އިންޑިއާއިން ވެސް މަންކީޕޮކްސް ފެނިއްޖެ

އިންޑިއާއިން ވެސް މަންކީޕޮކްސް ބަލި ފެނިއްޖެއެވެ.

އެ ޤައުމުގެ ދަ ހިންދޫ ނޫހުން ރިޕޯޓް ކޮށްފައިވާ ގޮތުގައި މި ބަލި ފެނިފައިވަނީ ޔޫއޭއީ އިން އިންޑިއާގެ ކެރެލާއަށް ދިޔަ 35 އަހަރުގެ ފިރިހެނެއްގެ ގައިންނެވެ. އެކަން އެ ޤައުމުގެ ހެލްތު މިނިސްޓްރީން މިހާރުޔަގީންކޮށްދީފައިވާ ކަމަށް ވެސް އެ ނޫހުގައި ވަނީ ބުނެފައެވެ.

ރިޕޯޓްތައް ބުނާ ގޮތުގައި އެ މީހާ ޔޫއޭއީ އިން އިންޑިއާއަށް ދިޔައީ މިމަހުގެ 11 ވަނަ ދުވަހުއެވެ. އޭނާގެ ފަރާތުން ބަލީގެ އަލާމާތްތައް ފެނިގެން ރިޕޯޓް ކުރުމާއެކު ބައްޔަށް ޓެސްޓު ކުރުމުން މަންކީޕޮކްސްއަށް ވަނީ ޕޮޒިޓިވްވެފައެވެ. އޭނާ އެ ބައްޔަށް ޕޮޒިޓިވް ވެފައިވާ ކަން އިއުލާން ކޮށްފައިވަނީ މިދިޔަ ބުރާސްފަތި ދުވަހުއެވެ.

އެ މީހާ މިހާރު ވަނީ ޓްރިވަނަންދަ ޕުރަމްގެ ހޮސްޕިޓަލެއްގައި އެކަހެރި ކޮށްފައެވެ. އޭނާގެ ހާލު ރަނގަޅު ކަމަށް ވެސް އެ ޤައުމުން ރިޕޯޓް ކުރެއެވެ. އޭނާއާއެކު އޭނާއާ ދިމާވި ހުރިހާ މީހުން ވެސް މިހާރު ވަނީ އެކަހެރި ކޮށްފައެވެ. މީގެ ތެރޭގައި އޭނާގެ މައިންބަފައިންނާއި އޭނާ ގޮވައިގެން ރިކްޝާގައި ދަތުރު ކުރި ޑްރައިވަރުންނާއި ހޮސްޕިޓަލުގައި އޭނާއާ ދިމާވި ޑޮކްޓަރާއި އޭނާ ދަތުރު ކުރި ފްލައިޓުގެ 11 މީހަކު ހިމެނެއެވެ.

މަންކީޕޮކްސް އާންމުކޮށް ފެނިފައިވަނީ އެކަހެރިކޮށް ހުރި މެދު އަދި ހުޅަނގު އެފްރިކާގެ ސަރަހައްދުތަކުންނެވެ. މަންކީ ޕޮކްސް އަކީ މަދުން ފެންނަ އަދި އޭގެ ނުރައްކާ ކުޑަ ވައިރަހަކުން ޖެހޭ ބައްޔެކެވެ. މަންކީޕޮކްސް ޖެހޭ މީހުން އާންމު ގޮތެއްގައި ހަފްތާއެއްގެ ތެރޭގައި ބަލިން ފަސޭހަވާ ކަމަށް އިނގިރޭސިވިލާތުގެ ނެޝަނަލް ހެލްތް ސަރވިސްއިން ވަނީ ބުނެފައެވެ. މީގެ އިތުރުން ވައިރަސް އެހާ ފަސޭހައިން މީހުންގެ ތެރޭގައި ނުފެތުރޭ ކަމަށާއި، އަދި އާންމުންގެ ތެރޭގައި ފެތުރުމުގެ ނުރައްކާ ކުޑަކަމަށް ވެސް ވަނީ ބުނެފައެވެ.

މި ބަލީގެ އަލާމާތްތަކުގެ ތެރޭގައި ހުން އައުމާއި ގައިގެ ހަންގަޑުގައި ފިތް ޒާތު އެއްޗެތި ނެގުން ހިމެނެއެވެ.

މަންކީޕޮކްސްއަށް ވަކި ވެކްސިނެއް އުފައްދާފައެއް ނުވެއެވެ. ނަމަވެސް ސްމޯލްޕޮކްސް ނުވަތަ ހިމަ ބިހި އެއީ މަންކީޕޮކްސްއާއި އެއްގޮތް ވައިރަހަކުންޖެހޭ ބައްޔަކަށް ވުމުން، ސްމޯކްޕޮކްސްއަށް އުފައްދާފައިވާ ވެކްސިން ޖެހުމުން 85 އިންސައްތަ ރައްކާތެރިކަން ލިބެއެވެ.