ސުއަރޭޒްއަކީ ރޫނީ ބޭނުންވާ ފެންވަރުގެ ކުޅުންތެރިއެއް ނޫން

އުރުގުއާއީގެ ލުއިސް ސުއަރޭޒަކީ އޭނާ ބޭނުންވާ ކަހަލަ ކުޅުންތެރިއެއް ނޫން ކަމަށް، އެމެރިކާގެ ޑީސީ ޔުނައިޓެޑުގެ ކޯޗު ވޭން ރޫނީ ބުނެފިއެވެ.

ނިމުނު ސީޒަނަށްފަހު އެތުލެޓިކޯ މެޑްރިޑު ދޫކޮށްލަން ނިންމާފައިވާ ސުއަރޭޒްއަކީ މި ވަގުތު ފްރީ އެެޖެންޓެކެވެ. ދާދި ފަހުން ސުއަރޭޒް ވަނީ އެމެރިކާ ލީގުގެ ކުލަބުން އޭނާއަށް ހުށަހެޅުމެއް ލިބިފައިވާ ކަމަށް ބުނެފައެވެ.

ޑާބީ ކައުންޓީގެ ކޯޗުކަން ދޫކޮށްލުމަށްފަހު ދާދި ފަހުން ޑީސީ ޔުނައިޓެޑުގެ ކޯޗުކަމާ ހަވާލުވި ރޫނީ ބުނީ ސުއަރޭޒްއަކީ ތަފާތު މޮޅު ކުޅުންތެރިއެއް ކަމަށެވެ. ނަމަވެސް އޭނާ ބޭނުންވަނީ "ބަނޑުހައިވެފައި" ތިބޭ ކުޅުންތެރިން ކަމަށް ރޫނީ ވަނީ ބުނެފައެވެ. މީގެ އިތުރުން ރޫނީ ފާހަގަ ކުރި ގޮތުގައި އޭނާ ބޭނުންވާ ކުޅުންތެރިން ކުލަބަށް އަންނަނީ ކުލަބަށް އަންނަ ހިތުން، ކުލަބަށް ލޯބި ޖެހިގެން ކަމަށެވެ. އަދި އެ ކުޅުންތެރިންނަކީ ކުލަބުގެ ހުރިހާ ފަރިތަކުރުންތަކަށް ހާޒިރުވެ، ކޮންމެ މެޗެއް ކުޅެވޭ ކުޅުންތެރިއަކަށް ވާންވާނެ ކަމަށް ވެސް އޭނާ ބުންޏެވެ. ރޫނީގެ ނަޒަރުގައި އޭނާ ބޭނުންވާނީ ކުލަބަށް ޚާއްސަ ލޯތްބެއް އޮންނަ ކުޅުންތެރިންނެވެ.

އިތުރަށް ވާހަކަ ދައްކަމުން ރޫނީ ބުނީ އޭނާގެ ޓީމުން ބަލަމުން ދަނީ އެކަހަލަ ކުޅުންތެރިންނަށް ކަމަށާއި، ޔަޤީނުން ވެސް ކުރިއަށް އޮތް ދުވަސްތަކުގައި އެފަދަ ކުޅުންތެރިންގެ ސޮއި ހޯދައި، އިއުލާން ކުރާނެ ކަމަށެވެ.

ސުއަރޭޒް އެތުލެޓިކޯ މެޑްރިޑަށް ބަދަލުވީ 2020 ވަނަ އަހަރުއެވެ. އޭނާ އެ ޓީމަށް ބަދަލުވީ ކުރީގެ ކުލަބް ބާސެލޯނާ ދޫކޮށްލުމަށްފަހުއެވެ. ބާސެލޯނާގައި ވެސް މޮޅު ކުޅުމެއް ދެއްކި ސުއަރޭޒް ވަނީ އެތުލެޓިކޯގައި ވެސް ރަނގަޅު ކުޅުމެއް ދައްކާފައެވެ. 35 އަހަރުގެ ސްޓަރައިކަރު ވަނީ އޭނާ އެތުލެޓިކޯއަށް ކުޅެދިން 83 މެޗުގައި 34 ލަނޑު ޖަހާފައެވެ. އެ ޓީމާއެކު އޭނާ ވަނީ 21-2020 ވަނަ އަހަރުގެ ސްޕެނިޝް ލީގު ކާމިޔާބުކޮށްފައެވެ.