އަކިއޭ އަބޭ: ޖަޕާން ދުށް ތަފާތު ފަސްޓް ލޭޑީއެއް

ޖަޕާންގެ ކުރީގެ ބޮޑު ވަޒީރު ޝިންޒޯ އަބޭ އަވަހާރަކޮށްލެވުނުތާ ހުކުރު ދުވަހަށް އެއްހަފްތާ ވެފައިވާއިރު އަބޭގެ ހުވަފަތް އަނބިކަނބަލުން އަކިއޭ އަބޭގެ ހަޔާތްޕުޅަށް ކުޑަކޮށް ނަޒަރު ހިންގާލަމެވެ.

ގިނަ މީޑިއާ ރިޕޯޓުތަކުގައިވާ ގޮތުން އަކިއޭ އަކީ އާދަޔާ ޚިލާފު ބޭފުޅެކެވެ. އާދަޔާ ޚިލާފު ހިތްވަރުފުޅެއްގެ ވެރިއެކެވެ. ފިރިކަލުންގެ ހަށިކޮޅަށް ބަޑިޖަހާ އަވަހާރަކޮށްލެވުނު ހާދިސާއަށްފަހުވެސް ހިތްވަރުފުޅު ބަލިވިކަން އެއްވެސް ވަރަކަށް ބޭރުފުށަށް ދައްކަވާފައެއް ނުވެއެވެ. ސެކިއުރިޓީ ގާޑުން ފިޔަވައި އިތުރު މީހަކުނެތި ގިނިކަންޏާ އެއްގަޑިއިރުގެ ރޭލު ދަތުރެއް ކުރައްވާ ފިރިކަލުންގެ ހަށިކޮޅު ގެންދެވުނު ހޮސްޕިޓަލަށް އެކަމަނާ ވަޑައިގެންނެވިއެވެ. އަދި އަބޭގެ ހަށިކޮޅު އަނބުރާ ޓޯކިޔޯގައި ހުންނަ އެދެކަނބަލުންގެ ގެކޮޅަށް ގެނެވުނު މޮޓޮކޭޑްގައި އަކިއޭ ވަޑައިގެންނެވިއެވެ.

އަކިއޭ މަޓްސުޒާކީ 1987 ވަނަ އަހަރު ޝިންޒޯ އަބޭއާ ކައިވެނި ބައްލަވައިގެންނެވި އިރު، އަބޭ ހުންނެވީ ސިޔާސީ އިސް ބޭފުޅެއްގެ އެއިޑަކަށެވެ. އޭރު އަކިއޭ ހުންނެވީ ޖަޕާންގެ އެންމެ ބޮޑު އެޑްވަޓައިޒިންގ އޭޖެންސީގެ ވަޒީފާއެއްގައެވެ. ކައިވެނިފުޅަށް ފަހު، ޖަޕާންގައި ކަންކުރަމުން އަންނަ އާދަކާދަޔާ އެއްގޮތަށް  އަކިއޭ ވަޒީފާ ދޫކޮށްލެއްވި ނަމަވެސް، އަކިއޭ ފެނިގެން ދިޔައީ ހުރިހާގޮތަކުންވެސް ތަފާތު ބޭފުޅެއްގެ ގޮތުގައެވެ.

ޝިންޒޯ އަބޭއާ ބައްދަލުވިއިރު އުމުރުފުޅަކީ 22 އަހަރެވެ. 1987ގަ ކައިވެނި ބައްލަވައިގަތީ ދެއަހަރު ދުވަހު އެއްކޮށް އުޅުއްވުމަށްފަހުއެވެ.

ޝިންޒޯ އަބޭގެ ދެކަނބަލުންނަށް ބޭފުޅަކު ލިބިވަޑައިގެންފައެއް ނުވެއެވެ. ކައިވެނީގެ ކުރީކޮޅު އެކަމަށް އެކި ފަރުވާކުރެއްވި ކަމަށް އަބޭ ޖަޕާނުގެ މީޑިޔާއަށް ކުރިން ވިދާޅުވެފައި ވެއެވެ.

ސިންޒޯ އަބޭއާ ކައިވެނިފުޅު ބައްލަވައިގެން، 35 އަހަރެއްހާ ދުވަހުގެ ތެރޭ ޖަޕާނުގެ ރައްޔިތުން އަކިއޭ އަބޭ ދަންނަނީ އަމިއްލަ ޚިޔާލު ފާޅުކުރައްވާ، ކަންކަމާ މަސްއޫލުވެގެން އުޅުއްވާ ބޭފުޅެއްގެ ގޮތުގައެވެ. އެހެން ވެސް ފަސްޓް ލޭޑީންނާއި ޚިލާފަށް ފިރިކަލުންގެ ހިޔަނީގަ ނިވާވެގެން ހުންނަވަން އަކިއޭ ބޭނުންފުޅެއް ނުވިއެވެ. އަމިއްލަ އެޖެންޑާއެއް ގެންގުޅުއްވާ އެކިއެކި ހަރަކާތްތައް ރާއްވަވާ އަދި އެމެރިކާފަދަ ޤައުމެއްގެ ފަސްޓް ލޭޑީން އުޅުވާ ބީދައަކުން ކަންތައްތައް ކުރައްވަމުން ގެންދެވިއެވެ.

