ޖުލައި މަހުގެ 30 ވަނަ ދުވަހު އަނެއްކާވެސް އުމްރާގެ އަޅުކަން ކުރުމަށް ފުރުސަތު ހުޅުވާލެވިގެންދާނެކަމަށް ސައުދީ އަރަބިއާއިން ބުނެފިއެވެ.
ބުދަ ދުވަހު ސައުދީގެ ޙައްޖު އެންޑް އުމްރާ މިނިސްޓްރީން ހާމަކޮށްފައިވާ ގޮތުގައި، އުމްރާގެ އަޅުކަން ދެން ފެށިގެންދާނީ 1 މުޙައްރަމް 1444 ގައެވެ. އެ ދުވަސް މީލާދީ ގޮތުން ދިމާވަނީ ޖުލައި މަހުގެ 30 ވަނަ ދުވަހަށެވެ.
ބުރާސްފަތި ދުވަހުން ފެށިގެން އުމްރާގެ އަޅުކަމަށް ދާން ބޭނުންވާ ފަރާތްތަކަށް ވިސާ ދޫކުރަމުންދާނެކަން އެ މިނިސްޓްރީން ވަނީ ހާމަކޮށްފައެވެ. ވިސާ ދޫކުރާއިރު ބަލާ މިންގަނޑުތައް މިހާރު މިނިސްޓްރީން ވަނީ އާންމުކޮށްފައެވެ.
މީގެއިތުރުން ސައުދީގެ ޙައްޖު އެންޑް އުމްރާ މިނިސްޓްރީން ބުނެފައިވާ ގޮތުގައި ކޮވިޑް-19 ފަދަ ބަލިތަކުން ރައްކާތެރިވުމަށްޓަކައި ހެދިފައިވާ އުސޫލުތަކަށް އެންމެންވެސް ބޯލަނބަން ޖެހޭނެއެވެ.
މިއަހަރުގެ ޙައްޖުގެ އަޅުކަންވެސް ކުރިއަށް ގެންގޮސްފައިވަނީ ފުރިހަމަ ފިޔަވަޅުތަކަކާއެކުއެވެ. އެގޮތުން ޙައްޖާޖީންގެ އެންމެ ފަހު ގްރޫޕް މިނާއިން ފުރުމާއެކު މިއަހަރުގެ ޙައްޖުގެ އަޅުކަން ވަނީ ނިމުމަކަށް އައިސްފައެވެ.
އެންމެ ފަހުގެ ގްރޫޕުގައި ހިމެނޭ 900،000 އެއްހާ މީހުން ވަނީ ހޯމަ އަދި ބުދަ ދުވަހު މިނާގައި 3 ޖަމްރާއަށް ހިލައުކާފައެވެ. އެއަށްފަހު ތަވާފުލް ވަދާ އަދާކުރުމަށް މައްކާއަށް އެ ގްރޫޕް ވަނީ ގޮސްފައެވެ. މިއީ ޙައްޖުގެ އެންމެ ފަހު އަޅުކަމެވެ.
މިއަހަރު ޙައްޖުގެ އަޅުކަން އަދާ ކުރުމަށް މައްކާއަށް ދިޔަ ޙައްޖާޖީން މިހާރު ވަނީ ޙައްޖު ނިންމާލުމަށްފަހު ފުރަން ފަށައިފައެވެ. އެގޮތުން، ސައުދީގެ އެއަރޕޯޓުތަކުގައި އެފަރާތްތަކަށް ފަސޭހައިން ފުރުމުގެ އިންތިޒާމުތައް މިހާރު ހަމަޖެހިފައިވާނެ ކަމަށް އެ ޤައުމުގެ ސަރުކާރުން ވަނީ ބުނެފައެވެ.
