ. އެއާއެކު އެމްއޭސީއެލުން ޖެޓްފިޔުލް ދޫކުރާވަރު ލިމިޓްކުރިއެވެ. އެގޮތުން، އައު ޝިޕްމަންޓް ލިބެންދެން އެ ކުންފުނިން ފިޔުލް ދޫކުރަމުން އައީ އެ ފްލައިޓެއްގެ ދަތުރަށް ބޭނުންވާ މިންވަރަށެވެ. ތެޔޮ ފޯރުކޮށްދިނުމުގައި އެ ކުންފުނިން ބަލާފައިވަނީ ބައިނަލްއަގުވާމީ މިންގަނޑުތަކާ އެއްގޮތަށް ދެވޭ އަދަދަށެވެ.
އައު ފިޔުލް ޝިޕްމަންޓާއެކު ރާއްޖެއަށް އަންނަ ހުރިހާ މަތިންދާބޯޓަކަށް ބޭނުންވާ ވަރަށް ކޭޓަރކުރެވޭނެކަމުގެ ޔަގީންކަން އެމްއޭސީއެލުން ދެއެވެ. އަދި ޑިމާންޑާ އެއްވަރަށް ތެޔޮ ފޯރުކޮށްދިނަސް ޝޯރޓޭޖެއް ނާންނާނެކަމަށްވެސް އެ ކުންފުނިން ބުނެއެވެ.
ޝަމްއާން ވިދާޅުވިގޮތުގައި ޝެޑިއުލާ އެއްގޮތަށް ކުރިއަށް އޮތްތަނުގައި ފިޔުލް ލިބޭނެކަމުގެ ޔަގީންކަން އެސްޓީއޯއިން ވަނީ އެމްއޭސީއެލަށް ދީފައެވެ.
މީގެ އިތުރުން އެސްޓީއޯގެ ލެބުގައި ތެޔޮ ޓެސްޓްކުރަން ފެށުމަކީވެސް އެމްއޭސީއެލަށް ލިބިގެންދިޔަ ވަރަށް ބޮޑު ލުޔެއްކަން ޝަމްއާން ފާހަގަކުރެއްވިއެވެ. އެގޮތުން، ކުރިން އައު ޝިޕްމަންޓެއް ލިބުމުން އެ ތެޔޮ ޓެސްޓްކުރަން ސާމްޕަލް ބޭރަށް ފޮނުވަންޖެހޭކަމަށާއި، ނަތީޖާ ލިބެން ގިނަ ދުވަސް ނަގާއިރު، މިހާރު ރާއްޖެއިން އެ ޚިދުމަތް ލިބެން ހުރުމުން ވަގުތު ސަލާމަތްވާކަން އޭނާ ފާހަގަކުރެއްވިއެވެ.
އެމްއޭސީއެލުން ފްލައިޓްތަކަށް ދޫކުރާ ޖެޓް ފިޔުލް ލިމިޓްކުރުމުން، އެ ކުންފުނީގައި ހުރި ޖެޓް ފިޔުލް ހުސްވަނީ ކަމަށާއި ރާއްޖެއަށްވެސް ތެޔޮ ނުލިބޭކަމަށް ބުނެ ބައެއް މީޑިއާތަކުން ޚަބަރު ފެތުރިއެވެ. ނަމަވެސް ލިމިޓެއް ކަނޑައެޅީ، ޑިމާންޑު އިތުރުވުމާއެކު ޝިޕްމަންޓެއްގައި ލަސްތަކެއް އުޅުމުން ކަމަށް އެމްއޭސީއެލުން ވަނީ މީގެ ކުރިން ބުނެފައެވެ.