އަކިއޭ އަބޭ ތާއީދު ކުރައްވާ އެކިއެކި ކަންކަމަށް ސަޕޯޓް ހޯއްދެވުމަށް އެއްވުންތަކުގައި ބައިވެރިވެ ވަޑައިގަންނަވަމުން ގެންދެވިއެވެ. ބައެއްފަހަރު އެއީ ފިރިކަލުން ޝިންޒޯ އަބޭގެ ޕޮލިސީއާ ތައާރުޒުވާ ކަންކަމަށް ވިއަސް އެވެ. ނިއުކްލިއަރ ބާރަކަށްވުމަށް އަބޭ ތާއީދުކުރެއްވި އިރު އަކިއޭ އެކަމާ ދެކޮޅު ހެއްދެވިއެވެ. އެމެރިކާގެ މެރިން ކޯ ބޭސް ފުޅާކުރެއްވުމަށް އަބޭ ތާއީދުކުރެއްވި އިރު އެކަމާ ދެކޮޅު ހެދި ފަރާތްތަކާއެކު އަކިއޭ މުޒާހަރާއަށް ނުކުންނަވާފައި ވެއެވެ. މިފަދަ ކަންކަމާ ގުޅިގެން ޖަޕާންގެ މީޑިއާއިން އެކަމަނާއަށް ވަނީ ވަނަމެއް ވެސް ދީފައެވެ. އެއީ "އަބޭގެ ގޭތެރޭގެ އިދިކޮޅު ޕާޓީ" އެވެ.

އަކިއޭ އަބޭގެ މަސައްކަތްޕުޅުގެ ތެރެއިން ބައެއްފަހަރު އާންމު އުސޫލުން ބަލާނަމަ ތަންކޮޅެއް ތަފާތު ކަންކަމަށް ވެސް ތައީދު ކުރައްވާފައިވެއެވެ. މިގޮތުން އެއްޖިންސުން ކައިވެނި ކުރުމަށް ތާއީދު ކުރެއްވުމާއި މެޑިކަލް މަރުއާނާއަށް ތާއީދު ކުރެއްވުން ހިމެނެއެވެ.

މަސައްކަތްޕުޅުގެ ތެރެއިން ކިތަންމެ ބޮޑަށް ޚިޔާލު ތަފާތުވި ނަމަވެސް ދެބޭފުޅުންގެ ދެމެދުގައިވާ ލޯބި ހާމަކުރެއްވުމަށް ދެބޭފުޅުންވެސް ފަސް ޖެހިވަޑައިނުގަންނަވައެވެ. ޖަޕާންގެ ސިޔާސީ ވެރިން އާންމުކޮށް ކުރައްވާތީ ނުފެނުނު ނަމަވެސް އާންމު ތަންތަނުގައި އަތުގައި ހިފާލުންފަދަ ކަންކަން ކުރެއްވުމަކީ ޝިންޒޯ އަބޭ އާއި އަކިއޭ އަބޭ ކުރައްވާ ކަންކަމެވެ. މީގެ އިތުރުން އަކިއޭ އަބޭ އިންސްޓަގްރާމް ޕޯސްޓްތަކުން ފިރިކަލުންގެ ލޯބި ފޮޓޯތައް ފެނުމަކީވެސް އާންމު ކަމެކެވެ. ހިނިތުންވެލުމާއެކު އެކުގައި ހިންގަވާލައްވަނިކޮށެވެ. އެނިވަރސަރީތަކާ އެހެންވެސް މުނާސަބާތައް ދެބޭފުޅުން އެކުގައި ނުހަނު ލޯތްބާއެކު ފާހަގަކުރައްވާ މަންޒަރު ފެންނަ ފޮޓޯތައް ފެނުމަކީ އާންމު ކަމެކެވެ.

އަކިއޭ އަބޭއަކީ ޖަޕާނުގެ ފަސްޓް ލޭޑީންގެ ތެރޭން ސޯޝަލް މީޑިޔާ، ޚާއްސަކޮން ފޭސްބުކް އާއި އިންސްޓަގްރާމް އެހާ ފުޅާކޮށް ބޭނުންކުރައްވާ ފުރަތަމަ ބޭފުޅާއެވެ. އަދި އެކަމަނާގެ ހަޔާތްޕުޅުގެ ކަންކަން އެތައްހާސް ފޮލޯވަރުންނާ ހިއްސާ ކުރައްވަމުން ގެންދަވައެވެ.

އަކިއޭ އަބޭ ތަފާތުވާ އެހެން ބައެއް ކަންކަމުގެ ތެރޭގައި އަމިއްލަ ރެސްޓޯރަންޓެއް ހިންގެވުމާއި އަމިއްލަޔަށް ހަނޑޫ ފަދަ އެއްޗެތި ހައްދާ އުޅުއްވުން ހިމެނެއެވެ.

ޝިންޒޯ އަބޭގެ ބޮޑުވަޒީރުކަމުގެ ދެވަނަ ދައުރު ފެށުމުގެ ކުރިން އަކިއޭ އަބޭ އަލުން ކޮލެޖަށް ވަޑައިގެން ސޯޝަލް ޑިޒައިން ސްޓަޑީސްއިން މާސްޓާރސް ޑިގްރީއެއް ނެންގެވިއެވެ.

އަކިއޭ އަބޭ އުފަންވެ ވަޑައިގެންފައިވަނީ ޖަޕާންގައި ފޮނި ކާތަކެތި ވިއްކުމުގެ ވިޔަފާރީގައި ފާހަކަކޮށްލެވޭ ޓޯކިޔޯގެ މުއްސަނދި އާއިލާއަކަށެވެ. ޕްރައިވެޓް ސްކޫލަކުން ތައުލީމު ހާސިލުކުރެއްވުމަށްފަހު އަންހެނުންނަށް ޚާއްސަ ވޮކޭޝަނަލް ސްކޫލަކުން ތަމްރީން ވެވަޑައިގެންނެވިއެވެ. ޖަޕާނުގެ އެހެން ބައެއް ފަސްޓް ލޭޑީންނާއި ޚިލާފަށް އަކިއޭ އަބޭ ފަރިތަކޮށް އިގިރޭސިބަހުން ވާހަކަފުޅު ވެސް ދައްކަވައެވެ.