ބޮރިސްގެ މަގާމަށް 8 ބޭފުޅަކު ވާދަކުރައްވަނީ

އިނގިރޭސިވިލާތުގެ ބޮޑުވަޒީރުކަމުގެ މަގާމަށް ބޮރިސް ޖޯންސަންގެ ބަދަލުގައި 8 ކެންޑިޑޭޓަކު ވާދަކުރައްވާނެކަން އިއުލާންކޮށްފިއެވެ.

ކޮންޒަވޭޓިވް ޕާޓިީގެ ރައީސް ކަމާއި އިނގިރޭސިވިލާތުގެ ބޮޑުވަޒީރަކަމަށް ހޮވުމަށް ހުށަހަޅާފައިވާ ކެންޑިޑޭޓުންގެ މެދުގައި ވޯޓުލުން ފަށާނީ ބުދަ ދުވަހުއެވެ. ފުރަތަމަ ބުރުގެ ވޮޓުލުން ކުރިއަށްދާނީ ކޮންޒަވޭޓިވް ޕާޓީގެ މަޖިލިސް މެމްބަރުންގެ މެދުގައެވެ.

ކޮންޒަވޭޓިވް ޕާޓީގެ 1922 ކޮމިޓީގެ ޗެއަރމަން ގްރަހަމް ބްރެޑީ އިއުލާން ކުރެއްވި ގޮތުގައި ބޮޑުވަޒީރުގެ މަގާމަށް ވާދަ ކުރައްވާނީ އެ ޤައުމުގެ ކުރީގެ ފިނޭންސް މިނިސްޓަރު ރިޝީ ސުނާކް އާއި ފޮރިން ސެކްރެޓަރީ، މިނިސްޓަރ ފޯރ ވުމަން އެންޑް އިކުއަލިޓީ، ލިޒް ޓްރޫސް އާއި މަޖިލިސް މެމްބަރު ޓޮމް ޓަގެންދަޓް އާއި މަޖިލިސް މެމްބަރު ކެމީ ބެޑެނޮކް އާއި ސްޓޭޓް މިނިސްޓަރ ޕެނީ މޯރޑޮންޓް އާއި މަޖިލިސް މެމްބަރު ޖެރެމީ ހަންޓް އާއި ޗާންސެލަރ ދީމް ޒަހާވީ އަދި އެޓަރނީ ޖެނެރަލް ސުއެލާ ބްރެވަމަން އެވެ.

ކޮންޒަވޭޓިވް ޕާޓީން ފުރަތަމަ ލަފާ ކުރީ ގާނޫނު ހަދާ މަޖިލީހުގެ އެޕާޓީގެ މެމްބަރުންގެ ތެރެއިން 20 މެމްބަރުން ވާދަ ކުރައްވާނެ ކަމަށެވެ. ނަމަވެސް ތާއީދު ކުޑަވުމުގެ ސަބަބުން ބައެއް މެމްބަރުން ވަނީ ނަން އަނބުރާ ގެންދަވާފައެވެ. ނަން އަނބުރާ ގެންދެވި ގިނަ ބޭފުޅުން ތާއީދު ކުރައްވަނީ ކުރީގެ ފިނޭންސް މިނިސްޓަރު ރިޝީ ސުނާކްއަށެވެ.

ސުނާކްއަށް މަޖިލީހުގެ މެމްބަރުންގެ ތާއީދު އޮތް ނަމަވެސް ބޮރިސްއަށް ތާއީދު ކުރާ ގިނަ ބައެއްގެ ތާއީދު ސުނާކްއަށް ވަނީ ގެއްލިފައެވެ. އެއީ ބޮރިސް މަގާމުން އިސްތިއުފާދެއްވުމަށް މަޖުބޫރު ކުރުވުމުގައި އޭނާ އަދާކުރެއްވި ދައުރާ ގުޅިގެން ކަމަށް ބޭރުގެ މީޑިއާތަކުން ރިޕޯޓްކުރެއެވެ.

އިނގިރޭސިވިލާތުގެ ވެރިކަން ކުރާ ޕާޓީ، ކޮންޒަވޭޓިވް ޕާޓީގެ ރައީސް އާއި އެ ޤައުމުގެ ބޮޑުވަޒީރު ހޮވުމަށް ބާއްވާ އިންތިޚާބު ޖުލައި 21 އާ ހަމައަށް ކުރިއަށްދާނެއެވެ. އަދި ސެޕްޓެމްބަރު 5 ގައި އައު ބޮޑުވަޒީރުގެ ނަން އިއުލާން ކުރެވޭނެ ކަމަށް ކޮންޒަވޭޓިވް ޕާޓީން ވަނީ ބުނެފައެވެ.